ວັນທີ 10 ກັນຍາ, ທ່ານເລຂາທິການໃຫຍ່ ສປຊ Antonio Guterres ໄດ້ ກ່າວເຕືອນວ່າ ໂລກພວມໄປບໍ່ຖືກທິດ ແລະ ຮຽກຮ້ອງໃຫ້ບັນດາປະເທດຈົ່ງມີການກະທຳໂດຍດ່ວນ ເພື່ອຕ້ານໂລກລະບາດໂຄວິດ - 19 ແລະ ການປ່ຽນແປງຂອງດິນຟ້າອາກາດ. ຕາມທ່ານ Antonio Guterres ແລ້ວ, ໂລກລະບາດໂຄວິດ - 19 ເປັນເຫດການບອກເຕືອນ. ບັນດາປະເທດຜະລິດວັກຊິນ ບໍ່ສາມາດເພີ່ມທະວີການຜະລິດ ເພື່ອບັນລຸໄດ້ເປົ້າໝາຍສັກວັກຊິນໃຫ້ແກ່ 70% ປະຊາຊົນໃນໂລກ ໃນ 6 ເດືອນຕົ້ນປີ 2022 ໄດ້. ທ່ານກໍເນັ້ນໜັກວ່າ ໂລກລະບາດໄດ້ຊີ້ໃຫ້ເຫັນການປະລາໄຊຂອງໂລກ ໃນການພ້ອມກັນຍົກອອກຄຳຕັດສິນເພື່ອຜົນປະໂຫຍດສ່ວນລວມ, ນັບທັງເມື່ອປະເຊີນໜ້າກັບສະພາວະສຸກເສີນໃນທົ່ວໂລກ ແລະ ນາບຂູ່ເຖິງຊີວິດອິນຊີຂອງມະນຸດໃນທັນທີ.

ພ້ອມດຽວກັນນັ້ນ, ທ່ານ Antonio Guterres ກໍປະຕິເສດຕໍ່ຄຳຮຽກຮ້ອງໂຈະກອງປະຊຸມສຸດຍອດ ສປຊ ຄັ້ງທີ 26 ກ່ຽວກັບການປ່ຽນແປງຂອງດິນຟ້າອາກາດ (COP26) ເຊິ່ງຈະຈັດຂຶ້ນຢູ່ ອັງກິດ ໃນເດືອນພະຈິກຈະມາເຖິງນີ້, ພ້ອມທັງເນັ້ນໜັກວ່າ ນີ້ແມ່ນບັນຫາຮີບດ່ວນຂອງທົ່ວໂລກ. ທ່ານກໍຮຽກຮ້ອງໃຫ້ ອາເມລິກາ ແລະ ຈີນ ເຊິ່ງເປັນສອງປະເທດຖືກມົນລະພິດຫຼາຍທີ່ສຸດໃນໂລກ ຕ້ອງມີການກະທຳຫຼາຍກວ່າອີກ ເພື່ອຕ້ານຄືນການປ່ຽນແປງຂອງດິນຟ້າອາກາດ.