(VOVWORLD) -ເນື່ອງໃນໂອກາດບຸນປີໃໝ່ປະຈຳຊາດ ປີສະຫຼູ 2021, ຕອນບ່າຍວັນທີ 7 ກຸມພາ, ທ່ານນາຍົກລັດຖະມົນຕີ ຫວຽດນາມ ຫງວຽນຊວັນຟຸກ ໄດ້ໄປຢ້ຽມຢາມ, ອວຍພອນປີໃໝ່ ແລະ ກວດກາຄວາມພ້ອມຕໍ່ສູ້ຢູ່ບາງກົມກອງກຳລັງຕຳຫຼວດປະຊາຊົນ.
ທີ່ກົມຕຳຫຼວດອາຍາ, ທ່ານນາຍົກລັດຖະມົນຕີ ຫວຽດນາມ ຫງວຽນຊວັນຟຸກ ຕີລາຄາສູງ ກຳລັງຕຳຫຼວດອາຍາ ທີ່ໄດ້ປະຕິບັດວຽກງານເສນາທິການໃຫ້ແກ່ພັກ, ລັດ ໄດ້ເປັນຢ່າງດີ ຊ່ວຍປະກາດໃຊ້ເອກະສານຫຼາຍສະບັບກ່ຽວກັບການປ້ອງກັນ, ຕ້ານ ອາດຊະຍາກຳອາຍາ; ແກ້ໄຂບັນດາຫົວເລື່ອງກ່ຽວກັບການຕໍ່ສູ້ກັບອາດຊະຍາກຳ, ກໍລະນີລະເມີດກົດໝາຍເປັນຢ່າງດີ. ທ່ານນາຍົກລັດຖະມົນຕີ ຫງວຽນຊວັນຟຸກ ເນັ້ນໜັກວ່າ ບໍ່ວ່າຢູ່ໃນກໍລະນີໃດກໍຕາມ ກໍຕ້ອງຮັກສາຄວາມສະຫງົບແຫ່ງຊາດ, ຄວາມເປັນລະບຽບຮຽບຮ້ອຍ, ຄວາມປອດໄພໃນທົ່ວສັງຄົມ, ສ້າງສະພາບແວດລ້ອມສັນຕິພາບ, ສະຖຽນລະພາບ ແລະ ສ້າງເງື່ອນໄຂສະດວກເພື່ອພັດທະນາປະເທດຊາດ.
 ທ່ານນາຍົກລັດຖະມົນຕີ ຫວຽດນາມ ຫງວຽນຊວັນຟຸກ ອວຍພອນປີໃໝ່ ແລະ ມອບຂອງຂວັນໃຫ້ແກ່ກົມຕຳຫຼວດອາຍາ (ພາບ: TTXVN) |
ເມື່ອກວດກາວຽກງານປະຕິບັດໜ້າທີ່ ແລະ ອວຍພອນປີໃໝ່ພະນັກງານ, ນັກຮົບ ກົມປ້ອງກັນຄວາມສະຫງົບພາຍໃນປະເທດ, ທ່ານນາຍົກລັດຖະມົນຕີ ຫງວຽນຊວັນຟຸກ ຢັ້ງຢືນວ່າ:
“ບັນດາພະນັກງານ, ນັກຮົບ ໄດ້ເຊື່ອມຊຶມນ້ຳໃຈ “ເປັນເຈົ້າການປ້ອງກັນຄວາມສະຫງົບ” ໃນນັ້ນ, ມີການຮັບປະກັນຄວາມສະຫງົບປອດໄພຢ່າງສິ້ນເຊິງໃຫ້ແກ່ກອງປະຊຸມໃຫຍ່ທຸກຂັ້ນ ແລະ ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 13 ຂອງພັກກອມມູນິດ ຫວຽດນາມ, ບໍ່ປະໃຫ້ເກີດກໍລະນີສັບສົນ. ນີ້ແມ່ນຜົນສຳເລັດອັນພົ້ນເດັ່ນກົມປ້ອງກັນຄວາມສະຫງົບພາຍໃນປະເທດ ໄດ້ສົມທົບກັບກຳລັງອື່ນໆຜັນຂະຫຍາຍຢ່າງຄົບຊຸດ, ປະຕິບັດບັນດາມາດຕະການ, ແບບວິທີ, ແຜນການທາງວິຊາການຢ່າງຂ້ຽວຂາດ.”
ເມື່ອລົງຢ້ຽມຢາມກອງບັນຊາການກຳລັງອາລັກຂາ, ທ່ານນາຍົກລັດຖະມົນຕີ ຫງວຽນຊວັນຟຸກ ກໍຕັກເຕືອນວ່າ ກອງບັນຊາການກຳລັງອາລັກຂາຄວນສ້າງ ແລະ ປັບປຸງບັນດາແບບວິທີປ້ອງກັນໃຫ້ສົມບູນແບບ, ຕິດຕາມທຸກເປົ້າໝາຍ, ທຸກບໍລິເວນຢ່າງໃກ້ຊິດ.
 ຄູຝຶກທິມບານເຕະແຫ່ງຊາດ ຫວຽດນາມ Park Hang – seo ໄດ້ຮັບຂອງຂວັນປີໃໝ່ຈາກທ່ານນາຍົກລັດຖະມົນຕີ ຫວຽດນາມ ຫງວຽນຊວັນຟຸກ (ພາບ: VFF) |
ກໍເນື່ອງໃນໂອກາດນີ້, ທ່ານນາຍົກລັດຖະມົນຕີ ຫງວຽນຊວັນຟຸກ ກໍໄດ້ ມອບຂອງຂວັນ ແລະ ອວຍພອນປີໃໝ່ ທ່ານຫົວໜ້າຄູຝຶກທິມບານເຕະແຫ່ງຊາດ ຫວຽດນາມ Park Hang – seo.