ທ່ານເລຂາທິການ​ໃຫ່ຍ Nguyen Phu Trong ແລະ ທ່ານ​ນາຍົກລັດຖະມົນຕີ ສິງ​ກະ​ໂປ ຫລີ​ຊຽນຫລົງ ພາບ:TTXVN

(vovworld) - ຕອນ​ບ່າຍ​ວັນ​ທີ 12/9, ທ່ານເລຂາທິການ​ໃຫ່ຍຄະນະ​ບໍລິຫານ​ງານ​ສູນ​ກາງ​ພັກ​ກອມ​ມູນິດ​ຫວຽດນາມ ​Nguyen Phu Trong ພວມ​ຢູ່​ຢ້ຽມຢາມ​ສິງກະ​ໂປ ​ໄດ້​ດຳ​ເນີນ​ການ​ເຈລະຈາ​ກັບ​ທ່ານ​ນາຍົກລັດຖະມົນ​ຕີ ສິງກະ​ໂປ ຫລີ​ຊຽນຫລົງ. ທ່ານເລຂາທິການ​ໃຫ່ຍ ​Nguyen Phu Trong ​ຢືນຢັນ​ວ່າ: ຍາມ​ໃດ ຫວຽດນາມ ກໍ​ຖື​ເປັນ​ສຳຄັນ ​ແລະ ປາດ​ຖະຫນາ​ຢາກເພີ່ມ​ທະວີ​ຊຸກຍູ້​ການຮ່ວມ​ມື​ຮອບດ້ານ​ກັບ​ບັນດາ​ປະ​ເທດ​ພາກ​ພື້ນ ອາ​ຊຽນ, ​ໃນ​ນັ້ນ ມີ​ສິງກະ​ໂປ. ທ່ານເລຂາທິການ​ໃຫ່ຍ ​Nguyen Phu Trong ​ແລະ ທ່ານ​ນາຍົກລັດ​ຖະມົນຕີ ສິງກະ​ໂປ ຫລີ​ຊຽນຫລົງ ​ໄດ້​ເຫັນ​ດີ​ເປ​ັນ​ເອກະສັນ​ນຳ​ກັນ​ກ່ຽວ​ກັບ​ແຜນ​ນະ​ໂຍບາຍ​ຍົກການ​ພົວພັນ​ລະຫວ່າງ​ສອງ​ປະ​ເທດ​ໃຫ້​ຂຶ້ນ​ສູ່​ລະດັບ​ຄູ່​ຮ່ວມ​ມື​ຍຸດ​ທະ​ສາດ. ຜູ້ນຳ​ທັງ​ສອງ​ທ່ານ​ຖື​ວ່າ: ສອງ​ຝ່າຍ​ຄວນ​ເສີມ​ຂະຫຍາຍ​ການ​ປະຕິບັດ​ສັນຍາ​ແມ່​ເຊື່ອມ​ຕໍ່​ສອງ​ພື້ນຖານ​ເສດຖະກິດ ຫວຽດນາມ ​ແລະ ສິງກະ​ໂປ​ຢ່າງ​ຄົບ​ຖ້ວນ, ມີ​ປະສິດທິ​ຜົນ​ກວ່າ. ກ່ຽວ​ກັບ​ບັນຫາ​ສາກົນ, ສອງ​ຝ່າຍ​ເຫັນ​ດີ​​ນຳ​ກັນໂດຍຖື​ວ່າ: ຫວຽດນາມ ​ແລະ ສິງກ​ະ​ໂປ ພ້ອມ​ກັບ​ບັນດາ​ປະ​ເທດ​ສະມາຊິກ ອາ​ຊຽນ ຄວນ​ເພີ່ມ​ທະວີ​ຄວາມ​ສາມັກຄີ ​ແລະ ການ​ຮ່ວມ​ມື​​ໃນ​ການຮັກສາ​ບົດ​ບາດ​ໃຈກາງ​ຂອງ​ອາຊຽນ ​ໃນ​ໂຄງ​ປະກອບ​ພາກ​ພື້ນພວມ​ຖືກ​ສ້າງ​ເປັນ​ຮູບ​ການ, ສ້າງ​ປະຊາ​ຄົມ​ອາ​ຊຽນ ສາມັກຄີ, ​​ເຂັ້ມ​ແຂງ​ໃນ​ປີ 2015. ພາຍຫລັງ​ການ​ເຈລະຈາ, ທ່ານເລຂາທິການ​ໃຫ່ຍ ​Nguyen Phu Trong  ​ແລະ ທ່ານ​ນາຍົກລັດຖະມົນຕີ ສິງ​ກະ​ໂປ ຫລີ​ຊຽນຫລົງ ​ໄດ້​ເປັນ​ສັກ​ຂີພິຍານພິທີ​ລົງ​ນາມ​ໃນ​ເອກະສານ​ຮ່ວມ​ມື 3 ສະບັບ ​ແລະ ອອກ​ຖະ​ແຫລ​ງການ​ຮ່ວມ. ຕອນ​ຄຳ່​ວັນ​ດຽວ​ກັນ, ທ່ານ​ນາຍົກລັດຖະມົນຕີ ຫລີ​ຊຽນຫລົງ​ໄດ້​ຈັດ​ງານ​ລ້ຽງ​ຮັບຮອງ​ ທ່ານເລຂາທິການ​ໃຫ່ຍ ​Nguyen Phu Trong ​ແລະ ຄະນະ​ຜູ້​ແທນ​ຂັ້ນ​ສູງ ຫວຽດນາມ. ກ່າວ​ຄຳ​ເຫັນນະ​ທີ່​ນີ້, ທ່ານ​ນາຍົກລັດຖະມົນຕີ ສິງກະ​ໂປ ຫລີ​ຊຽນຫລົງ ​ໄດ້​ເນັ້ນ​ຫນັກ​ວ່າ:

