ຄະນະຜູ້ແທນພັກກອມມູນິດຫວຽດນາມ ເຂົ້າຮ່ວມກອງປະຊຸມບັນດາພັກ ການເມືອງອາຊີ
(ພາບປະກອບ)
(vovworld) - ໃນລະຫວ່າງວັນທີ 29 – 31/05, ຄະນະຜູ້ແທນພັກກອມມູນິດຫວຽດນາມ ໂດຍທ່ານ ເວືອງເທື່ອຟອງ, ຮອງຫົວໜ້າຜູ້ປະຈຳການຄະນະພົວພັນການຕ່າງປະເທດສູນກາງ, ກຳມະການຄະນະກຳມະການປະຈຳກອງປະຊຸມສາກົນບັນດາພັກການເມືອງອາຊີ (ICAPP), ນຳໜ້າຮ່ວມກອງປະຊຸມສຳມະນາຫົວເລື່ອງສະເພາະຂອງ ICAPP ກ່ຽວກັບການພັດທະນາຂຽວ ຢູ່ນະຄອນຊີອານ, ແຂວງ ສານຊີ, ປະເທດຈີນ. ດ້ວຍຫົວຂໍ້ວ່າ “ຊຸກຍູ້ການພັດທະນາຂຽວ ແລະ ຮ່ວມມືສ້າງອາຊີ ໃຫ້ສວຍງາມ”, ກອງປະຊຸມສຳມະນາ ຫົວເລື່ອງສະເພາະຂອງ ICAPP ໂດຍພັກກອມມູນິດຈີນ ເປັນເຈົ້າພາບຈັດຕັ້ງ ມີການເຂົ້າຮ່ວມຂອງ 60 ພັກການເມືອງ ທີ່ມາຈາກ 30 ປະເທດ. ບັນດາຜູ້ແທນໄດ້ແບ່ງປັນສະພາບຕົວຈິງ ແລະ ບົດຮຽນຢ່າງກວ້າງຂວາງກ່ຽວກັບການປົກປັກຮັກສາສິ່ງແວດລ້ອມຊີວະພາບ, ປະຕິບັດການພັດທະນາຂຽວ, ພັດທະນາຢ່າງໝັ້ນຄົງ ເໝາະສົມກັບສະພາບ, ເງື່ອນໄຂສະເພາະຂອງແຕ່ລະປະເທດ. ບັນດາຜູ້ແທນໄດ້ເຫັນດີໂດຍຖືວ່າ ການພັດທະນາຂຽວ ໄດ້ກາຍເປັນກຳລັງໜູນໃໝ່ເພື່ອຊຸກຍູ້ການເຕີບໂຕ, ພ້ອມທັງເນັ້ນໜັກເຖິງຄວາມສຳຄັນຂອງການເພີ່ມທະວີການຮ່ວມມືສາກົນ, ໂດຍສະເພາະແມ່ນບັນດາພັກການເມືອງໃນການປະຕິບັດການພັດທະນາຂຽວ. ກອງປະຊຸມສຳມະນາ ໄດ້ຮັບຮອງເອົາຂໍ້ລິເລີ່ມຊີອານ, ຮຽກຮ້ອງໃຫ້ບັນດາພັກການເມືອງອາຊີ ເອົາໃຈໃສ່ເຖິງການພັດທະນາຂຽວ ແລະ ມານະພະຍາຍາມກ່ວາອີກເພື່ອຄວາມກ້າວໜ້າຊີວະພາບ. ເນື່ອງໃນໂອກາດນີ້, ຢູ່ນະຄອນຊີອານ ໄດ້ດຳເນີນກອງປະຊຸມຂອງຄະນະກຳມະການປະຈຳ ICAPP. ບັນດາຜູ້ແທນໄດ້ຊຸມໃສ່ປຶກສາຫາລືບັນດາທິດທາງ ແລະ ມາດຕະການຜັນຂະຫຍາຍໝາກຜົນອັນດີງາມຂອງກອງປະຊຸມຄັ້ງທີ 19 ຄະນະກຳມະການປະຈຳ ICAPP ໂດຍກອມມູນິດຫວຽດນາມ ເປັນເຈົ້າພາບຈັດຕັ້ງຂຶ້ນເປັນຄັ້ງທຳອິດຢູ່ຮ່າໂນ້ຍໃນເດືອນ 4 ຜ່ານມາ.