(vovworld) – ສຳລັບບັນດາແຂວງໃນເຂດ ໄຕງວຽນ, ການກໍ່ສ້າງຊົນນະບົດໃໝ່ແມ່ນໜຶ່ງໃນບັນດາໜ້າທີ່ສຳຄັນ. ດ້ວຍທິດນຳ:”ຊາວກະສີກອນແມ່ນເຈົ້າຂອງວິວັດການກໍ່ສ້າງຊົນນະບົດໃໝ່”, ບັນດາແຂວງຢູ່ເຂດ ໄຕງວຽນ ໄດ້ຕັ້ງໜ້າລະດົມກຳລັງແຮງຈາກປະຊາຊົນ, ສົມທົບກັບການຂຸດຄົ້ນທ່າແຮງຂອງທ້ອງຖີ່ນຢ່າງເໝາະສົມ ເພື່ອສ້າງການປ່ຽນໃໝ່ຢ່າງໃຫຍ່ຫຼວງຢູ່ໃນເຂດ.
ຄວາມເບີກບານມ່ວນຊື່ນຂອງຊາວເຜົ່າໄຕງວນ ເມື່ອການປູກຝັງໄດ້ຮັບຜົນດີ
(ພາບປະກອບ: ອິນເຕີແນດ)
ປະຈຸບັນ, ບ້ານ ເຕິງຢູ໋, ຕາແສງ ອີອາກາວ, ນະຄອນ ບວນມາຖວດ, ແຂວງ ດັກລັກ ໄດ້ມີການປ່ຽນໃໝ່ຫຼາຍຢ່າງ, ດ້ວຍຝາຜະໜັງທີ່ໄດ້ຮັບການກໍ່ສ້າງຢ່າງຮຽບຮ້ອຍ, ຮ່ອມທາງເຂົ້າບ້ານກວ້າງຂວາງ ແລະ ສະອາດ. ທ່ານ ອີທຳກບົວ, ຊາວບ້ານ ເຕິງຢູ໋, ໃຫ້ຮູ້ວ່າ: ນີ້ແມ່ນໝາກຜົນເບື້ອງຕົ້ນຂອງການຜັນຂະຫຍາຍການກໍ່ສ້າງຊົນນະບົດໃໝ່, ເຊິ່ງເລີ່ມດຳເນີນແຕ່ຕົ້ນປີ 2012. ນັບແຕ່ນັ້ນມາຮອດປະຈຸບັນ, ອຳນາດການປົກຄອງທ້ອງຖີ່ນຍັງລະດົມປະຊາຊົນເຂົ້າຮ່ວມການກໍ່ສ້າງຕາແສງວັດທະນະທຳຊົນນະບົດໃໝ່ອີກດ້ວຍ. ຂະບວນການໄດ້ນຳມາເຊິ່ງການປ່ຽນແປງ, ນັບແຕ່ແນວຄວາມຄິດຂອງແຕ່ລະຄົນ ຕະຫຼອດຮອດປະສິດທິຜົນອັນລະອຽດຂອງທົ່ງນາ, ສວນໄມ້:
”ພວກຂ້າພະເຈົ້າເຂົ້າຮ່ວມຂະບວນການກໍ່ສ້າງຊົນນະບົດໃໝ່ຢ່າງສຸດຈິດສຸດໃຈ. ປະຈຸບັນຄອບຄົວຂ້າພະເຈົ້າທຸກຄົນລ້ວນແຕ່ພະຍາຍາມສ້າງເສດຖະກິດ, ໂດຍໄດ້ຮັບການໜູນຊ່ວຍຈາກລັດ, ພໍ່ແມ່ປະຊາຊົນໃນບ້ານກໍ່ເຂົ້າຮ່ວມການປະຕິບັດຢ່າງຕັ້ງໜ້າຕາມແຜນການທີ່ໄດ້ວາງອອກ”.
