ທ່ານຮອງນາຍົກລັດຖະມົນຕີໄປຢ້ຽມຢາມ ແລະ ເຮັດວຽກກັບສະພາກາແດງ ຫວຽດນາມ
ທ່ານຮອງນາຍົກລັດຖະມົນຕີ ຫງວຽນທ້ຽນເຍິນ
ເຮັດວຽກກັບສະພາກາແດງຫວຽດນາມ
(ພາບ: nguyentandung.org)
(vovworld) – ຕອນບ່າຍວັນທີ 23/2, ຢູ່ ຮ່າໂນ້ຍ, ທ່ານຮອງນາຍົກລັດຖະມົນຕີ ຫງວຽນທ້ຽນເຍິນ ໄດ້ມີການຢ້ຽມຢາມ ແລະ ເຮັດວຽກກັບສະພາກາແດງຫວຽດນາມ. ບົດລາຍງານຂອງສະພາກາແດງຫວຽດນາມໃຫ້ຮູ້ວ່າ, ໄລຍະ 2007 – 2012, ສະພາໄດ້ຈັດຕັ້ງຂະບວນການ, ບັ້ນຂົນຂວາຍຕ່າງໆຢ່າງມີປະສິດທິຜົນ… ສະເພາະປີ 2012, ສະພາລະດົມເງິນໄດ້ 2.500 ຕື້ດົ່ງ, ຊ່ວຍເຫຼືອໃຫ້ຜູ້ທີ່ປະສົບກັບຄວາມຫຍຸ້ງຍາກບືນຕົວຂຶ້ນໃນຊີວິດ. ໃນໂອກາດບຸນປີໃໝ່ຜ່ານມາ, ສະມາຄົມບັນດາແຂວງ, ນະຄອນ ໄດ້ລະດົມ ແລະ ມອບຂອງຂວັນ 1,5 ລ້ານພູດໃຫ້ບັນດາຄອບຄົວທີ່ທຸກຍາກ, ແລະ ຜູ້ປະສົບເຄາະຮ້າຍຈາກທາດພິດສີສົ້ມ ດ້ວຍຍອດມູນຄ່າບັນລຸກວ່າ 400 ຕື້ດົ່ງ. ທ່ານ ຫງວຽນຫາຍເດື່ອງ, ປະທານສະພາກາແດງຫວຽດນາມ, ໃຫ້ຮູ້ວ່າ:
”ກ່ຽວກັບທິດທາງການເຄື່ອນໄຫວຂອງສະພາໃນໄລຍະຈະມາເຖິງ, ບັນດາພະນັກງານ, ສະມາຊິກທັງໝົດຂອງສະພາຈະມານະພະຍາຍາມສູ້ຊົນກໍ່ສ້າງອົງການສະພາໃຫ້ໝັ້ນຄົງເຂັ້ມແຂງ, ສືບຕໍ່ປ່ຽນໃໝ່, ຍົກສູງຄຸນນະພາບການເຄື່ອນໄຫວຂອງສະພາ ແລະ ເປີດກວ້າງການພົວພັນ ຮ່ວມມືກັບສາກົນ ເພື່ອດຶງດູດແຫຼ່ງກຳລັງໃຫ້ນັບມື້ນັບຫຼາຍກວ່າ, ແນໃສ່ຮັບໃຊ້ປະຊາຊົນໃຫ້ດີກວ່າ”.
ກ່າວຄວາມເຫັນທີ່ການເຮັດວຽກ, ທ່ານຮອງນາຍົກລັດຖະມົນຕີ ຫງວຽນທ້ຽນເຍິນ ສະເໜີໃຫ້ສະພາກາແດງຫວຽດນາມ ພ້ອມກັບສະພາກາແດງທຸກຂັ້ນຈັດການສະຫຼຸບ 5 ປີ ແຫ່ງການປະຕິບັດກົດໝາຍວ່າດ້ວຍກາແດງໂດຍໄວ, ຈາກນັ້ນຊອກຫາບັນດາມາດຕະການທີ່ເໝາະສົມໂດຍທັນທີ ປັບປຸງໃຫ້ເໝາະສົມ ເພື່ອເຮັດໃຫ້ການເຄື່ອນໄຫວຂອງສະພາກາແດງນັບມື້ນັບບັນລຸປະສິດທິຜົນກວ່າ.