ຈີນຊຸກຍູ້ກາລະໂອກາດລົງທຶນ, ທ່ອງທ່ຽວຢູ່ອາຊຽນ
ພາບປະກອບຈາກ kinibiz.com
(vovworld) - ທ່ານເລຂາທິການໃຫຍ່ສູນ ອາຊຽນ-ຈີນ (ACC) ໝ້າມິງແຈງ ພ້ອມກັບຄະນະຖ່າຍທຳຮູບເງົາຂຶ້ນກັບໂທລະພາບສູນກາງ ຈີນ (CCTV) ຈະໄປຍັງ ອິນໂດເນເຊຍ ໃນອາທິດນີ້ເພື່ອຊຸກຍູ້ກາລະໂອກາດລົງທຶນ ແລະ ທ່ອງທ່ຽວຢູ່ປະເທດນີ້. ຄາດວ່າ, ໃນເວລາຢູ່ອິນໂດເນເຊຍ 1 ອາທິດ, ທ່ານເລຂາທິການໃຫຍ່ ໝ້າມິງແຈງ ຈະມີການພົບປະກັບບັນດາເຈົ້າໜ້າທີ່ລັດຖະບານປະເທດເຈົ້າພາບ, ພ້ອມກັບຄະນະຖ່າຍທຳຮູບເງົາຢ້ຽມຢາມສະຖານທີ່ບາງແຫ່ງເພື່ອຖ່າຍທຳຮູບເງົາເອກະສານ ກ່ຽວກັບອາຫານການກິນ, ບັນດາສະຖານທີ່ທ່ອງທ່ຽວຢູ່ນີ້. ທ່ານ ໝ້າມິງແຈງ ໃຫ້ຮູ້ວ່າ: ACC ສຸມໃສ່ເຂົ້າໃນການປັບປຸງບັນດາການພົວພັນ ແລະ ຮ່ວມມືລະຫວ່າງ ຈີນ ແລະ ບັນດາສະມາຊິກ ອາຊຽນ, ພິເສດແມ່ນໃນການລົງທຶນ, ການຄ້າ, ການສຶກສາ, ວັດທະນະທຳ ແລະ ການທ່ອງທ່ຽວ, ຮຽກຮ້ອງໃຫ້ບັນດານັກລົງທຶນຕ່າງປະເທດທີ່ໜ້າໄວ້ເນື້ອເຊື່ອໃຈລົງທຶນເຂົ້າ ອາຊຽນ ແລະ ສົ່ງເສີມປະຊາຊົນ ຈີນ ໄປທ່ອງທ່ຽວຢູ່ບັນດາປະເທດສະມາຊິກ ອາຊຽນ. ນອກຈາກນັ້ນ, ACC ຍັງດຳເນີນການເຄື່ອນໄຫວສົ່ງເສີມຜ່ານການຈັດຕັ້ງຄະນະລວມມີບັນດານັກວິສາຫະກິດ ແລະ ນັກຂ່າວ ຈີນ ໄປຢ້ຽມຢາມບັນດາປະເທດ ອາຊຽນ, ຫຼືເຊື້ອເຊີນບັນດາຄະນະເຈົ້າໜ້າທີ່ຈາກບັນດາປະເທດສະມາຊິກ ອາຊຽນ ໄປປະຕິບັດວຽກງານສົ່ງເສີມຢູ່ ຈີນ.