(vovworld) - ຕອນເຊົ້າວັນທີ 21 ກັນຍາ, ຢູ່ຮ່າໂນ້ຍ, ກະຊວງວິທະຍາສາດ ແລະ ເຕັກໂນໂລຊີ ສົມທົບກັບກະຊວງອຸດສາຫະກຳ ແລະ ພັດທະນາຊົນນະບົດ, ກຳມາທິການວິທະຍາສາດເຕັກໂນໂລຊີ ແລະ ສິ່ງແວດລ້ອມຂອງສະພາແຫ່ງຊາດ ໄດ້ຈັດກອງປະຊຸມທົ່ວປະເທດ ເພື່ອຕີລາຄາການເຄື່ອນໄຫວວິທະຍາສາດ ແລະ ເຕັກໂນໂລຊີ ເມື່ອປະຕິບັດມະຕິຄັ້ງທີ 7 ຄະນະບໍລິຫານງານສູນກາງພັກຊຸດທີ 10 ກ່ຽວກັບກະສິກຳ, ຊາວກະສິກອນ ແລະ ຊົນນະບົດ. ບັນດາບົດປະກອບຄຳເຫັນທີ່ກອງປະຊຸມຕີລາຄາວ່າໃນ 5 ປີຜ່ານມາ, ການເຄື່ອນໄຫວວິທະຍາສາດ ແລະ ເຕັກໂນໂລຊີບັນດາລຸໄດ້ຜົນງານຫຼາຍຢ່າງ, ໄດ້ປະກອບສ່ວນຢ່າງໃຫຍ່ຫຼວງໃຫ້ແກ່ການພັດທະນາກະສິກຳ, ຊາວກະສິກອນ ແລະ ຊົນນະບົດ. ຍ້ອນນຳໃຊ້ຄວາມກ້າວໜ້າຂອງວິທະຍາສາດ, ເຕັກໂນໂລຊີ, ບັນດາຜະລິດຕະພັນກະສິກຳຈຶ່ງມີສະມັດຕະພາບ, ຄຸນະພາບສູງ, ລາຄາຕໍ່າ. ກ່າວຄຳເຫັນທີ່ກອງປະຊຸມ, ທ່ານປະທານສະພາແຫ່ງຊາດ ຫງວຽນຊິງຮຸ່ງ ຢືນຢັນວ່າ: ໃນໄລຍະແຕ່ 5 – 15 ປີຈະມາເຖິງ, ຂະແໜງກະສິກຳຫວຽດນາມ ຍັງຮັກສາທີ່ຕັ້ງຕົ້ນຕໍ່ໃນການຊຸກຍູ້ການພັດທະນາເສດຖະກິດສັງຄົມ ກໍຄືປະກອບສ່ວນຮັບປະກັນດ້ານສະບຽງອາຫານ, ສະນັ້ນ ຕ້ອງສຸມໃສ່ລົງທຶນໃຫ້ແກ່ການພັດທະນາກະສິກຳ, ຊົນນະບົດ ແລະ ຊາວກະສິກອນ ຕິດພັນກັບການນຳໃຊ້ວິທະຍາສາດເຕັກໂນໂລຊີທີ່ກ້າວໜ້າຢູ່ພາຍໃນປະເທດ ແລະ ຕ່າງປະເທດ; ເພີ່ມທະວີການຍົກສູງລະດັບຄວາມຮູ້ໃຫ້ແກ່ຊາວກະສິກອນ.
“ເຖິງວ່າມີວິທະຍາສາດແລ້ວ, ການພົວພັນລະຫວ່າງຊາວກະສິກອນ ກັບວິສາຫະກິດ, ທະນາຄານ, ລັດ ກັບບັນດານັກວິທະຍາສາດຮ່ວມມືບໍ່ແໜ້ນແຟ້ນ ຈະບໍ່ຮັບຜົນ. ຕ້ອງຈັດຕັ້ງນຳໃຊ້ວິທະຍາສາດເຂົ້າໃນຊີວິດຄືແນວໃດ ກໍ່ແມ່ນບັນຫາຂອງວິທະຍາສາດ ແລະ ບັນດານັກວິທະຍາສາດ. ມະຕິກະສິກຳ, ຊາວກະສິກອນ ແລະ ຊົນນະບົດ,ຕ້ອງເຮັດແນວໃດໃຫ້ກາຍເປັນມະຕິຂອງພັກ, ເປັນກຳລັງແຮງຂອງທັງລະບົບການເມືອງ ເພື່ອນຳເຂົ້າຊີວິດທັງໝົດເຫຼົ່ານັ້ນແມ່ນຕ້ອງມີປັດໄຈວິທະຍາສາດ, ເຕັກໂນໂລຊີ. ວິທະຍາສາດ ແລະ ເຕັກໂນໂລຊີ ຕ້ອງໄດ້ຮັບການນຳໃຊ້ຢ່າງຖືກຕ້ອງ ເພື່ອໂຄສະນາ, ແນະນຳ ຄືແນວໃດໃຫ້ຊາວກະສິກອນຕອບສະໜອງ, ນຳມາເຊິ່ງປະສິດທິຜົນໃຫ້ແກ່ຊາວກະສິກອນ. ນີ້ກໍ່ແມ່ນໜ້າທີ່ຂອງບັນດານັກວິທະຍາສາດ.”