(vovworld) - ພາຍຫຼັງ 3 ປີ ແຫ່ງການຜັນຂະຫຍາຍໂຄງການຈຸດໝາຍແຫ່ງຊາດກ່ຽວກັບການກໍ່ສ້າງຊົນນະບົດໃໝ່, ຊີວິດທາງດ້ານເສດຖະກິດ - ວັດທະນະທຳ - ສັງຄົມຂອງປະຊາຊົນໃນບໍລິເວນເມືອງບູ່ດັງ, ແຂວງບິ່ງເຟືອກໄດ້ຮັບການປ່ຽນແປງໃນແຕ່ລະວັນ. ການສ້າງຄວາມເຫັນດີເຫັນພ້ອມໃນການກໍ່ສ້າງຊົນນະບົດໃໝ່ໄດ້ຮັບການກຳນົດວ່າແມ່ນໜຶ່ງໃນບັນດາມາດຖານຂອງໂຄງການກໍ່ສ້າງຊົນນະບົດໃໝ່. ດັ່ງນັ້ນ, ນັບແຕ່ຜັນຂະຫຍາຍ, ອຳນາດການປົກຄອງທຸກຂັ້ນຂອງເມືອງໄດ້ຍູ້ແຮງວຽກງານໂຄສະນາ ດ້ວຍຫຼາຍຮູບການທີ່ອຸດົມສົມບຸນ, ຈາກນັ້ນສ້າງຄວາມເຫັນດີເຫັນພ້ອມ, ຮ່ວມແຮງຮ່ວມໃຈໃນໝູ່ປະຊາຊົນກ່ຽວກັບການກໍ່ສ້າງຊົນນະບົດໃໝ່ໃນບໍລິເວນເມືອງ.
ປະຊາຊົນເມືອງບູ່ດັງເຂົ້າຮ່ວມການກໍ່ສ້າງທາງເບຕົງ
(ພາບ: ອິນເຕີແນດ)
ບູ່ດັງ ແມ່ນເມືອງໜຶ່ງໃນເຂດພູດອຍແຂວງບິ່ງເຟືອກ ທີ່ມີ 15 ຕາແສງ ແລະ 1 ເທດສະບານ, ດ້ວຍພົນລະເມືອງກວ່າ 130.000 ຄົນ. ບູ່ດັງ ມີ 31 ຊົນເຜົ່າທີ່ພວມດຳລົງຊີວິດຢູ່ຮ່ວມກັນ, ກວມ 37% ຈຳນວນພົນລະເມືອງໃນທົ່ວເມືອງ. ຜ່ານ 3 ປີ ແຫ່ງການຜັນຂະຫຍາຍໂຄງການຈຸດໝາຍແຫ່ງຊາດກ່ຽວກັບການກໍ່ສ້າງຊົນນະບົດໃໝ່ ໄລຍະ 2011-2020, ເມືອງບູ່ດັງ ສາມາດບັນລຸໄດ້ຜົນງານທີ່ໜ້າຊື່ນຊົມ. ມາຮອດປະຈຸບັນ, ເມືອງໄດ້ປະຕິບັດສຳເລັດວຽກງານວາງແຜນກຳນົດ ແລະ ອະນຸມັດຜ່ານແຜນຮ່າງກໍ່ສ້າງຊົນນະບົດໃໝ່ຢູ່ 15/15 ຕາແສງ. ມາຮອດປະຈຸບັນ, ບັນດາຕາແສງໃນບໍລິເວນເມືອງບັນລຸໄດ້ແຕ່ 6-13 ມາດຖານກໍ່ສ້າງຊົນນະບົດໃໝ່. ທ່ານ ເຈິ່ນວັນຈູງ, ເລຂາຄະນະພັກເມືອງ ບູ່ດັງ, ໃຫ້ຮູ້ວ່າ: ໂດຍເລີ່ມມາຈາກເມືອງທຸກຍາກໃນບໍລິເວນທີ່ກວ້າງຂວາງ ແລະມີຫຼາຍຊົນເຜົ່າຢູ່ຮ່ວມກັນ, ຊີວິດຂອງປະຊາຊົນປະສົບກັບຄວາມຫຍຸ້ງຍາກຫຼາຍຢ່າງ, ດັ່ງນັ້ນບັນດາຜົນງານເຊິ່ງເມືອງບັນລຸໄດ້ນັ້ນ ແມ່ນຄວາມມານະພະຍາຍາມທີ່ສຸດຂອງການນຳ ແລະ ປະຊາຊົນໃນເມືອງ.
