ທ່ານນາຍົກລັດຖະມົນຕີ ລາວ ທອງສິງ ທຳມະວົງ
ຕ້ອນຮັບທ່ານ ຮ່າຮຸ່ງເກື່ອງ
(ພາບ: moj.gov.vn)
(vovworld) – ຕອນເຊົ້າວັນທີ 25/12, ຢູ່ສຳນັກງານຫ້ອງວ່າການລັດຖະບານ ລາວ, ທ່ານນາຍົກລັດຖະມົນຕີ ລາວ ທອງສິງ ທຳມະວົງ ໄດ້ໃຫ້ການຕ້ອນຮັບຄະນະຜູ້ແທນຂັ້ນສູງກະຊວງຍຸຕິທຳ ຫວຽດນາມ ໂດຍທ່ານ ຮ່າຮຸ່ງເກື່ອງ ລັດຖະມົນຕີວ່າການກະຊວງຍຸຕິທຳ ຫວຽດນາມ ນຳໜ້າ ພວມມີການຢ້ຽມຢາມ ແລະ ເຮັດວຽກຢູ່ ລາວ. ທີ່ການຕ້ອນຮັບ, ທ່ານ ລັດຖະມົນຕີ ຮ່າຮຸ່ງເກື່ອງ ໃຫ້ຮູ້ວ່າ: ກະຊວງຍຸຕິທຳ ຫວຽດນາມ ພ້ອມແລ້ວທີ່ຈະໜູນຊ່ວຍວຽກງານກໍ່ສ້າງແຫຼ່ງຊັບພະຍາກອນມະນຸດ, ພິເສດແມ່ນແຫຼ່ງຊັບພະຍາກອນມະນຸດຄຸນນະພາບສູງໃນຂົງເຂດກົດໝາຍ ແລະ ຍຸຕິທຳ ໃຫ້ລາວ. ທ່ານລັດຖະມົນຕີ ຮ່າຮຸ່ງເກື່ອງ ປາດຖະໜາວ່າ: ລັດຖະບານ ລາວ ສະໜັບສະໜູນກະຊວງຍຸຕິທຳ ລາວ ໃນການສົມທົບກັບກະຊວງຍຸຕິທຳ ຫວຽດນາມ ຜັນຂະຫຍາຍການປະຕິບັດໂຄງການນີ້ຢ່າງມີປະສິດທິຜົນ.
ສ່ວນທ່ານ ນາຍົກລັດຖະມົນຕີ ທອງສິງ ທຳມະວົງ ກໍ່ຕີລາຄາສູງໝາກຜົນແຫ່ງການຮ່ວມມືອັນດີງາມລະຫວ່າງກະຊວງຍຸຕິທຳ 2 ປະເທດໃນໄລຍະຜ່ານມາ, ປະກອບສ່ວນຊຸກຍູ້ການພົວພັນຮ່ວມມືແບບພິເສດຮອບດ້ານ ຫວຽດນາມ - ລາວ ໃນທຸກຂົງເຂດໃຫ້ນັບມື້ນັບເຂົ້າສູ່ລວງເລິກ, ແທດຈິງ ແລະ ມີປະສິດທະຜົນກ່ວາອີກ.
ໃນລະຫວ່າງວັນທີ 25 – 26/12, ທ່ານພົນເອກ ຟູ່ງກວາງແທງ ຮອງເລຂາຄະນະພັກການທະຫານສູນກາງ, ລັດຖະມົນຕີວ່າການກະຊວງປ້ອງກັນປະເທດ ນຳໜ້າຄະນະຜູ້ແທນຂັ້ນສູງທະຫານ ຫວຽດນາມ ຢ້ຽມຢາມມິດຕະພາບ ລາວ ຢ່າງເປັນທາງການ ຕາມຄຳເຊີນຂອງທ່ານພົນໂທ ແສງນວນ ໄຊຍະລາດ, ເລຂາສູນກາງພັກ, ລັດຖະມົນຕີວ່າການກະຊວງປ້ອງກັນປະເທດ ລາວ. ໃນໄລຍະເວລາຢ້ຽມຢາມ ແລະ ເຮັດວຽກຢູ່ ລາວ, ຄະນະຜູ້ແທນຂັ້ນສູງທະຫານ ຫວຽດນາມ ພົບປະເຈລະຈາກັບຄະນະຜູ້ແທນຂັ້ນສູງທະຫານປະຊາຊົນ ລາວ ແລະ ລົງນາມໃນແຜນການຮ່ວມມືປີ 2016 ລະຫວ່າງ 2 ກະຊວງປ້ອງກັນປະເທດ.