(vovworld) - ກອງປະຊຸມຄັ້ງທີ 26 ຂອງຄະນະປະຈຳສະພາແຫ່ງຊາດ ຖືກໄຂຂຶ້ນໃນຕອນເຊົ້າວັນທີ 10/03, ຢູ່ຮ່າໂນ້ຍ, ພາຍໃຕ້ການເປັນປະທານຂອງທ່ານປະທານສະພາແຫ່ງຊາດຫວຽດນາມ ຫງວຽນຊິງຮຸ່ງ. ກ່າວຄຳເຫັນໄຂກອງປະຊຸມ, ທ່ານປະທານສະພາແຫ່ງຊາດ ຫງວຽນຊິງຮຸ່ງ ເນັ້ນໜັກວ່າ ນີ້ແມ່ນກອງປະຊຸມສຳຄັນເພື່ອກະກຽມໃຫ້ກອງປະຊຸມສະໄໝສາມັນເທື່ອທີ 7 ສະພາແຫ່ງຊາດຫວຽດນາມ ຊຸດທີ 13. ທ່ານປະທານສະພາແຫ່ງຊາດສະເໜີໃຫ້ສະມາຊິກຄະນະປະຈຳສະພາແຫ່ງຊາດ ເຮັດວຽກດ້ວຍຈິດໃຈມີໜ້າທີ່ຮັບຜິດຊອບສູງ ໃນບັນດາກອງປະຊຸມ ເພື່ອຮັບປະກັນລັດຖະທຳມະນູນເຂົ້າສູ່ຊີວິດຕົວຈິງ. ທ່ານຫງວຽນຊິງຮຸ່ງ ກ່າວວ່າ.
“ພວກເຮົາພວມກະກຽມໃຫ້ກອງປະຊຸມສະໄໝສາມັນເທື່ອທີ 7 ສະພາແຫ່ງຊາດຫວຽດນາມ ຊຸດທີ 13 ເຊິ່ງໃຫ້ຄຳເຫັນໃສ່ຮ່າງກົດໝາຍຫຼາຍສະບັບ. ຮ່າງກົດໝາຍແຕ່ລະສະບັບ, ທຳອິດແມ່ນຕ້ອງຕິດແທດກັບລັດຖະທຳມະນູນ, ສະນັ້ນ, ຂ້າພະເຈົ້າສະເໜີໃຫ້ບັນດາສະຫາຍໃນອົງການກວດກາ, ອົງການກະກຽມໃນຄະນະປະຈຳສະພາແຫ່ງຊາດ ແລະ ບັນດາສະຫາຍຮອງປະທານສະພາແຫ່ງຊາດ ຊີ້ນຳການສ້າງກົດໝາຍຕ້ອງເຮັດຕາມຈິດໃຈນັ້ນ. ຕ້ອງນຳລັດຖະທຳມະນູນເຂົ້າສູ່ຊີວິດຕົວຈິງ. ບໍ່ອາດປະຕິບັດພ້ອມກັນໄດ້, ແຕ່ຕ້ອງປະຕິບັດຕາມແຕ່ລະຂັ້ນຕອນ, ກົດໝາຍ, ລັດຖະບັນຍັດ, ມະຕິກໍ່ລ້ວນແຕ່ຕິດພັນກັບຈິດໃຈນັ້ນ”.
ພາຍຫຼັງພິທີໄຂ, ຄະນະປະຈຳສະພາແຫ່ງຊາດ ໄດ້ໃຫ້ຄຳເຫັນໃສ່ຮ່າງກົດໝາຍວ່າດ້ວຍການດຳເນີນທຸລະກິດອະສັງຫາລິມະຊັບ (ສະບັບປັບປຸງ). ບັນດາຜູ້ແທນລ້ວນແຕ່ພິຈາລະນາລະອຽດເຖິງຂໍ້ມາດຕາທີ່ກ່ຽວຂ້ອງເຖິງບັນດາກົດໝາຍພວມປະກາດໃຊ້ຄື ກົດໝາຍວ່າດ້ວຍເຮືອນຢູ່ (ສະບັບປັບປຸງ). ປະກອບຄຳເຫັນໃສ່ກົດໝາຍດັ່ງກ່າວ, ທ່ານປະທານສະພາແຫ່ງຊາດ ສະເໜີເຮັດແຈ້ງຄວາມສຳນຶກ “ອະສັງຫາລິມະຊັບ”, ຈາກນັ້ນຈະຫັນເປັນລະອຽດໃນບັນດາຂໍ້ມາດຕາຂອງຮ່າງກົດໝາຍວ່າດ້ວຍການດຳເນີນທຸລະກິດອະສັງຫາລິມະຊັບ (ສະບັບປັບປຸງ) ແລະ ເໝາະສົມກັບກົດໝາຍອື່ນໆ.