(vovworld) – ຕອນຄໍ່າວັນທີ 9/7, ຢູ່ຮ່າໂນ້ຍ, ໃນຂອບເຂດການຢ້ຽມຢາມສັນຖະວະໄມຕີຫວຽດນາມ ຂອງທ່ານປະທານສະພາແຫ່ງລັດ ແລະ ສະພາລັດຖະມົນຕີ ສ.ກຸຍບາ, ເລຂາທີ 1 ຄະນະບໍລິຫານງານສູນກາງພັກກອມມູນິດ ກຸຍບາ Raul Castro, ທ່ານລັດຖະມົນຕີວ່າການກະຊວງການຕ່າງປະເທດສ.ກຸຍບາ Brono Rodriguez Parrilla ໄດ້ມີການພົບປະກັບທ່ານລັດຖະມົນຕີວ່າການກະຊວງການຕ່າງປະເທດຫວຽດນາມ Pham Binh Minh. ທີ່ການພົບປະ, ທ່ານລັດຖະມົນ Pham Binh Minh ໄດ້ຢືນຢັນວ່າ ກະຊວງການຕ່າງປະເທດຫວຽດນາມ ຈະສືບຕໍ່ຮ່ວມມືກັບກະຊວງການຕ່າງປະເທດກຸຍບາ ຢ່າງແໜ້ນແຟ້ນ, ປະຕິບັດບັນດາທິດທາງໃຫຍ່ຢ່າງຕັ້ງໜ້າ ເຊິ່ງການນຳຂັ້ນສູງຂອງສອງປະເທດໄດ້ເຫັນດີເປັນເອກະພາບໃນບັນດາການໂອ້ລົມສົນທະນາ ແລະ ພົບປະເຈລະຈາ ເພື່ອແນໃສ່ເພີ່ມທະວີສາຍພົວພັນອັນດີງາມລະຫວ່າງຫວຽດນາມ ແລະ ກຸຍບາ ຢ່າງຮອບດ້ານ. ລັດຖະມົນຕີວ່າການທັງສອງທ່ານ ໄດ້ແລກປ່ຽນ, ເປັນເອກະພາບນຳກັນໃນບັນດາມາດຕະການສົມທົບກັນເພີ່ມທະວີການຢ້ຽມຢາມ, ການພົບປະຂັ້ນສູງ ແລະ ຊຸກຍູ້ການແລກປ່ຽນຄະນະຜູ້ແທນທຸກຂັ້ນລະຫວ່າງພັກ, ລັດ, ລັດຖະບານ, ສະພາແຫ່ງຊາດ, ກະຊວງ, ຂະແໜງການ ແລະ ບັນດາອົງການການເມືອງສັງຄົມຂອງສອງປະເທດ. ກ່ຽວກັບການຮ່ວມມືລະຫວ່າງກະຊວງການຕ່າງປະເທດ, ສອງຝ່າຍໄດ້ເຫັນດີດຳເນີນວາລະຄົ້ນຄວ້າປຶກສາຫາລືການເມືອງປະຈຳປີໃນທ້າຍປີ 2012 ຢູ່ La Habana (ກຸຍບາ).