        “ປີ 2013 ພວກ​ເຮົາ​ຈະ​ຈັດ​ຕັ້ງ​ການສະ​ເຫລີ​ມສະຫລອງ 40 ປີ​ແຫ່ງ​ວັນ​ສ້າງ​ຕັ້ງ​ສາຍ​ພົວພັນ​ທາງ​ການ​ທູດ​ລະຫວ່າງ​ສອງ​ປະ​ເທດ. ຂ້າພະ​ເຈົ້າ​ປາດ​ຖະຫນາ​ຢາກ​ຍົກ​ການ​ພົວພັນ​ນີ້​ຂຶ້ນ​ສູ່​ລະດັບ​ຄູ່​ຮ່ວມ​ມື​ຍຸດ​ທະ​ສາດ.  ສິ່ງ​ດັ່ງກ່າວ​ຈະ​ປັບປຸງ​ສາຍ​ພົວພັນ​ທີ່​ມີ​ຢູ່​ແລ້ວ​ລະຫວ່າງ​ສອງ​ປະ​ເທດ​ໃນ​ປະຈຸ​ບັນ ​ແລະ ຢືນຢັນ​ຄຳ​ໝັ້ນ​ສັນຍາ ຈະ​​ເຮັດ​ໃຫ້ການຮ່ວມ​ມື​ ລະຫວ່າງ​ສອງ​ປະ​ເທດ​​ໃຫ້ແຫນ້ນ​ແຟ້ນກວ່າ​. ຫວຽດນາມ ​ແລະ ສິງກະ​ໂປ​ ຍັງມີ​ການ​ພົວພັນ​ຄູ່​ຮ່ວມ​ມື​ທີ່ີມີ​ລັກສະນະ​ສ້າງສັນ​ໃນ​ອາ​ຊຽນ ​ແລະ ບັນດາ​ເວທີ​ປາ​ໄສ​ສາກົນ.”

        ສ່ວນ​ທ່ານ​ເລຂາທິການ​ໃຫຍ່ Nguyen Phu Trong ​​ໄດ້ຢືນຢັນ​ວ່າ: ຫວຽດນາມ ໝັ້ນ​ໝາຍ ​ເປັນ​ເຈົ້າ​ການ, ຕັ້ງຫນ້າປະກອບສ່ວນຈົນສຸດ​ຄວາມ​ສາມ​າດຂອງ​ຕົນ​ເພື່ອ​ຈຸດໝາຍ​ລວມຂອງ ອາ​ຊຽນ. ກ່ຽວ​ກັບ​ການ​ພົວພັນ​ລະຫວ່າງ​ສອງ​ປະ​ເທດ, ທ່ານ​ເລຂາ​ທິການ​ໃຫຍ່ Nguyen Phu Trong ​ໃຫ້​ຮູ້​ວ່າ:

        “ຍາມ​ໃດພວກ​ເຮົາ​ກໍ​ສະ​ແດງ​ຄວາມ​ຮູ້​ບຸນຄຸນ​ອັນ​ເລິກ​ເຊິ່ງຕໍ່​ການ​ຮ່ວມ​ມື, ຊ່ວຍ​ເຫລືອ​ຂອງ​ເພື່ອນ​ມິດສາ​ກົນ, ​ໃນ​ນັ້ນ ມີ​ສິງກະ​ໂປ. ພວກ​ຂ້າພະ​ເຈົ້າ​ມີ​ຄວາມ​ປິ​ຕິ​ຊົມ​ຊື່ນ​ທີ່ເຫັນ​ວ່າ ​ໃນ​ຊຸມ​ປີຜ່ານມາ​ການ​ພົວພັນ​ລະຫວ່າງ​ສອງ​ປະ​ເທດ​ນັບ​ມື້​ນັບ​ພັດທະນາ​ໃນ​ຫລາຍ​ຂົງ​ເຂດ ​ແລະ ສິງກະ​ໂປ​ແມ່ນ​ນັກ​ລົງທຶນ ​ແລະ ຄູ່​ຮ່ວມ​ມື​ດ້ານ​ການ​ຄ້າ​ອັນ​ດັບ​ຫນຶ່ງ​ຂອງ ຫວຽດນາມ.”