(vovworld) - ຕອນເຊົ້າວັນທີ 25/01, ຢູ່ສຳນັກງານລັດຖະບານ, ທ່ານນາຍົກລັດຖະມົນຕີ ຫງວຽນເຕີນຢຸງ ໄດ້ໃຫ້ການຕ້ອນຮັບທ່ານນາງ Heidi Hautala, ລັດຖະມົນຕີກະຊວງພັດທະນາສາກົນແຟງລັງ ທີ່ພວມມີການຢ້ຽມຢາມ ແລະ ເຮັດວຽກຢູ່ຫວຽດນາມ. ທ່ານນາຍົກລັດຖະມົນຕີ ຫງວຽນເຕີນຢຸງ ເນັ້ນໜັກວ່າ, ຫວຽດນາມ - ແຟງລັງ ມີສາຍພົວພັນທີ່ເປັນມູນເຊື້ອອັນດີງາມ ແລະ ຖືວ່າ, ການຢ້ຽມຢາມຂອງທ່ານນາງ Heidi Hautala ຖືກດຳເນີນກົງກັບໂອກາດທີ່ 2 ປະເທດສະເຫຼີມສະຫຼອງ 40 ປີແຫ່ງວັນສ້າງຕັ້ງສາຍພົວພັນທາງການທູດ, ປະກອບສ່ວນສຳຄັນເຂົ້າໃນການຊຸກຍູ້ການພົວພັນລະຫວ່າງຫວຽດນາມ - ແຟງລັງ ໃນທຸກຂົງເຂດຢ່າງແຮງ. ສ່ວນທ່ານນາງລັດຖະມົນຕີ Heidi Hautala ກໍໃຫ້ຮູ້ຈຸດປະສົງຂອງການຢ້ຽມຢາມແມ່ນພ້ອມກັບບັນດາບໍລິສັດຂອງແຟງລັງ ມາຊຸກຍູ້ການລົງທຶນຢູ່ຫວຽດນາມ, ໂດຍສະເພາະແມ່ນໃນຂົງເຂດເຕັກໂນໂລຊີສິ່ງແວດລ້ອມ ແລະ ເຕັກໂນໂລຊີຂຽວ. ທ່ານນາງລັດຖະມົນຕີ Heidi Hautala ເນັ້ນໜັກວ່າ, ຫວຽດນາມ ໄດ້ກາຍເປັນໜຶ່ງໃນບັນດາປະເທດຄູ່ຮ່ວມມືຍາວນານໃນນະໂຍບາຍຮ່ວມມືພັດທະນາຂອງແຟງລັງ ແລະ ປາດຖະໜາວ່າ ລັດຖະບານຈະສ້າງເງື່ອນໄຂສະດວກເພື່ອໃຫ້ບັນດາບໍລິສັດຂອງແຟງລັງ ມາລົງທຶນຢູ່ຫວຽດນາມ. ທີ່ການຕ້ອນຮັບ, ຜູ້ຕາງໜ້າບັນດາວິສາຫະກິດແຟງລັງ ກໍໃຫ້ຄຳໝັ້ນສັນຍາຊຸກຍູ້ການລົງທຶນເຂົ້າຫວຽດນາມ ໃນບັາດາຂົງເຂດທີ່ມີທ່າແຮງຄື; ການບໍລິການທີ່ປຶກສາ, ເຕັກໂນໂລຊີ, ພະລັງງານຜະລິດຄືນໃໝ່, ວັດແທກ... ໃນໄລຍະຈະມາເຖິງ.