“ບົດບາດຂອງປະຊາຊົນແມ່ນສຳຄັນທີ່ສຸດ, ປະຊາຊົນເຫັນດີເຫັນພ້ອມ, ສະໜັບສະໜູນການກໍ່ສ້າງຊົນນະບົດໃໝ່. ຍ້ອນມີຄວາມເຫັນດີເຫັນພ້ອມນີ້, ເມືອງບູ່ດັງ ຈຶ່ງສາມາດຜ່ານຜ່າຄວາມຫຍຸ້ງຍາກບັນລຸໄດ້ຜົນງານພໍສົມຄວນ. ເມື່ອປະຊາຊົນເຂົ້າໃຈໄດ້ຄວາມໝາຍ, ຜົນປະໂຫຍດຂອງໂຄງການກໍ່ສ້າງຊົນນະບົດໃໝ່, ເຂົາເຈົ້າເອງຈະແມ່ນກຳລັງຕົ້ນຕໍ, ແມ່ນກຳລັງໜູນເພື່ອກໍ່ສ້າງຊົນນະບົດໃໝ່ໃຫ້ສຳເລັດ “.
ມາຢ້ຽມຢາມມິງຮຶງ, ເຊິ່ງແມ່ນຕາແສງນຳໜ້າໃນຂະບວນການກໍ່ສ້າງຊົນນະບົດໃໝ່ຂອງເມືອງບູ່ດັງ ຈຶ່ງເຫັນໄດ້ການປ່ຽນແປງໃນຊີວິດການເປັນຢູ່ຂອງປະຊາຊົນແຫ່ງນີ້. ບັນດາຕຶກອາຄານຫຼັງໃໝ່ທີ່ໃຫຍ່ໂຕສວຍງາມຫຼາຍຫຼັງໄດ້ຮັບການປຸກສ້າງໃໝ່ນັບມື້ນັບຫຼາຍ, ທາງຄົມມະນາຄົມລະຫວ່າງບ້ານຍາວນັບສິບກິໂລແມັດໄດ້ຮັບການກໍ່ສ້າງດ້ວຍເບຕົງ. ສຸກສາລາ, ຫໍວັດທະນະທຳ, ໂຮງຮຽນ, ໂຮງຮຽນອະນຸບານລ້ວນແຕ່ໄດ້ຮັບການລົງທຶນກໍ່ສ້າງ. ລາຍຮັບສະເລ່ຍຂອງປະຊາຊົນໃນຕາແສງມິງຮຶງ ໄດ້ຮັບການເພີ່ມຂຶ້ນຢ່າງບໍ່ຢຸດຢັ້ງ. ທ່ານ ເຈິ່ງນັນຕວຽນ, ຮອງປະທານຕາແສງມິງຮຶງ, ໃຫ້ຮູ້ວ່າມາຮອດປະຈຸບັນ, ຕາແສງໄດ້ສຳເລັດ 13 ມາດຖານແລ້ວ, ແລະສູ້ຊົນຮອດປີ 2015 ຈະສຳເລັດ 19 ມາດຖານຂອງໂຄງການຈຸດໝາຍແຫ່ງຊາດກ່ຽວກັບການກໍ່ສ້າງຊົນນະບົດໃໝ່:
“ປະຕິບັດໂຄງການກໍ່ສ້າງຊົນນະບົດໃໝ່ຕາມທັດສະນະຂອງພັກ ແລະ ລັດນັ້ນແມ່ນປະຊາຊົນເປັນເຈົ້າຂອງ, ລັດເປັນຜູ້ໜູນຊ່ວຍ. ພວກຂ້າພະເຈົ້າໄດ້ຜັນຂະຫຍາຍການຮັບເອົາຄວາມເຫັນ ຢ່າງກວ້າງຂວາງ ຈາກປະຊາຊົນ. ຕ້ອງເຮັດແນວໃດໃຫ້ປະຊາຊົນເຂົ້າໃຈໄດ້ວ່າການກໍ່ສ້າງຊົນນະບົດໃໝ່ແມ່ນເພື່ອປະຊາຊົນ. ດັ່ງນັ້ນພວກຂ້າພະເຈົ້າໄດ້ຍູ້ແຮງວຽກງານໂຄສະນາ, ຈັດຕັ້ງກອງປະຊຸມ ກໍ່ຄືຮັບເອົາຄວາມເຫັນຂອງປະຊາຊົນ. ບັນດາວຽກງານລະດົມປະຊາຊົນລ້ວນແຕ່ໄດ້ຮັບການຜັນຂະຫຍາຍຢ່າງເປີດເຜີຍ, ຈະແຈ້ງ. ຈາກນັ້ນປະຊາຊົນກໍ່ເຂົ້າຮ່ວມຢ່າງສຸດຈິດສຸດໃຈ“
