ຍົກສູງປະສິດທິຜົນການເຊື່ອມໂຍງແລະຊຸກຍູ້ການຮ່ວມມືໃຕ້-ໃຕ້
(ກອງປະຊຸມໂຕະມົນໜູນຊ່ວຍການເຊື່ອມໂຍງ
ເຂົ້າກັບສາກົນຂອງຫວຽດນາມໃນໄລຍະໃໝ່)
(vovworld) - ວັນທີ 17/06, ຢູ່ຮ່າໂນ້ຍ, ກະຊວງການຕ່າງປະເທດໄດ້ສົມທົບກັບອົງການພັດທະນາສະຫະປະຊາຊາດ (UNDP) ຈັດຕັ້ງກອງປະຊຸມໂຕະມົນກ່ຽວກັບ “ການເຊື່ອມໂຍງເຂົ້າກັບສາກົນຂອງຫວຽດນາມໃນໄລຍະໃໝ່: ຍົກສູງປະສິດທິຜົນການເຊື່ອມໂຍງແລະຊຸກຍູ້ການຮ່ວມມືໃຕ້-ໃຕ້”. ກ່າວຄຳເຫັນທີ່ກອງປະຊຸມ, ທ່ານ ບຸຍແທງເຊີນ, ຮອງລັດຖະມົນຕີການຕ່າງປະເທດ ໄດ້ຢືນຢັນແຜນນະໂຍບາຍສະເໝີຕົ້ນສະເໝີປາຍຂອງຫວຽດນາມ ກ່ຽວກັບການເຊື່ອມໂຍງເຂົ້າກັບສາກົນຢ່າງຮອບດ້ານ, ເລິກເຊິ່ງ, ກວ້າງຂວາງໃນທຸກຂົງເຂດ, ໃນນັ້ນຖືການເຊື່ອມໂຍງດ້ານເສດຖະກິດສາກົນແມ່ນຈຸດສຸມ. ໃນໄລຍະພັດທະນາໃໝ່, ຫວຽດນາມ ຈະເຮັດໃຫ້ການເຊື່ອມໂຍງໃນບັນດາຂົງເຂດການເມືອງ, ການປ້ອງກັນຊາດ ປ້ອງກັນຄວາມສະງົບ - ວັດທະນະທຳສັງຄົມໃຫ້ເລິກເຊິ່ງກວ່າ, ຍູ້ແຮງການເຊື່ອມໂຍງດ້ານເສດຖະກິດສາກົນ. ໂດຍແມ່ນປະເທດທີ່ພວມພັດທະນາ, ຍາມໃດຫວຽດນາມ ກໍຖືການຮ່ວມມືໃຕ້ - ໃຕ້ເປັນສຳຄັນ ແລະ ໃນຄວາມສາມາດຂອງຕົນ, ຫວຽດນາມ ພ້ອມແລ້ວທີ່ຈະສວມບົດບາດຕັ້ງໜ້າກວ່າອີກ ເພື່ອຊຸກຍູ້ການຮ່ວມມືໃຕ້ - ໃຕ້, ແບ່ງປັນບົດຮຽນຂອງຕົນກ່ຽວກັບການປ່ຽນໃໝ່, ການພັດທະນາເສດຖະກິດສັງຄົມ ແລະ ການເຊື່ອມໂຍງເຂົ້າກັບສາກົນ.
ສ່ວນທ່ານນາງ Pratibha Mehta, ຜູ້ປະສານງານສະຫະປະຊາຊາດປະຈຳຫວຽດນາມ ເນັ້ນໜັກວ່າ, ການເຊື່ອມຍົງເຂົ້າກັບສາກົນໄດ້ປະກອບສ່ວນສຳຄັນເຂົ້າໃນບັນດາຜົນງານພັດທະນາເສດຖະກິດ, ສັງຄົມ ກໍ່ຄືທີ່ຕັ້ງພົວພັນຕ່າງປະເທດຂອງຫວຽດນາມ. ພິເສດແມ່ນ, ຜົນສຳເລັດຂອງຫວຽດນາມ ໃນການປະຕິບັດບັນດາເປົ້າໝາຍພັດທະນາແບບຍືນຍົງ (MDGs) ແມ່ນບັນດາບົດຮຽນອັນລຳຄ່າ, ຄວນໄດ້ຮັບການແບ່ງປັນກັບປະເທດຕ່າງໆ, ໂດຍສະເພາະແມ່ນບັນດາປະເທດພວມພັດທະນາ.
ກ່າວຄຳເຫັນອັດກອງປະຊຸມ, ທ່ານຮອງລັດຖະມົນຕີ ບຸຍແທງເຊີນ ໃຫ້ຮູ້ວ່າ, ໝາກຜົນຂອງກອງປະຊຸມຈະແມ່ນພື້ນຖານສຳຄັນເພື່ອປະກອບສ່ວນຊ່ວຍຫວຽດນາມ ເປີດກວ້າງການຮ່ວມມືກັບເພື່ອນມິດສາກົນ ແນໃສ່ຍົກສູງປະສິດທິຜົນຂອງການເຊື່ອມໂຍງເຂົ້າກັບສາກົນຢ່າງເລິກເຊິ່ງ, ກວ້າງຂວາງ, ໂດຍສະເພາະແມ່ນການຜັນຂະຫຍາຍບັນດາສັນຍາການຄ້າເສລີ (FTAs) ລຸ່ນໃໝ່ ແລະ ຊຸກຍູ້ບົດບາດຂອງຫວຽດນາມ ໃນການຮ່ວມມືໃຕ້ - ໃຕ້.