ສວນກາເຟ
(ພາບປະກອບ: ອິນເຕີແນດ)
ພ້ອມກັບຄວາມຕັດສິນໃຈກໍ່ສ້າງຊົນນະບົດໃໝ່, ມີຫຼາຍບ້ານຢູ່ເຂດໄຕງວຽນ ຍັງຮ່ວມແຮງຮ່ວມໃຈເຂົ້າໃນການກໍ່ສ້າງຊົນນະບົດໃໝ່, ສະຫງວນທີ່ດິນເພື່ອເປີດເສັ້ນທາງ, ຂຸດຄອງເໝືອງ. ຄອບຄົວທ່ານ ບືມ ແລະ ບາງຄອບຄົວຢູ່ບ້ານ ເຈີເຮີງ 2, ຕາແສງ ດັກຕະໄລ, ເມືອງ ມາງຢາງ, ແຂວງຢາລາຍ, ໄດ້ສະຫງວນທີ່ດິນນັບພັນຕາລາງແມັດ, ຕັດໄມ້ໃນສວນ ດ້ວຍຄວາມສະໝັກໃຈ ເພື່ອເປີດເສັ້ນທາງໃໝ່. ທ່ານ ບືມ ໃຫ້ຮູ້ວ່າ:
”ບ້ານຕົກລົງພັດທະນາຊົນນະບົດຢູ່ບ່ອນໃດ ເຮົາກໍ່ປະຕິບັດຕາມ. ເຮົາດີໃຈຫຼາຍເມື່ອເຫັນວ່າໃນບ້ານໄດ້ມີການປ່ຽນແປງຫຼາຍຢ່າງ, ມີທາງເບຕົງຫຼາຍສາຍ, ການທຳມາຫາກິນຂອງຫຼາຍຄອບຄົວກໍ່ພັດທະນາ, ຄອບຄົວໃດກໍ່ມີລົດຈັກ”.
ເສັ້ນທາງໄປມາດ້ວຍເບຕົງ
(ພາບປະກອບ: ອິນເຕີແນດ)
ມຸ່ງໄປສູ່ຈຸດໝາຍຍົກສູງຊີວິດທາງດ້ານເສດຖະກິດໃຫ້ແກ່ຊາວກະສີກອນ ຢ່າງໝັ້ນຄົງ, ບັນດາແຂວງໃນເຂດ ໄຕງວຽນ ສະຫຼຸບໄດ້ບາງວິທີປະຕິບັດທີ່ດີ ເພື່ອຜັນຂະຫຍາຍຢ່າງກວ້າງຂວາງໃນຂະບວນການກໍ່ສ້າງຊົນນະບົດໃໝ່. ຢູ່ຕາແສງ ອີອາຢົງ, ເມືອງ ກະຮົງແປກ, ແຂວງດັກລັກ, ພໍ່ແມ່ປະຊາຊົນ ໄດ້ປູກຕົ້ນໄມ້ 3 ປະເພດເປັນຕົ້ນຕໍ່ຄື: ກາເຟ, ໝາກຖົ່ວລຽນ, ໝາກເບີ, ອັນໄດ້ນຳມາເຊິ່ງປະສິດທິຜົນສູງ. ທ່ານ ຕະວັນເຈີມ, ຮອງປະທານຄະນະກຳມະການປະຊາຊົນຕາແສງໃຫ້ຮູ້ວ່າ, ຜົນກຳໄລທີ່ໄດ້ຮັບຈາກວິທີປູກຝັງນີ້ ແມ່ນເພີ່ມຂຶ້ນທົບຫຼາຍເທົ່າ:
”ເມື່ອຜັນຂະຫຍາຍການປະຕິບັດ 6 ເນື້ອໃນ ແລະ 19 ມາດຖານຂອງໂຄງການກໍ່ສ້າງຊົນນະບົດໃໝ່, ທາງຕາແສງກຳນົດໄດ້ຕົ້ນໄມ້ປູກຝັງຕົ້ນຕໍ່ນັ້ນແມ່ນ ກາເຟ ແລະ ຕົ້ນໃຫ້ໝາກ, ພິເສດແມ່ນຕົ້ນໝາກຖົ່ວລຽນ. ຄວາມຈິງແລ້ວ, ປູກສະລັບຕົ້ນໝາກຖົ່ວລຽນ100 ຕົ້ນ/ເຮັກຕາ ສາມາດເກັບກ່ຽວໝາກຖົ່ວລຽນໄດ້ 8 ໂຕນ, ສ້າງລາຍຮັບໄດ້ປະມານ 130 ລ້ານດົ່ງ, ຫາກຳໄລໄດ້ເຖິງ 110 ລ້ານດົ່ງ. ເນື້ອທີ່ດິນແມ່ນຖືກຈຳກັດ, ດັ່ງນັ້ນຕ້ອງປູກສະລັບກັບຕົ້ນໄມ້ອື່ນໆ ເພື່ອເພີ່ມປະສິດທິຜົນຂຶ້ນ.”
