(vovworld) - ຕອນເຊົ້າວັນທີ 01/08, ທ່ານນາຍົກລັດຖະມົນຕີ ຫງວຽນເຕີນຢຸງ ໄດ້ໂອ້ລົມທາງໂທລະສັບກັບທ່ານນາຍົກລັດຖະມົນຕີຍີ່ປຸ່ນ Shinzo Abe. ທ່ານນາຍົກລັດຖະມົນຕີ ຫງວຽນເຕີນຢຸງ ໄດ້ວອຍພອນພັກເສລີປະຊາທິປະໄຕຍີ່ປຸ່ນ ແລະ ທ່ານນາຍົກລັດຖະມົນຕີ Shinzo Abe ຍາດໄດ້ໄຊຊະນະໃນການເລືອກຕັ້ງສະພາສູງຜ່ານມາ, ຖືວ່າໝາກຜົນດັ່ງກ່າວໄດ້ສ່ອງແສງໃຫ້ເຫັນການສະໜັບສະໜູນ ແລະ ຄວາມໄວ້ເນື້ອເຊື່ອໃຈຂອງປະຊາຊົນຍີ່ປຸ່ນ ຕໍ່ລັດຖະບານ ແລະ ທ່ານນາຍົກລັດຖະມົນຕີ Shinzo Abe. ທ່ານນາຍົກລັດຖະມົນຕີ Shinzo Abe ຢືນຢັນວ່າ ລັດຖະບານຍີ່ປຸ່ນຖືການພົວພັນກັບຫວຽດນາມ ເປັນສຳຄັນ ແລະ ຖືຫວຽດນາມ ເປັນຄູ່ຮ່ວມມືທີ່ໄວ້ເນື້ອເຊື່ອໃຈຂອງຍີ່ປຸ່ນ ຢູ່ພາກພື້ນ.
ນາຍົກລັດຖະມົນຕີ 2 ທ່ານ ຢືນຢັນວ່າ ຈະສືບຕໍ່ຮ່ວມມືກັນຢ່າງແໜ້ນແຟ້ນ ເພື່ອປະກອບສ່ວນນຳການພົວພັນຄູ່ຮ່ວມມືຍຸດທະສາດຫວຽດນາມ - ຍີ່ປຸ່ນ ພັດທະນາໃຫ້ນັບມື້ນັບຮອບດ້ານ ແລະ ຂຶ້ນສູ່ລະດັບສູງໃໝ່, ເພື່ອຜົນປະໂຫຍດຂອງປະຊາຊົນ 2 ປະເທດ, ປະກອບສ່ວນເພື່ອສັນຕິພາບ, ສະຖຽນລະພາບ, ການຮ່ວມມື ແລະ ພັດທະນາຢູ່ພາກພື້ນອາຊີ - ປາຊີຝີກ ແລະ ຢູ່ໃນໂລກ. ນາຍົກລັດຖະມົນຕີ 2 ທ່ານ ກໍ່ເຫັນດີພ້ອມກັນຊີ້ນຳບັນດາການເຄື່ອນໄຫວພົວພັນແລກປ່ຽນລະຫວ່າງ 2 ປະເທດ, ຜ່ານນັ້ນເພີ່ມທະວີຄວາມສາມັກຄີມິດຕະພາບ ແລະ ຄວາມເຂົ້າໃຈເຊິ່ງກັນ ແລະ ກັນລະຫວ່າງ 2 ປະເທດ, ປະກອບສ່ວນປັບປຸງການພົວພັນຮ່ວມມືອັນດີງາມລະຫວ່າງຫວຽດນາມ - ຍີ່ປຸ່ນ ໃຫ້ໝັ້ນຄົງ, ເຂັ້ມແຂງ. ເນື່ອງໃນໂອກາດນີ້, ທ່ານນາຍົກລັດຖະມົນຕີ ຫງວຽນເຕີນຢຸງ ແລະ ຜູ້ຮ່ວມຕຳແໜ່ງຍີ່ປຸ່ນ Shinzo Abe ໄດ້ແລກປ່ຽນບາງບັນຫາສາກົນ ແລະ ພາກພື້ນ ເຊິ່ງຕ່າງຝ່າຍຕ່າງມີຄວາມສົນໃຈ, ພ້ອມທັງເຫັນດີຊຸກຍູ້ການພົວພັນຮ່ວມມືລະຫວ່າງອາຊຽນ ແລະ ຍີ່ປຸ່ນ.