ທ່ານໂຄສົກກະຊວງການຕ່າງປະເທດ ອີຣານ Esmaeil Baghaei  (ພາບ: IRNA/TTXVN)

ວັນທີ 28 ຕຸລາ, ໂຄສົກກະຊວງການຕ່າງປະເທດ ອີຣານ, ທ່ານ Esmaeil Baghaei ໃຫ້ຮູ້ວ່າ: ເຕເຮຣານ ຈະ ໂຕ້ຕອບຢ່າງຂ້ຽວຂາດ ແລະ ມີປະສິດທິຜົນ” ຕໍ່ການບຸກໂຈມຕີທາງອາກາດຂອງ ອິດສະຣາແອນ ໃສ່ບັນດາຖານທີ່ໝັ້ນການທະຫານ ໃນທ້າຍອາທິດ ຜ່ານມາ ຊື່ງເຮັດໃຫ້ມີຫລາຍຄົນເສຍຊີວິດ ແລະ ຮັບບາດເຈັບ. ກ່າວຄຳເຫັນທີ່ການຖະແຫລງຂ່າວນັດສາມັນ, ທ່ານ Esmaeil Baghaei ໃຫ້ຮູ້ວ່າ: ຄຳສັ່ງຢຸດຍິງ ຢູ່ ເຂດ ກາຊາ ແລະ ລີບັງ ຍັງຄົງແມ່ນເປົ້າໝາຍ ຂອງ ອີຣານ. ທ່ານໄດ້ເລັ່ງໃຫ້ສະພາຄວາມໝັ້ນຄົງ ສປຊ ຍົກອອກຫລັກໝັ້ນ “ຕິດສິນຊີ້ຂາດ ແລະ ແຂງແກ່ນ” ທີ່ກ່ຽວຂ້ອງເຖິງການບຸກໂຈມຕີ.

ແລະກໍ່ໃນວັນດຽວກັນ, ອາເມລິກາ ໄດ້ກ່າວເຕືອນຜົນຮ້າຍຢ້ອນຫລັງທີ່ຮ້າຍແຮງຖ້າຫາກ ອີຣານ ບຸກໂຈມຕີໂຕ້ຕອບໃສ່ ອິດສະຣາແອນ ຫລື ບັນດາກຳລັງ ອາເມລິກາ ຢູ່ ຕາເວັນອອກກາງ. ກ່າວຄຳເຫັນທີ່ການປະຊຸມຂອງສະພາຄວາມໝັ້ນຄົງ ສປຊ, ທ່ານ ເອກອັກຄະລັດຖະທູດ ອາເມລິກາ ປະຈຳ ສປຊ ນາງ Linda Thomas Greenfield, ໃຫ້ຮູ້ວ່າ: ໃນກໍລະນີການບຸກໂຈມຕີຂອງ ອີຣານ, ອາເມລິກາ ຈະບໍ່ຄິດໄລ່ຊັ່ງຊາໃນການກະທຳເພື່ອປ້ອງກັນຕົວ. ອາເມລິກາ ບໍ່ຢາກເຫັນຄວາມເຄັ່ງຕຶງເພີ່ມຂຶ້ນອີກ ແລະ ຫວັງວ່າ ການປະທະກັນໂດຍກົງ ລະຫວ່າງ ອີຣານ ແລະ ອິດສະຣາແອນ ຈະຢຸດຕິ.

ທີ່ການປະຊຸມ, ທ່ານ Amir Saied Iravani ເອກອັກຄະລັດຖະທູດອີຣານ ປະຈຳ ສປຊ ໄດ້ກ່າວຫາ ອາເມລິກາ ທີ່ໄດ້ມີການສະຫນັບສະຫນູນ ອິດສະຣາແອນ ຜ່ານການຊ່ວຍເຫລືອດ້ານການທະຫານໃຫ້ແກ່ປະເທດນີ້. ທ່ານເອກອັກຄະລັດຖະທູດ ອີຣານ ກໍ່ຢືນຢັນ: ອີຣານ ສືບຕາມທາງການທູດ ແລະ ປະເທດນີ້ ຈະຮັກສາສິດໂຕ້ຕອບທຸກການກະທຳທີ່ປະເທດນີ້ ຖືວ່າແມ່ນການກະທຳເກາະຜິດ.