ທ່ານ​ນາຍົກລັດຖະມົນຕີຫວຽດນາມ​ຫງວຽນ​ເຕີນ​ຢຸງ​

​ໄດ້ໃຫ້ການ​ຕ້ອນຮັບ​ທ່ານ​ເອກ​ອັກຄະ​ລັດຖະທູດ​ໄທ ອະນຸສົນ ຈິນວັນ​ໂນ

 (ພາບ: VGP/Nhật Bắc)

(vovworld)-  ຕອນ​ບ່າຍ​ວັນ​ທີ 11/12, ຢູ່​ສຳນັກງານ​ລັດຖະບານ, ທ່ານ​ນາຍົກລັດຖະມົນຕີຫວຽດນາມ​ຫງວຽນ​ເຕີນ​ຢຸງ​ ​ໄດ້ໃຫ້ການ​ຕ້ອນຮັບ​ທ່ານ​ເອກ​ອັກຄະ​ລັດຖະທູດ​ໄທ ອະນຸສົນ ຈິນວັນ​ໂນ ​ແລະ ທ່ານ​ເອກ​ອັກຄະ​ລັດຖະທູດອິນ​ເດຍ Preeti Saran.

  ​ໃນ​ການ​ຕ້ອນຮັບທ່ານ​ເອກ​ອັກຄະ​ລັດຖະທູດ​ໄທ ອະນຸສົນ ຈິນວັນ​ໂນ ມາ​ອຳ​ລາ​ໃນ​ໂອກາດ​ສິ້ນ​ສຸດ​ອາຍຸ​ການ​ປະຕິບັດ​ງານ​ຢູ່​ຫວຽດນາມ, ທ່ານ​ນາຍົກລັດຖະມົນຕີ ຫວຽດນາມ​ຫງວຽນ​ເຕີນ​ຢຸງ ​ເນັ້ນໜັກ​​ວ່າ: ​ນະ​ໂຍບາຍ​ສະ​ເໝີ​ຕົ້ນສະ​ເໝີ​ປາຍ​ຂອງ​ຫວຽດນາມ ​ແມ່ນ​ຈະ​ມານະ​ພະຍາຍາມ​ຈົນ​ສຸດ​ຄວາມ​ສາມາດ​ຂອງ​ຕົນ​ເພື່ອ​ພ້ອມ​ກັບ​ໄທ ນຳ​ການ​ພົວພັນ​ຮ່ວມ​ມື​ລະຫວ່າງ​ສອງ​ປະ​ເທດ​ນັບ​ມື້​ນັບ​ເຂົ້າສູ່​ລວງ​ເລິກ, ​ແທດ​ຈິງ ​ແລະ ມີປະສິດທິ​ຜົນ, ນຳ​ມາ​ເຊິ​ງຜົນ​ປະ​ໂຫຍ​ດອັນ​ແທດ​ຈິງ​ໃຫ້ທັງ​ສອງ​ປະ​ເທດ. ສ່ວນທ່ານ​ເອກ​ອັກຄະ​ລັດຖະທູດ​ໄທ ອະນຸສົນ ຈິນວັນ​ໂນ ຢືນຢັນ​ວ່າ: ​ເຖິງ​ວ່າ​ໃນ​ຖານະ​ຕຳ​ແໜ່​ງ​ປະຕິບັດ​ງານ​ໃດ, ທ່ານ​ກໍ່​ຈະສືບ​ຕໍ່​ປະກອບສ່ວນຢ່າງ​ຕັ້ງໜ້າ​ເພື່ອ​ເພີ່ມ​ພູ​ຄູນ​ສ້າງ​ສາຍ​ພົວພັນ​ຮ່ວມ​ມື​ມິດຕະພາບ​ອັນ​ດີງາມ​ລະຫວ່າງ​ຫວຽດນາມ ​ແລະ ​ໄທ.

​ໃນ​ການ​ຕ້ອນຮັບທ່ານເອກ​ອັກຄະ​ລັດຖະທູດ​ ອິນ​ເດຍ Preeti Saran ມາ​ເຂົ້າຢ້ຽມ​ຂ່ຳນັບ​ໃນ​ໂອກາດ​ມາຮັບ​ໜ້າ​ທີ່ຢູ່​ຫວຽດນາມ, ທ່ານ​ນາຍົກລັດຖະມົນຕີຫວຽດນາມ​ຫງວຽນ​ເຕີນ​ຢຸງ ປາດ​ຖະໜາ​ວ່າ​ສອງ​ປະ​ເທດ​ຈະ​ເພີ່ມ​ທະວີບັນດາ​ການ​ເຄື່ອນ​ໄຫວ​ແລກປ່ຽນ​ຄະນະ​ຜູ້​ແທນ​ທຸກຂັ້ນ, ສະໜັບສະໜູນ​ຫຼັກໝັ້ນຂອງ​ກັນ​ບົນ​ເວທີ​ປາ​ໄສ​ສາກົນ ​ແລະ ພາກ​ພື້ນ; ສືບ​ຕໍ່​ຊຸກຍູ້​ການ​ຮ່ວມ​ມື​ດ້ານ​ເສດຖະກິດ​, ການ​ຄ້າ, ການ​ລົງທຶນ, ພະລັງງານ, ການທ່ອງທ່ຽວ, ວັດທະນະທຳ… ສ່ວນທ່ານເອກ​ອັກຄະ​ລັດຖະທູດ​ ອິນ​ເດຍ Preeti Saran ​ໃຫ້​ຮູ້​ວ່າ: ຍາມ​ໃດ​ອິນ​ເດຍ ກໍ່​ມານະ​ພະຍາຍາມ​ຈົນ​ສຸດ​ຄວາມ​ສາມາດ​ຂອງ​ຕົນ​ເພື່ອ​ນຳ​ການ​ພົວພັນ​ຄູ່​ຮ່ວມ​ມື​ຍຸດ​ທະ​ສາດ​ຫວຽດນາມ-​ອິນ​ເດຍ ພັດທະນາ​ຢ່າງ​ເລິກ​ເຊິ່ງກ້ວາງ​ຂວາງ​ກ່ວາ, ​ເພື່ອ​ຜົນ​ປະ​ໂຫຍ​ດລວມຂອງສອງ​ຊາດ, ສອງ​ປະ​ເທດ./.