(vovworld) - ໂດຍໄດ້ຮັບຄຳເຊື້ອເຊີນຂອງພັກປະຊາຊົນປະຕິວັດລາວ ແລະ ປະເທດ ສປປ ລາວ, ວັນທີ 17/7, ກຳມະການກົມການເມືອງ, ຜ້ປະຈຳການຄະນະເລຂາ Le Hong Anh ໄດ້ນຳໜ້າຄະນະຜູ້ແທນຂັ້ນສູງຫວຽດນາມ ເດີນທາງໄປຢ້ຽມຢາມ ສປປ ລາວ ຢ່າງເປັນທາງການ ແລະ ເຂົ້າຮ່ວມງານໂຮມຊຸມນຸມມິດຕິງສະເຫຼີມສະຫຼອງ 35 ປີແຫ່ງວັນເຊັນສົນທິສັນຍາມິດຕະພາບ ແລະ ການຮ່ວມມື ແລະ 50 ປີແຫ່ງວັນສ້າງຕັ້ງສາຍພົວພັນທາງການທູດຫວຽດນາມ - ລາວ. ເມື່ອໄປຮອດນະຄອນຫຼວງວຽນຈັນ, ທ່ານ Le Hong Anh ໄດ້ມີການພົບປະເຈລະຈາກັບທ່ານນາຍົກລັດຖະມົນຕີລາວ ທອງສິງ ທຳມະວົງ. ທ່ານນາຍົກລັດຖະມົນຕີ ລາວ ທອງສິງ ທຳມະວົງ ສະແດງຄວາມເຊື່ອໝັ້ນວ່າການຢ້ຽມຢາມ ລາວ ຂອງຄະນະຜູ້ແທນຂັ້ນສູງຫວຽດນາມ ຄັ້ງນີ້ກົງກັບໂອກາດສະເຫຼີມສະຫຼອງທີ່ມີຄວາມໝາຍສຳຄັນເຂົ້າໃນການພົວພັນມິດຕະພາບທີ່ເປັນມູນເຊື້ອ, ຄວາມສາມັກຄີມິດຕະພາບແບບພິເສດ, ປະກອບສ່ວນສຳຄັນໃນການເພີ່ມພູນຄູນສ້າງຄວາມສາມັກຄີແບບພິເສດລະຫວ່າງ 2 ປະເທດ.
ກຳມະການກົມການເມືອງ Le Hong Anh ແລະ ທ່ານນາຍົກລັດຖະມົນຕີລາວ ທອງສິງ ທຳມະວົງ
(ພາບ: Thong Nhat/ ສຳນັກຂ່າວສານຫວຽດນາມ)
ພັກ, ລັດ ແລະ ປະຊາຊົນ ລາວ ຍາມໃດຮັບຮູ້ການສະໜັບສະໜູນ, ການຊ່ວຍເຫຼືອອັນໃຫຍ່ຫຼວງ, ສຸດຈິດສຸດໃຈໃນພາລະກິດຕໍ່ສູ້ປົດປ່ອຍຊາດໃນເມື່ອກ່ອນ, ກໍຄືໃນພາລະກິດປ່ຽນໃໝ່, ສ້າງສາປະເທດຄືປະຈຸບັນຂອງພັກ, ລັດ ແລະ ປະຊາຊົນຫວຽດນາມ. ທ່ານນາຍົກລັດຖະມົນຕີ ທອງສິງ ທຳມະວົງ ເນັ້ນໜັກວ່າ: ລັດຖະບານ ລາວ ຈະຊີ້ນຳບັນດາກະຊວງ, ຂະແໜງການ, ທ້ອງຖິ່ນ ລາວ ປະຕິບັດບັນດາຂໍ້ຕົກລົງຂັ້ນສູງລະຫວ່າງ 2 ພັກ, 2 ລັດ ຢ່າງມີປະສິດທິຜົນ. ທ່ານ Le Hong Anh ໄດ້ຢັ້ງຢືນອີກເທື່ອໜຶ່ງແນວທາງນະໂຍບາຍຢ່າງສະເໝີຕົ້ນສະເໝີປາຍ ຂອງຫວຽດນາມ ແມ່ນຍາມໃດກໍຖືເປັນສຳຄັນ ແລະ ເຮັດຈົນສຸດຄວາມສາມາດຂອງຕົນພ້ອມກັບຝ່າຍລາວ, ຮັກສາ ແລະ ເພີ່ມພູນຄູນສ້າງສາຍພົວພັນມິດຕະພາບທີ່ເປັນມູນເຊື້ອ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານລະຫວ່າງ 2 ພັກ, 2 ລັດ ແລະ ປະຊາຊົນ 2 ປະເທດຂຶ້ນສູ່ລະດັບສູງໃໝ່, ເພື່ອຄວາມວັດທະນາຖາວອນ, ເພື່ອສັນຕິພາບ, ສະຖຽນລະພາບ, ຮ່ວມມື ແລະ ພັດທະນາໃນພາກພື້ນ ແລະ ຢູ່ໃນໂລກ. ການນຳທັງ 2 ໄດ້ເປັນເອກະພາບຕີລາຄາວ່າເ ໃນໄລຍະຜ່ານມາ, ການພົວພັນລະຫວ່າງ 2 ປະເທດໄດ້ຮັບການປັບປຸງຢ່າງບໍ່ຢຸດຢັ້ງ. ພິເສດ, ການສົມທົບກັນຢ່າງແໜ້ນແຟ້ນລະຫວ່າງລັດຖະບານ 2 ປະເທດ ໃນການຜັນຂະຫຍາຍປະຕິບັດບັນດາສັນຍາທີ່ໄດ້ຮັບການລົງນາມແລ້ວ, ສະແດງຄວາມເຊື່ອໝັ້ນວ່າ ລັດຖະບານ 2 ປະເທດ ສືບຕໍ່ຜັນຂະຫຍາຍຢ່າງແຮງ ແລະ ມີປະສິດທິຜົນບັນດາສັນຍາ ເຊິ່ງ 2 ຝ່າຍລົງນາມແລ້ວ ເພື່ອບັນລຸໝາກຜົນສູງສຸດໃນປີແຫ່ງຄວາມສາມັກຄີມິດຕະພາບຫວຽດນາມ - ລາວ, ລາວ - ຫວຽດນາມ.