Festival Hue ກຽມພ້ອມບັນດາການເຄື່ອນໄຫວດ້ານວັດທະນະທຳ
(ພາບ:tapchibaohiemxahoi.gov.vn)
( vovworld ) – ໂດຍສືບຕໍ່ບັນດາການເຄື່ອນໄຫວໃນງານບຸນ Festival Hue 2012, ຕອນເຊົ້າວັນທີ 9/4, ທີ່ນະຄອນ Hue ໄດ້ຈັດການພົບປະສົນທະນາກ່ຽວກັບ “ການທູດວັດທະນະທຳ: ຊ່ວຍທ້ອງຖິ່ນພັດທະນາແບບຍືນຍົງ ແລະ ເຊື່ອມໂຍງເຂົ້າກັບໂລກ“ ໂດຍກະຊວງການຕ່າງປະເທດຫວຽດນາມ ສົມທົບກັບຄະນະກຳມະການປະຊາຊົນແຂວງ Thua Thien Hue ຈັດຕັ້ງຂຶ້ນ. ທີ່ການພົບປະສົນທະນາ, ບັນດາທ່ານເອກອັກຄະລັດຖະທູດ, ທູຕານຸທູດປະເທດຕ່າງໆປະຈຳຫວຽດນາມ ໄດ້ແບ່ງປັນບັນດາປະສົບການ, ບົດຮຽນທີ່ມີຄ່າໃນການອະນຸລັກຮັກສາ, ເສີມຂະຫຍາຍມໍລະດົກ; ຊຸກຍູ້ການພົບປະແລກປ່ຽນ, ການຮ່ວມມືລະຫ່ວາງປະເທດຕ່າງໆກັບແຂວງ Thua Thien Hue ເພື່ອແນໃສ່ໂຄສະນາເຄື່ອງໝາຍການຄ້າຂອງທ້ອງຖິ່ນອອກສູ່ພາກພື້ນ ແລະ ໂລກ. ທ່ານ Saadi Salama ເອກອັກຄະລັດຖະທູດ Palestin ປະຈຳຫວຽດນາມ ຖືວ່າ: “ໃນຖານະແມ່ນຊາວ Palestin ຜູ້ໜຶ່ງ ທີ່ໄດ້ດຳລົງຊີວິດ ແລະ ເຮັດວຽກຢູ່ຫວຽດນາມ, ຂ້າພະເຈົ້າຖືວ່າ, ຫວຽດນາມຄວນມານະພະຍາຍາມຍູ້ແຮງການພົວພັນດ້ານວັດທະນະທຳກັບປະເທດຕ່າງໆໃນໂລກ ຍ້ອນວ່າ ວັດທະນະທຳແມ່ນພື້ນຖານຢ່າງໜັກແໜ້ນ ເພື່ອເປີດກ້ວາງການພົວພັນດ້ານເສດຖະກິດ ແລະ ພັດທະນາປະເທດຊາດ. ຂ້າພະເຈົ້າຄິດວ່າ Festival Hue ຄັ້ງນີ້ ກໍ່ແມ່ນການພິສູດໃຫ້ເຫັນຄວາມມານະພະຍາຍາມຂອງຫວຽດນາມ ໃນການໂຄສະນາວັດທະນະທຳຫວຽດນາມ. ສ່ວນພວກຂ້າພະເຈົ້າກໍພ້ອມແລ້ວທີ່ຈະຊ່ວຍເຫຼືອຫວຽດນາມ ແລະ ສົ່ງບັນດາຄະນະສີລະປະກອນມາຫວຽດນາມ“
ກ່າວຄຳເຫັນທີ່ການພົບປະສົນທະນາ, ທ່ານຮອງລັດຖະມົນຕີການຕ່າງປະເທດຫວຽດນາມ Nguyen Thanh Son ໃຫ້ຮູ້ວ່າ: ໃນຊຸມປີຜ່ານມາ, ພ້ອມກັບທ່າອຽງສັນຕິພາບ, ການຮ່ວມມື ແລະ ພັດທະນາໃນໂລກ, ວຽກງານການທູດວັດທະນະທຳຂອງຫວຽດນາມ ນັບມື້ນັບໄດ້ຮັບການຍູ້ແຮງຕາມຈິດໃຈຕັ້ງໜ້າ, ເຊື່ອມໂຍງເຂົ້າກັບໂລກ, ເປີດກ້ວາງການພົວພັນຕ່າງປະເທດ, ປະກອບສ່ວນໂຄສະນາພາບພົດປະເທດຊາດ, ວັດທະນະທຳ ແລະ ຊາວຫວຽດນາມ.