(vovworld) - ຕອນເຊົ້າວັນທີ 2/2, ນະຄອນ ໂຮ່ຈີມິນ ໄດ້ຈັດພິທີສະເຫຼີມສະຫຼອງ 83 ປີແຫ່ງວັນສ້າງຕັ້ງພັກກອມມູນິດ ຫວຽດນາມ (3/2/1930 – 3/2/2013), ແລະ ສະເຫຼີມສະຫຼອງ 45 ປີແຫ່ງການບຸກໂຈມຕີຄັ້ງໃຫຍ່ ແລະ ລຸກຮືຂຶ້ນໃນລະດູບານໃໝ່ 1968 ຂຶ້ນຢ່າງສົມກຽດ. ເຂົ້າຮ່ວມພິທີສະເຫຼີມສະຫຼອງ ມີອະດິດປະທານປະເທດ ຫງວຽນມິນຈຽດ, ທ່ານ ເລແທງຫາຍ, ກຳມະການກົມການເມືອງ, ເລຂາຄະນະພັກນະຄອນ ໂຮ່ຈີມິນ, ພົນເອກ ເຈີນດ້າຍກວາງ, ລັດຖະມົນຕີກະຊວງຕຳຫຼວດ, ທ່ານ ຮິ່ງດາມ, ປະທານຄະນະກຳມະການສູນກາງແນວໂຮມປະເທດຊາດຫວຽດນາມ ແລະ ຜູ້ແທນເຂົ້າຮ່ວມເປັນຈຳນວນຫຼວງຫຼາຍ... ກ່າວສູນທອນພົດນະພິທີ, ທ່ານ ເລແທງຫາຍ, ກຳມະການກົມການເມືອງ, ເລຂາຄະນະພັກນະຄອນ ໂຮ່ຈີມິນ ໄດ້ທົບທວນຄືນໄລຍະທາງແຫ່ງປະຫວັດສາດ 83 ປີຂອງພັກກອມມູນິດ ຫວຽດນາມ ແລະ 45 ປີແຫ່ງການບຸກໂຈມຕີຄັ້ງໃຫຍ່ ແລະ ລຸກຮືຂຶ້ນໃນລະດູບານໃໝ່ 1968, ພາຍໃຕ້ການນຳພາຂອງພັກ, ນະຄອນ ໂຮ່ຈີມິນໄດ້ຜ່ານຜ່າທຸກໆຄວາມຫຍຸ້ງຍາກ, ການທ້າທາຍ, ນຳລະດັບເຕີບໂຕດ້ານເສດຖະກິດໃຫ້ສູງກ່ວາລະດັບສະເລ່ຍຂອງທົ່ວປະເທດ. ທ່ານ ເລແທງຫາຍ ເນັ້ນໜັກວ່າ:
“ປີນີ້ແມ່ນປີບານພັບຂອງການປະຕິບັດມະຕິກອງປະຊຸມໃຫຍ່ຄັ້ງທີ 11 ຂອງ ພັກ ແລະ ມະຕິກອງປະຊຸມໃຫຍ່ຄັ້ງທີ 9 ຂອງອົງຄະນະພັກນະຄອນ. ປະຊາຊົນເຊື່ອໝັ້ນ, ຄອຍຖ້າ ແລະ ຮຽກຮ້ອງໃຫ້ພວກເຮົາ ຍົກສູງລະສະນະປະຈັນບານ, ເປັນແບບຢ່າງ. ພວກເຮົາພ້ອມກັນຮັກສາ, ເສີມຂະຫຍາຍບັນດາຜົນງານ ແລະ ມູນເຊື້ອການປະຕິວັດໄວ້ຢ່າງໝັ້ນຄົງ, ໝັ້ນໝາຍສືບຕໍ່ອອກແຮງກໍ່ສ້າງ ແລະ ພັດທະນານະຄອນໃຫ້ຈະເລີນຮຸ່ງເຮືອງ, ທັນສະໄໝ, ກ້າວຂຶ້ນສັງຄົມນິຍົມຢ່າງໝັ້ນຄົງ”
ແລະກໍ່ເນື່ອງໃນໂອກາດນີ້, ໃນຕອນຄຳ່ວັນທີ 1/ 2 ຢູ່ຮ່າໂນ້ຍ, ກະຊວງວັດທະນະທຳ, ກິລາ ແລະ ການທ່ອງທ່ຽວ ໄດ້ຈັດຕັ້ງລາຍການສະແດງສິລະປະ ທີ່ມີຫົວຂໍ້ວ່າ: “ພັກໃນການດຳລົງຊີວິດປະຈຸບັນ” .
ໃນຕອນຄຳ່ວັນທີ 2/2 ຢູ່ ຮ່າໂນ້ຍ ກໍ່ໄດ້ຈັດຕັ້ງລາຍການພົບປະແລກປ່ຽນ, ສະແດງສິລະປະດົນຕີພິເສດ ທີ່ມີຫົວຂໍ້ວ່າ “ເຊື່ອໝັ້ນພັກຕະຫຼອດໄປ”.