(​vovworld) – ວັນ​ທີ 3/9, ທ່ານ​ນາຍົກລັດຖະມົນຕີ ກຳປູ​ເຈຍ Hun Sen ຮຽກຮ້ອງ​ໃຫ້​ບັນດາ​ປະ​ເທດ ​ແລ​ະ ພື້ນຖານ​ເສດຖະກິດ​ຢູ່​ພາກ​ພື້ນ​ອາຊີ - ປາຊີ​ຟິກ ​ເພີ່ມທະວີ​ການ​ສົ​ມທົບ​ກັນຕ້ານການສໍ້​ລາດ​ບັງ​ຫຼວງ​. ກ່າວ​ຄຳ​ເຫັນ​ທີ່​ພິທີໄຂ​ກອງ​ປະຊຸມ​ຕ້ານການສໍ້​ລາດ​ບັງ​ຫຼວງ​ພາກ​ພື້ນຄັ້ງ​ທີ 8 ທີ່ຈັດ​ຂຶ້ນ​ຢູ່​ນະຄອນຫຼວງ ພະນົມ​​ເປັນ​ດ້ວຍ​ການ​ເຂົ້າ​ຮ່ວມ​ຂອງ​ບັນດາ​ຜູ້ຕາງໜ້າ​ມາ​ຈາກ 31 ປະ​ເທດ ​ແລະ ພື້ນຖານ​ເສດຖະກິດ​ພາກ​ພື້ນ, ທ່ານ Hun Sen ຖື​ວ່າ: ​ໃນ​ໂລກາ​ພິວັດ​ປະຈຸ​ບັນນີ້, ບັນດາ​ອາດ​ຊະ​ຍາ​ກຳ​ຄື ການສໍ້​ລາດ​ບັງ​ຫຼວງ​ລ້ວນ​ແຕ່​ສາມາດ​ປະຕິບັດ​ຂ້າມ​ຊາດ​ໄດ້. ດັ່ງ​ນັ້ນ, ຄຽງ​ຄ້າງ​ບັນດາ​ມາດ​ຕະການ​ປ້ອງ​ກັນ, ຕ້ານ​ພາຍ​ໃນ​ປະ​ເທດ, ບັນດາ​ຝ່າຍ​ຕ້ອງ​ເພີ່ມ​ທະວີ​ການ​ຮ່ວມ​ມື 2 ຝ່າຍ, ພາກ​ພື້ນ ​ແລະ ສາກົນ. ທີ່​ກອງ​ປະຊຸ​ມ, ຫົວໜ້າ​ຫ້ອງການ​ກະຈ່າງ​ແຈ້ງ ​ແລະ ຕ້ານການສໍ້​ລາດ​ບັງ​ຫຼວງ​​ຂອງ​ທະນາຄານ​ພັດທະນາ ອາຊີ (ADB), ທ່ານ​ນາງ Clare Wee, ຢັ້ງຢືນ​ວ່າ​ການຕ້ານການສໍ້​ລາດ​ບັງ​ຫຼວງ​ ​ແມ່ນ​ບັນຫາ​ຈຳ​ເປັນ​ຮີບ​ດ່ວນໃນ​ພາລະກິດ​ຫລຸດຜ່ອນ​ຄວາມ​ອຶດ​ຫິວ, ທຸກ​ຍາກ​ຢູ່​ພາກ​ພື້ນ ອາຊີ - ປາຊີ​ຟິກ, ຢັ້ງຢືນ ADB ຈະ​ສືບ​ຕໍ່​ຮ່ວມ​ມື​ຢ່າງ​ແໜ້ນ​ແຟ້ນກັບ​ທຸກໆ​ຄູ່​ຮ່ວມ​ມື​ເພື່ອ​ແນ​ໃສ່​ແກ້​ໄຂ​ບັນຫາ​ກ່ຽວຂ້ອງ​ເຖິງ​ການ​ບໍລິຫານ ​ແລະ ຕ້ານການ​ສໍ້​ລາດ​ບັງ​ຫຼວງ​ເຊິ່ງພາກ​ພື້ນ ອາຊີ - ປາ​ຊີ​ຟິກ ພວມ​ຕ້ອງປະ​ເຊີນ​ໜ້າ.