ພິທີໄຂງານວາງສະແດງ
(ພາບ: tienphong.vn)
(vovworld) – ກະຊວງຖະແຫຼງຂ່າວ ແລະ ສື່ສານ ສົມທົບກັບກອງທັບເຮືອໄດ້ຈັດຕັ້ງງານວາງສະແດງ ”ແຜນທີ່ ແລະ ເອກະສານຮ່ວາງຊາ, ເຈື່ອງຊາຂອງຫວຽດນາມ - ບັນດາພະຍານຫຼັກຖານປະຫວັດສາດ” ຢູ່ເທດສະບານເຈື່ອງຊາ, ເມືອງເກາະເຈື່ອງຊາ, ແຂວງແຄ໋ງຮ່ວາ. ງານວາງສະແດງນີ້ແນະນຳແຜນທີ 120 ແຜ່ນ ແລະ ເອກະສານທີ່ລວບລວມເອົາຂອງບັນດານັກຄົ້ນຄ້ວາ, ນັກຮຽນຮູ້ທັງຢູ່ພາຍໃນ ແລະ ຕ່າງປະເທດເຊິ່ງໄດ້ຢັ້ງຢືນອະທິປະໄຕຂອງຫວຽດນາມຢູ່ເກາະຮ່ວາງຊາ ແລະ ເຈື່ອງຊາຢ່າງຈະແຈ້ງ. ການປຽບທຽບບັນດາເອກະສານເຫຼົ່ານັ້ນ ໄດ້ຢືນຢັນໃຫ້ເຫັນວ່າ, ບັນດາລັດຫວຽດນາມ ໄດ້ກຳນົດ ແລະ ປະຕິບັດອະທິປະໄຕຂອງຕົນຢູ່ຮ່ວາງຊາ ແລະ ເຈື່ອງຊາ ຢ່າງຄົບຖ້ວນ, ຫາກບໍ່ຕ້ອງປະສົບກັບການຄັດຄ້ານ ຫຼືການພິພາດຈາກປະເທດໃດໆ. ກ່ອນນັ້ນ, ກະຊວງຖະແຫຼງຂ່າວ ແລະ ສື່ສານ ໄດ້ມອບແຜນທີ່ ແລະ ເອກະສານຊຸດໜຶ່ງໃຫ້ເກາະນາມອຽດ ແລະ ເກາະຊິງໂຕ່ນ. ທ່ານ ເລວັນງຽມ, ຫົວໜ້າກົມຖະແຫຼງການຕ່າງປະເທດ, ໃຫ້ຮູ້ວ່າ:
”ບັນດາເອກະສານນີ້ໄດ້ວາງສະແດງຢູ່ໝູ່ເກາະເຈື່ອງຊາ, ຊ່ວຍໃຫ້ພະນັກງານ, ນັກຮົບ ແລະ ປະຊາຊົນຫວຽດນາມ ຢູ່ເຂດໝູ່ເກາະ ມີຄວາມຮູ້ຢ່າງຄົບຖ້ວນ ກ່ຽວກັບບັນດາຫຼັກຖານປະຫວັດສາດດ້ານກົດໝາຍຂອງຫວຽດນາມ ໃນການຢັ້ງຢືນອະທິປະໄຕສຳລັບເກາະທະເລ, ຜ່ານນັ້ນເພີ່ມກຳລັງແຮງ, ເຈດຈຳນົງຕັດສິນໃຈ, ລະດົມຄວາມເອກອ້າງທະນົງໃຈ, ຄວາມເຊື່ອໝັ້ນຕໍ່ຄວາມເປັນທຳຂອງພວກເຮົາ ໃນການຕໍ່ສູ້ປົກປັກຮັກສາອະທິປະໄຕທະເລ, ໝູ່ເກາະຂອງຫວຽດນາມ”.