ພາບປະກອບ
(vovworld) – ຕອນເຊົ້າວັນທີ 9/7, ຢູ່ຮ່າໂນ້ຍ, ກົມໃຫຍ່ທ່ອງທ່ຽວ, ກະຊວງວັດທະນະທຳ - ກິລາ ແລະ ທ່ອງທ່ຽວໄດ້ຈັດຕັ້ງການສະເຫຼີມສະຫຼອງ 56 ປີແຫ່ງວັນສ້າງຕັ້ງຂະແໜງທ່ອງທ່ຽວ ຫວຽດນາມ (9/7/1960 – 9/7/2016). ກ່າວຄຳເຫັນທີ່ພິທີ, ທ່ານ ຫງວຽນວັນຕ໋ວນ, ຫົວໜ້າກົມໃຫຍ່ທ່ອງທ່ຽວ ໃຫ້ຮູ້ວ່າ: ໃນຊຸມປີຜ່ານມາ, ຂະແໜງທ່ອງທ່ຽວ ຫວຽດນາມ ມີບັນດາບາດກ້າວພັດທະນາພໍສົມຄວນ, ປະກອບສ່ວນເຂົ້າໃນການພັດທະນາເສດຖະກິດ - ສັງຄົມ, ສ້າງການຫັນປ່ຽນໂຄງປະກອບເສດຖະກິດ, ດຶງດູດການລົງທຶນ, ສ້າງວຽກເຮັດງານທຳ, ລົບລ້າງຄວາມອຶດຫິວ, ຫລຸດຜ່ອນຄວາມທຸກຍາກ, ໂຄສະນາພາບພົດຂອງປະເທດຊາດ, ຊາວ ຫວຽດນາມ. ໃນ 6 ເດືອນຕົ້ນປີ 2016, ແຂກສາກົນມາຍັງ ຫວຽດນາມສືບຕໍ່ຮັກສາທ່າເຕີບໂຕ, ບັນລຸກ່ວາ 4,7 ລ້ານເທື່ອຄົນ, ເພີ່ມຂຶ້ນ 21,3% ເມື່ອທຽບໃສ່ໄລຍະດຽວກັນຂອງປີ 2015, ຍອດລາຍຮັບຈາກແຂກທ່ອງທ່ຽວບັນລຸກ່ວາ 200.000 ຕື້ດົ່ງ, ເພີ່ມຂຶ້ນ 20% ເມື່ອທຽບໃສ່ໄລຍະດຽວກັນຂອງປີ 2015. ພິເສດ, ຈຳນວນແຂກມາຈາກບັນດາປະເທດ ອາຊີຕາເວັນອອກສ່ຽງເໜືອ ສືບຕໍ່ບັນລຸລະດັບການເຕີບໂຕສູງ. ຈຳນວນແຂກໃນພາກພື້ນ ອາຊຽນ ສືບຕໍ່ຮັກສາລະດັບການເຕີບໂຕກ່ວາ 2 ຕົວເລກ. ກ່ຽວກັບແຜນການພັດທະນາຂະແໜງທ່ອງທ່ຽວ ຫວຽດນາມ ໃນໄລຍະຈະມາເຖິງ, ທ່ານ ຫງວຽນວັນຕ໋ວນ, ໃຫ້ຮູ້ວ່າ:
“ຂະແໜງທ່ອງທ່ຽວສຸມໃສ່ປຶກສາຫາລື ແລະ ສະເໜີເນື້ອໃນປັບປຸງກົດໝາຍປັບປຸງ, ເພີ່ມເຕີມວ່າດ້ວຍການທ່ອງທ່ຽວເພື່ອມີພື້ນຖານດ້ານນິຕິກຳຢ່າງໜັກແໜ້ນ, ຮັບປະກັນການພັດທະນາການທ່ອງທ່ຽວແບບຍືນຍົງຍາວນານ. ພ້ອມກັນນັ້ນ, ພວກຂ້າພະເຈົ້າສືບຕໍ່ກະກຽມແຜນຮ່າງສະເໜີກັບການນຳພັກ, ລັດຖະບານຕົກລົງປະກາດໃຊ້ບາງນະໂຍບາຍເພື່ອສ້າງການບຸກທະລຸໃຫ້ແກ່ການພັດທະນາການທ່ອງທ່ຽວ ຫວຽດນາມ ໄລຍະໃໝ່. ພິເສດ, ສຸມໃສ່ສົມທົບກັບບັນດາຂະແໜງການກ່ຽວຂ້ອງ ແລະ ບັນດາທ້ອງຖິ່ນເພື່ອກວດກາຄຸນນະພາບການບໍລິການ.”