ພິທີເປີດສະຫຼອງຫໍເຍົາວະຊົນເມືອງບູ່ດັງ
(ພາບ: ອິນເຕີແນດ) ໃນຂະບວນການກໍ່ສ້າງຊົນນະບົດໃໝ່ຢູ່ເມືອງບູ່ດັງ ເວົ້າລວມ ແລະ ຕາແສງມິງຮຶງ ເວົ້າສະເພາະ, ມີຫຼາຍຄອບຄົວ, ສ່ວນບຸກຄົນໄດ້ຕັ້ງໜ້າປະກອບເຫື່ອແຮງ, ວັດຖຸສິ່ງຂອງ ແລະ ທີ່ດິນຂອງຕົນເພື່ອກໍ່ສ້າງທາງຄົມມະນາຄົມ, ໂຮງຮຽນ, ເຮືອນຢູ່. ເດັ່ນກວ່າໝູ່ແມ່ນຄອບຄົວທ່ານ ເຈິ່ນນຳ, ຢູ່ບ້ານ 1, ຕາແສງມິງຮຶງ, ເຖິງວ່າຄອບຄົວບໍ່ຮັ່ງມີກໍ່ຕາມ, ແຕ່ປີໃດຄອບຄົວທ່ານກໍ່ມອບຂອງຂວັນນັບຮ້ອຍພູດໃຫ້ບັນດາຄອບຄົວທີ່ທຸກຍາກໃນບໍລິເວນ. ຄອບຄົວທ່ານ ເຈິ່ນນຳ ຍັງນຳໜ້າໃນເລື່ອງສະໜັບສະໜູນການກໍ່ສ້າງຊົນນະບົດໃໝ່. ທ່ານໄດ້ໃຊ້ເງິນສ່ວນຕົວເພື່ອກໍ່ສ້າງຂົວລຳໜຶ່ງ ແລະ ກໍ່ສ້າງທາງທີ່ມີລວງຍາວເກືອບ 1 ກມ ດ້ວຍເບຕົງເພື່ອຮັບໃຊ້ປະຊາຊົນໃນບ້ານໄປມາຢ່າງສະດວກສະບາຍ. ທ່ານ ເຈິ່ນນຳ ໃຫ້ຮູ້ວ່າ:
“ຂ້າພະເຈົ້າສະໜັບສະໜູນການກໍ່ສ້າງຊົນນະບົດໃໝ່, ເພາະວ່າມັນຈະຊ່ວຍປະຊາຊົນຍົກສູງລະດັບຄອງຊີບ, ປະຊາຊົນທຸກຄົນຕ່າງກໍ່ເບິກບານມ່ວນຊື່ນ. ສະເພາະຂ້າພະເຈົ້າເອງຍິ່ງພາກພູມໃນກວ່າອີກເມື່ອເຫັນວ່າຊີວິດທາງດ້ານວັດຖຸ ແລະ ຈິດໃຈຂອງປະຊາຊົນນັບມື້ນັບໄດ້ຮັບການຍົກສູງຂຶ້ນ”.
ໃນໄລຍະຈະມາເຖິງ, ເມືອງບູ່ດັງ ຈະປັບປຸງຄະນະຊີ້ນຳ, ໝ່ວຍໃຫ້ຄຳປຶກສາຄືນໃໝ່ ແລະ ປະກາດໃຊ້ມະຕິກ່ຽວກັບວຽກງານຊີ້ນຳການກໍ່ສ້າງຊົນນະບົດໃໝ່ໃນເມືອງ. ໂດຍກຳນົດໄດ້ບົດບາດສຳຄັນຂອງປະຊາຊົນ, ເມືອງບູ່ດັງ ຈະເພີ່ມທະວີວຽກງານໂຄສະນາ ເພື່ອຍົກສູງຄວາມຮັບຮູ້ກ່ຽວກັບບົດບາດ, ຄວາມຮັບຜິດຊອບຂອງປະຊາຊົນໃນການກໍ່ສ້າງຊົນນະບົດໃໝ່; ກໍ່ຄືຮຽກຮ້ອງແຫຼ່ງກຳລັງຕ່າງໆ… ເພື່ອສູ້ຊົນປະຕິບັດສຳເລັດໂຄງການຈຸດໝາຍແຫ່ງຊາດກ່ຽວກັບການກໍ່ສ້າງຊົນນະບົດໃໝ່ໃນບໍລິເວນໃຫ້ສຳເລັດໂດຍໄວ ແລະ ໝັ້ນຄົງ.