ກອງປະຊຸມສຳມະນາໂຕະມົນ: ”ປັບປຸງການພົວພັນ ຍີ່ປຸ່ນ - ຫວຽດນາມ”
(ກອງປະຊຸມສຳມະນາໂຕະມົນ: ”ປັບປຸງການພົວພັນຍີ່ປຸ່ນ - ຫວຽດນາມ”)
(vovworld) - ສາຍພົວພັນຫວຽດນາມ - ຍີ່ປຸ່ນໃນໄລຍະຜ່ານມາ, ພິເສດແມ່ນການຢ້ຽມຢາມຍີ່ປຸ່ນທາງລັດຖະກິດຂອງທ່ານປະທານປະເທດຫວຽດນາມ ເຈືອງເຕິ໋ນຊາງ ໄດ້ຮັບຄວາມສົນໃຈ ແລະ ຕີລາຄາສູງຈາກຫາງສຽງ. ວັນທີ 21/3, ສູນຄົ້ນຄ້ວາຫວຽດນາມ ແລະ ອາຊຽນ ສົມທົບກັບສູນຄົ້ນຄ້ວາຍີ່ປຸ່ນທີ່ຂຶ້ນກັບສະຖາບັນຕາເວັນອອກໄກ, ສະພາມະຫາບັນດິດວິທະຍາລັດເຊຍ ໄດ້ຈັດຕັ້ງ ກອງປະຊຸມສຳມະນາໂຕະມົນ: ”ປັບປຸງການພົວພັນຍີ່ປຸ່ນ - ຫວຽດນາມຄືດັ່ງປັດໃຈຄວາມສະຫງົບປອດໄພຢູ່ຕາເວັນອອກໄກ ” ເພື່ອໃຫ້ບັນດານັກຄົ້ນຄ້ວາພ້ອມກັນແບ່ງປັນທັດສະນະ, ໄຈ້ແຍກ, ຕີລາຄາກ່ຽວກັບບົດບາດຂອງການພົວພັນສອງປະເທດໃນພາກພື້ນ ແລະ ໂລກ. ກ່ຽວກັບຄວາມສຳຄັນຂອງສາຍພົວພັນຫວຽດນາມ - ຍີ່ປຸ່ນ, ດຣ V.Kuzminkov, ນັກວິທະຍາສາດສູນຄົ້ນຄ້ວາຍີ່ປຸ່ນຂອງສະຖາບັນຕາເວັນອອກໄກ, ໃຫ້ຂໍ້ສັງເກດວ່າ:
”ຂ້າພະເຈົ້າຖືວ່າ, ການພົວພັນຄູ່ຮ່ວມມືຍຸດທະສາດທີ່ເລິກເຊິ່ງ, ກວ້າງຂວາງ ເຊິ່ງຫາກໍ່ໄດ້ຮັບການສ້າງຕັ້ງລະຫວ່າງຍີ່ປຸ່ນ - ຫວຽດນາມ ບໍ່ພຽງແຕ່ສະແດງອອກໃນແງ່ມູມຄວາມສະຫງົບປອດໄພເທົ່ານັ້ນ, ຫາກຍັງສະແດງໃຫ້ເຫັນຢ່າງຈະແຈ້ງໃນຂົງເຂດຮ່ວມມືທາງດ້ານເສດຖະກິດອີກດ້ວຍ. ຍີ່ປຸ່ນຖືການເປີດກວ້າງການຮ່ວມມືກັບຫວຽດນາມເປັນສຳຄັນ”.
ບັນດາບັນຫາທີ່ຍົກອອກມາໃນກອງປະຊຸມສຳມະນາລ້ວນແຕ່ມີຂໍ້ສັງເກດລວມວ່າ, ການເພີ່ມທະວີການພົວພັນຮ່ວມມືລະຫວ່າງຫວຽດນາມ - ຍີ່ປຸ່ນ ແມ່ນໜຶ່ງໃນບັນດາເງື່ອນໄຂເພື່ອຮັບປະກັນຄວາມສະຫງົບປອດໄພໃນພາກພື້ນ ແລະ ຊຸກຍູ້ການພັດທະນາເສດຖະກິດ ເພື່ອຜົນປະໂຫຍດລວມຂອງສອງປະເທດ, ພາກພື້ນ ແລະ ໂລກ.