(vovworld) – ຕອນບ່າຍວັນທີ 14/5, ຢູ່ສຳນັກງານລັດຖະບານ, ທ່ານນາຍົກລັດຖະມົນຕີຫວຽດນາມ ຫງວຽນເຕິນຢຸ້ງ ໄດ້ໃຫ້ການຕ້ອນຮັບທ່ານ Nakane Kazuyuki, ລັດຖະມົນຕີຊ່ວຍວ່າການກະຊວງການຕ່າງປະເທດຍີ່ປຸ່ນ ທີ່ພວມຢ້ຽມຢາມ ແລະ ເຮັດວຽກຢູ່ ຫວຽດນາມ. ທ່ານນາຍົກລັດຖະມົນຕີ ຫງວຽນເຕິນຢຸ້ງ ຢືນຢັນວ່າ: ຫວຽດນາມ ປາດຖະໜາຢາກພ້ອມກັບ ຍີ່ປຸ່ນ ສືບຕໍ່ມານະພະຍາຍາມນຳການພົວພັນ 2 ປະເທດໃຫ້ພັດທະນາຢ່າງເລິກເຊິ່ງ, ກ້ວາງຂວາງໃນທຸກຂົງເຂດ, ນຳມາເຊິ່ງຜົນປະໂຫຍດໃຫ້ແກ່ປະຊາຊົນ 2 ປະເທດ ແລະ ປະກອບສ່ວນເພື່ອສັນຕິພາບ, ວັດຖະນາຖາວອນຢູ່ພາກພື້ນ. ທ່ານນາຍົກລັດຖະມົນຕີ ຫງວຽນເຕິນຢຸ້ງ ຂອບໃຈ ຍີ່ປຸ່ນ ທີ່ໄດ້ສະໜັບສະໜູນແຫຼ່ງທຶນ ODA ໃຫຍ່ ແລະ ມີປະສິດທິຜົນໃຫ້ ຫວຽດນາມ ໃນຫຼາຍປີຜ່ານມາ; ພ້ອມທັງສະເໜີ ຍີ່ປຸ່ນ ສືບຕໍ່ໜູນຊ່ວຍ, ພັດທະນາ ODA ຢ່າງເປັນທາງການໃຫ້ແກ່ ຫວຽດນາມ ເພື່ອພັດທະນາໂຄງປະກອບພື້ນຖານໂຄງລ່າງເສດຖະກິດ-ສັງຄົມ.
ສ່ວນທ່ານລັດຖະມົນຕີຊ່ວຍວ່າການກະຊວງການຕ່າງປະເທດ Nakane Kazuyuki ຢືນຢັນວ່າ: ຍີ່ປຸ່ນ ຈະສືບຕໍ່ໃຫ້ຄຳໝັ້ນສັນຍາ ODA ເພື່ອແນໃສ່ໜູນຊ່ວຍ ຫວຽດນາມ ພັດທະນາຢ່າງໝັ້ນຄົງ, ສ້າງໂຄງປະກອບພື້ນຖານໂຄງລ່າງ ແລະ ບຳລຸງສ້າງແຫຼ່ງຊັບພະຍາກອນມະນຸດ; ຮ່ວມມືກັບ ຫວຽດນາມ ໃນຂົງເຂດອຸດສາຫະກຳສຳຮອງ, ກະສິກຳ ແລະ ພັດທະນາເຂດຕົວເມືອງ.