ທ່ານນາຍົກລັດຖະມົນຕີ ຫງວຽນຊວນຟຸກ ແລະ ທ່ານນາຍົກລັດຖະມົນຕີ
ມົງໂກນ Jagaltulga Erdenebatໄດ້ພ້ອມກັນເປັນສັກຂີພິຍານພິທີລົງນາມ
ບາງເອກະສານການຮ່ວມມືລະຫວ່າງຫ້ອງການການຄ້າ ແລະ ອຸດສາຫະກຳຂອງ 2 ປະເທດ
(vovworld) – ໂດຍໄດ້ຮັບຄຳເຊີນຂອງທ່ານປະທານາທິບໍດີ ມົງໂກນ Tsakhiagiin Elbegdorj ແລະ ທ່ານນາຍົກລັດຖະມົນຕີ ມົງໂກນ Jagaltulga Erdenebat ທ່ານນາຍົກລັດຖະມົນຕີ ຫງວຽນຊວນຟຸກ ແລະ ພັນລະຍາພ້ອມດ້ວຍຄະນະຜູ້ແທນຂັ້ນສູງ ຫວຽດນາມ ເລີ່ມຕົ້ນການຢ້ຽມຢາມ ມົງໂກນ ຢ່າງເປັນທາງການ ໃນລະຫວ່າງວັນທີ 13 – 14 / 07. ຕ້ອນຮັບຄະນະຜູ້ແທນຢູ່ສະໜາມບິນ ມີທ່ານລັດຖະມົນຕີກະຊວງການຕ່າງປະເທດ ມົງໂກນ Purevsuren Lundeg ພ້ອມດ້ວຍເຈົ້າໜ້າທີ່ຂັ້ນສູງຂອງ ມົງໂກນ ຈຳນວນໜຶ່ງ; ທ່ານ ຟານດັງເຢືອງ ເອກອັກຄະລັດຖະທູດ ຫວຽດນາມ ປະຈຳ ມົງໂກນ ພ້ອມດ້ວຍພະນັກງານພາລະກອນສະຖານທູດ.
ໃນຕອນບ່າຍວັນທີ 13/07 , ທ່ານນາຍົກລັດຖະມົນຕີ ມົງໂກນ Jagaltulga Erdenebat ເປັນປະທານພິທີຕ້ອນຮັບທ່ານນາຍົກລັດຖະມົນຕີ ຫງວຽນຊວນຟຸກ ຢ່າງເປັນທາງການຢູ່ສະໜາມຫລວງ Chinggis Khan ນະຄອນຫລວງ Ulan Bator . ພາຍຫຼັງພິທີຕ້ອນຮັບ, ທ່ານນາຍົກລັດຖະມົນຕີທັງ 2 ໄດ້ດຳເນີນການເຈລະຈາ.ທີ່ການເຈລະຈາ, ທ່ານນາຍົກລັດຖະມົນຕີຫວຽດນາມ ຫງວຽນຊວນຟຸກຢືນຢັນວ່າ ຫວຽດນາມຖືເປັນສຳຄັນ ແລະ ຫວັງຊຸກຍູ້ການພົວພັນທຸກດ້ານກັບມົງໂກນ, ເຊື່ອໝັ້ນ ມົງໂກນຈະເປັນເຈົ້າພາບຈັດກອງປະຊຸມສຸດຍອດອາຊີ-ເອີລົບຄັ້ງທີ 11ຢ່າງສຳເລັດຜົນ. ທ່ານນາຍົກລັດຖະມົນຕີທັງ 2 ຢືນຢັນຖືເປັນສຳຄັນ ແລະ ຫວັງເພີີ່ມທະວີການພົວພັນອັນດີງາມລະຫວ່າງ 2 ປະເທດໃນທຸກຂົງເຂດ, ຕອບສະໜອງຄວາມມຸງມາດປາດຖະໜາຂອງປະຊາຊົນ 2 ປະເທດ, ເພື່ອສັນຕິພາບ, ສະຖຽນລະພາບ, ການຮ່ວມມື ແລະ ພັດທະນາຂອງພາກພື້ນ ແລະ ໂລກ. 2 ຝ່າຍໄດ້ເນັ້ນໜັກເຖິງຄວາມຈຳເປັນຂອງການຮັກສາສັນຕິພາບ, ສະຖຽນລະພາບ, ເສລີພາບ, ຄວາມປອດໄພໃນການເດີນເຮືອ, ການບິນບົນທະເລຕາເວັນອອກ. ສະໜັບສະໜູນການແກ້ໄຂການຂັດແຍ້ງດ້ວຍມາດຕະການໂດຍສັນຕິວິທີ, ສອດຄ່ອງກັບກົດໝາຍສາກົນ, ໃນນັ້ນມີສົນທິສັນຍາຂອງສະຫະປະຊາຊາດກ່ຽວກັບກົດໝາຍວ່າດ້ວຍທະເລປີ 1982, ປະຕິບັດຕາມຖະແຫຼງການກ່ຽວກັບການປະພຶດຂອງຝ່າຍຕ່າງໆຢູ່ ທະເລຕາເວັນອອກ (DOC), ເພີ່ມທະວີບັນດາມາດຕະການສ້າງຄວາມເຊື່ອໝັ້ນຕໍ່ກັນ ແລະ ການທູດເພື່ອສະກັດກັ້ນ, ກ້າວໄປສູ່ການສ້າງປະມວນຫຼັກການກ່ຽວກັບການປະພຶດຂອງຝ່າຍຕ່າງໆຢູ່ ທະເລຕາເວັນອອກ (COC) ໂດຍໄວ. ສ່ວນທ່ານນາຍົກລັດຖະມົນຕີມົງໂກນ Jagaltuga ຢືນຢັນວ່າ ການຢ້ຽມຢາມຂອງທ່ານນາຍົກລັດຖະມົນຕີຫວຽດນາມ ຫງວຽນຊວນຟຸກແມ່ນມີຄວາມໝາຍພິເສດ, ເປີດໜ້າປະຫວັດສາດໃໝ່ໃນການພົວພັນອັນດີງາມລະຫວ່າງ 2 ປະເທດ. ມົງໂກນຖືເປັນສຳຄັນການພົວພັນມິດຕະພາບທີ່ເປັນມູນເຊື້ອກັບຫວຽດນາມ. ພາຍຫລັງການເຈລະຈາການນຳ 2 ທ່ານໄດ້ພ້ອມກັນເປັນສັກຂີພິຍານໃນພິທີລົງນາມບາງເອກະສານການຮ່ວມມືລະຫວ່າງຫ້ອງການການຄ້າ ແລະ ອຸດສາຫະກຳຂອງ 2 ປະເທດ.
ແລະ ໃນຕອນບ່າຍຂອງວັນດຽວກັນ, ທ່ານນາຍົກລັດຖະມົນຕີຫວຽດນາມ ຫງວຽນຊວນຟຸກ ກໍໄດ້ພົບປະກັບປະທານາທິບໍດີ ມົງໂກນຢ່າງສະໜິດສະໜົມ.