ໝາກຖົ່ວລຽນ
(ພາບປະກອບ: ອິນເຕີແນດ)
ບັນດາຜົນທີ່ໄດ້ຮັບສະແດງໃຫ້ເຫັນວ່າ, ເລື່ອງຍົກສູງຄວາມຮູ້ ເພື່ອໃຫ້ປະຊາຊົນຮ່ວມແຮງຮ່ວມໃຈເຂົ້າຮ່ວມພັດທະນາການຜະລິດ, ກໍ່ສ້າງໝູ່ບ້ານ… ນັ້ນແມ່ນຜົນງານທີ່ສຳຄັນໃນການກໍ່ສ້າງຊົນນະບົດໃໝ່ຢູ່ເຂດໄຕງວຽນ. ທ່ານ ຫງວຽນຮູຍບ່າຍ, ປະທານຄະນະກຳມະການປະຊາຊົນຕາແສງ ອີອາກາວ, ນະຄອນບວນມາຖວດ, ເຊິ່ງແມ່ນຕາແສງປະຕິບັດທົດລອງການກໍ່ສ້າງຊົນນະບົດໃໝ່ຂອງແຂວງດັກລັກ, ໃຫ້ຮູ້ວ່າ, ມີການຮ່ວມແຮງຮ່ວມໃຈຂອງປະຊາຊົນ, ໂຄງການກໍ່ສ້າງຊົນນະບົດໃໝ່ຂອງຕາແສງໄດ້ຮັບການຜັນຂະຫຍາຍຢ່າງວ່ອງໄວ:
”ປະຈຸບັນ, ປະຊາຊົນໄດ້ເຂົ້າໃຈແຈ້ງວ່າ: ເມື່ອເປັນຕາແສງຊົນນະບົດໃໝ່ແລ້ວ ກໍ່ຕ້ອງກາຍເປັນຕາແສງວັດທະນະທຳ. ກ່ອນນີ້ປະຊາຊົນເຮັດຕາມລຳພັງໃຈ, ແຕ່ປະຈຸບັນເຂົາເຈົ້າພາກັນເຮັດຕາມລວມໝູ່, ຕາມປະຊາຄົມ. ຕົວຢ່າງຄືເຂົາເຈົ້າພາກັນກໍ່ສ້າງເສັ້ນທາງ, ສ້າງທົ່ງນາທີ່ເປັນແບບຢ່າງ, ດັ່ງນັ້ນຈຶ່ງຮັບປະສິດທິຜົນທີ່ສຸດ”
ທົ່ງນາຂະໜາດໃຫຍ່
(ພາບປະກອບ: ອິນເຕີແນດ)
ຍ້ອນລະດົມກຳລັງແຮງຈາກປະຊາຊົນ, ຂຸດຄົ້ນທ່າແຮງຂອງທ້ອງຖີ່ນຢ່າງເໝາະສົມ, ໂຄງການກໍ່ສ້າງຊົນນະບົດໃໝ່ຢູ່ເຂດໄຕງວຽນ ຈຶ່ງບັນລຸໄດ້ໝາກຜົນທີ່ໜ້າສົ່ງເສີມ. ນອກຈາກບັນດາຜົນງານໃນເບື້ອງຕົ້ນຂອງຫຼາຍບ້ານແລ້ວ. ຢູ່ທິດເໜືອຂອງເຂດໄຕງວຽນ, ມີຕາແສງ ຮ່າມ່ອນ, ແຂວງກອນຕຸມ ໄດ້ກາຍເປັນຕາແສງທຳອິດທີ່ໄດ້ຮັບການຮັບຮູ້ວ່າ ປະຕິບັດສຳເລັດໂຄງການກໍ່ສ້າງຊົນນະບົດໃໝ່, ລາຍຮັບສະເລ່ຍບັນລຸ 38 ລ້ານດົ່ງ/ຄົນ/ປີ. ສ່ວນຢູ່ທິດໃຕ້ເຂດໄຕງວຽນ ກໍ່ມີຕາແສງ ເຕິນໂຫ້ຍ, ເມືອງ ເດິກຈ້ອງ, ແຂວງເລິມດົ່ງ ປະຕິບັດສຳເລັດ 18/19 ມາດຖານຂອງໂຄງການ. ບັນດາຕາແສງທີ່ພົ້ນເດັ່ນນັ້ນ ແມ່ນພະຍານຫຼັກຖານສະແດງໃຫ້ເຫັນວ່າ, ໂຄງການກໍ່ສ້າງຊົນນະບົດໃໝ່ຢູ່ເຂດ ໄຕງວຽນ ພວມໄດ້ຮັບການຜັນຂະຫຍາຍຢ່າງຕັ້ງໜ້າ ແລະ ຈະບັນລຸໄດ້ຜົນງານອັນໃຫຍ່ຫຼວງກວ່າອີກໃນປີ 2013 ນີ້.