ຈີນ-ອິນເດຍພິຈາລະນາຄວາມຈຳເປັນຕ້ອງສ້າງໂທລະສັບສາຍດ່ວນການທະຫານ
ທະຫານ ຈີນ - ແລະ ອິນເດຍ ຢູ່ເຂດຊາຍແດນ
(ພາບ: dantri.com.vn)
(vovworld) - ຈີນ ແລະ ອິນເດຍ ຫາກໍ່ເຊັນຂໍ້ຕົກລົງພິຈາລະນາສ້າງຕັ້ງໂທລະສັບສາຍດ່ວນລະຫວ່າງບັນດາກອງບັນຊາການກຳລັງປະກອບອາວຸດ 2 ປະເທດ. ກ່າວຄຳເຫັນທີ່ການປະຊຸມຂ່າວເມື່ອວັນທີ 31/10, ໂຄສົກກະຊວງປ້ອງກັນປະເທດ ຈີນ ທ່ານ ຢ໋າງອູ໋ຈວຽນ ໃຫ້ຮູ້ວ່າ: ກຳລັງປະກອບອາວຸດ ຈີນ ແລະ ອິນເດຍ ຈະພ້ອມກັນມານະພະຍາຍາມເພື່ອແນໃສ່ຮັບປະກັນສັນຕິພາບ ແລະ ສະຖຽນລະພາບຢູ່ບັນດາເຂດຊາຍແດນ ຕາມຂໍ້ກຳນົດຂອງສັນຍາຮ່ວມມືຊາຍແດນທີ່ຫາກໍ່ລົງນາມໃນການຢ້ຽມຢາມ ຈີນ ຂອງທ່ານນາຍົກລັດຖະມົນຕີ ອິນເດຍ Manmohan Singh ໃນອາທິດກ່ອນ. 2 ຝ່າຍໄດ້ເຫັນດີເປັນເອກະສັນຈັດຕັ້ງກອງປະຊຸມເປັນປະຈຳ, ສືບຕໍ່ປັບປຸງຄວາມໄວ້ເນື້ອເຊື່ອໃຈເຊິ່ງກັນ ແລະ ກັນຢູ່ເຂດ ຂີດເສັ້ນຄວບຄຸມ (LoC). ໂຄສົກກະຊວງປ້ອງກັນປະເທດ ຈີນ ໃຫ້ຮູ້ວ່າ: ສັນຍາໄດ້ສະຫລຸບບັນດາບົດຮຽນ ແລະ ພຶດຕິກຳຕົວຈິງກ່ຽວກັບການຄວບຄຸມຄວາມບໍ່ລົງລອຍກັນຢູ່ເຂດຊາຍແດນລະຫວ່າງ 2 ປະເທດ, ເນັ້ນໜັກວ່າ: ກອງທັບ ຈີນ ພ້ອມແລ້ວທີ່ຈະພ້ອມກັບ ອິນເດຍ ເພີ່ມທະວີຄວາມໄວ້ເນື້ອເຊື່ອໃຈ, ການຮ່ວມມື, ຮັກສາສັນຕິພາບ ແລະ ສະຖຽນລະພາບຢູ່ພາກພື້ນ.