ທ່ານນາຍົກລັດຖະມົນຕີຫງວຽນເຕີນຢູງເຂົ້າຮ່ວມກອງປະຊຸມສຸດຍອດແມ່ນ້ຳຂອງ-ຍີ່ປຸ່ນຄັ້ງທີ7
ກອງປະຊຸມສຸດຍອດ ແມ່ນ້ຳຂອງ - ຍີ່ປຸ່ນ ຄັ້ງທີ 7
ພາບ:baocongthuong.vn
|
(vovworld)- ວັນທີ4/7, ຢູ່ ໂຕກຽວ ໄດ້ດຳເນີນກອງປະຊຸມສຸດຍອດ ແມ່ນ້ຳຂອງ - ຍີ່ປຸ່ນ ຄັ້ງທີ 7 ໂດຍມີການເຂົ້າຮ່ວມຂອງການນຳບັນດາປະເທດຄື: ກຳປູເຈຍ, ລາວ, ມຽນມາ, ໄທ, ຫວຽດນາມ ແລະ ຍີ່ປຸ່ນ. ຄະນະຜູ້ແທນຫວຽດນາມໂດຍທ່ານນາຍົກລັດຖະມົນຕີ ຫງວຽນເຕີນຢູງ ນຳຫນ້າ. ບັນດາການນຳໄດ້ເຫັນດີ ຮັບຮອງເອົາຍຸດທະສາດ ໂຕກຽວ ປີ 2015 ດ້ວຍຈຸດໝາຍໃຫ້ແກ່ການຮ່ວມມື ແມ່ນ້ຳຂອງ - ຍີ່ປຸ່ນ ໄລຍະ 2006-2018 ແມ່ນຮັບປະກັນສະຖຽນລະພາບຂອງພາກພື້ນ ແລະ ບັນລຸ ການເຕີບໂຕມີຄຸນນະພາບ ຢູ່ ອະນຸພາກພື້ນແມ່ນ້ຳຂອງ.
ໃນຖະແຫລງການຮ່ວມ ແມ່ນ້ຳຂອງ - ຍີ່ປຸ່ນ, ບັນດາການນຳ ຮັບຮູ້ຄວາມສຳຄັນຂອງມະຫາສະຫມຸດ ແມ່ນຊັບສົມບັດລວມຂອງໂລກ ແລະ ຢືນຢັນເຖິງຄວາມສຳຄັນຂອງການຮ່ວມມືຢ່າງແຫນ້ນແຟ້ນກວ່າເພື່ອຮັບປະກັນຄວາມປອດໄພການເດີນທະເລໃນພາກພື້ນ, ເນັ້ນຫນັກເຖິງເລື່ອງ ຕ້ອງປະຕິບັດຖະແຫລງການກ່ຽວກັບການປະພຶດຂອງບັນດາຝ່າຍຢູ່ທະເລຕາເວັນອອກຢ່າງຄົບຖ້ວນ, ມີປະສິດທິຜົນ ແລະ ບັນລຸປະມວນຂໍ້ກຳນົດການປະພຶດຢູ່ທະເລຕາເວັນອອກໂດຍໄວ.
ກ່າວຄຳເຫັນທີ່ການປະຊຸມຂ່າວພາຍຫລັງກອງປະຊຸມ, ທ່ານນາຍົກລັດຖະມົນຕີ ຢືນຢັນ:
“ໝາກຜົນພົ້ນເດັ່ນຂອງກອງປະຊຸມຄັ້ງນີ້ ແມ່ນການຮັບຮອງເອົາ “ຍຸດທະສາດໂຕກຽວ ປີ 2015” ດ້ວຍບັນດາທິດທາງໃຫຍ່ໃຫ້ການຮ່ວມມືແມ່ນ້ຳຂອງ - ຍີ່ປຸ່ນ ໄລຍະ 2016-2018. ຈຸດໝາຍຂອງຍຸດທະສາດແມ່ນຊຸກຍູ້ການເຕີບໂຕຄຸນນະພາບຢູ່ອະນຸພາກພື້ນແມ່ນ້ຳຂອງ ແລະເປີດກວ້າງການຮ່ວມມືໃຫມ່ລະຫວ່າງ ຍີ່ປຸນ ແລະ ບັນດາປະເທດ ແມ່ນ້ຳຂອງ ເພື່ອຜົນປະໂຫຍດຂອງແຕ່ລະປະເທດ, ເພື່ອສັນຕິພາບ ແລະ ວັດທະນາຖາວອນຂອງທັງພາກພື້ນ. ບັນດາການເຄື່ອນໄຫວບໍ່ພຽງແຕ່ລະຫວ່າງລັດຖະບານເທົ່ານັ້ນ ຫາກມີການເຂົ້າຮ່ວມຂອງບັນດາວິສາຫະກິດ, ອົງການຈັດຕັ້ງສັງຄົມ…”
ກ່ຽວກັບສະພາບການຢູ່ທະເລຕາເວັນອອກ, ທ່ານນາຍົກລັດຖະມົນຕີ ຫງວຽນເຕີນຢູງ ເນັ້ນຫນັກວ່າ: ການຮັກສາສັນຕິພາບ, ສະຖຽນລະພາບ, ຄວາມໝັ້ນຄົງ ຄວາມປອດໄພ ແລະ ຄວາມເສລີໃນການເດີນທະເລຢູ່ທະເລຕາເວັນອອກ ແມ່ນຄວາມມຸ່ງຫວັງ ແລະ ແມ່ນຜົນປະໂຫຍດ, ຄວາມຮັບຜິດຊອບລວມຂອງບັນດາປະເທດພາຍໃນພາກພື້ນ ແລະ ນອກພາກພື້ນ.
ແທງຈູງ- ນັກຂ່າວ VOV