(vovworld) - ສະພາບເສດຖະກິດ, ສະພາບແວດລ້ອມແຫ່ງການລົງທຶນຢູ່ຫວຽດນາມ ແລະ ການພົວພັນຫວຽດນາມ - ອາເມລິກາ ໃນປີ 2013 ແມ່ນເນື້ອໃນຕົ້ນຕໍຂອງການໂອ້ລົມສົນທະນາລະຫວ່າງທ່ານເອກອັກຄະລັດຖະທູດຫວຽດນາມ ປະຈຳອາເມລິກາ ຫງວຽນກ໋ວກເກື່ອງ ກັບບັນດາວິສາຫະກິດສະມາຊິກຫ້ອງການການຄ້າອາເມລິກາ (USCC) ແລະ ສະພາວິສາຫະກິດອາເມລິກາ - ອາຊຽນ (USABC), ໃນວັນທີ 28/01. ຜູ້ຕາງໜ້າບັນດາວິສາຫະກິດອາເມລິກາ ໄດ້ຕີລາຄາສູງ ແລະ ເຊື່ອໝັ້ນຕໍ່ຄວາມມານະພະຍາຍາມຂອງຫວຽດນາມ ໃນໄລຍະຜ່ານມາໄດ້ຮັບປະກັນເສດຖະກິດມະຫາພາກເປັນປົກກະຕິ, ຄວບຄຸມໄພເງິນເຟີ້ ແລະ ສືບຕໍ່ສ້າງໂຄງປະກອບພື້ນຖານເສດຖະກິດຄືນໃໝ່. ບັນດາວິສາຫະກິດອາເມລິກາ ຢືນຢັນວ່າຈະດຳເນີນທຸລະກິດຢ່າງຍາວນານຢູ່ຫວຽດນາມ, ຕີລາຄາສູງເລື່ອງລັດຖະບານຫວຽດນາມ ໄດ້ຖືສຽງເວົ້າຂອງວິສາຫະກິດອາເມລິກາ ເປັນສຳຄັນ ແລະ ພ້ອມແລ້ວທີ່ຈະເຈລະຈາ, ຊອກຫາວິທີແກ້ໄຂຄວາມຫຍຸ້ງຍາກໃນສະພາບແວດລ້ອມແຫ່ງການລົງທຶນ. ບັນດາວິສາຫະກິດອາເມລິກາ ຖືວ່າ ເລື່ອງເຈລະຈາ TPP ສິ້ນສຸດໃນປີ 2013 ແລະ ບັນລຸໄດ້ຄາດໝາຍຕົກລົງສະເໝີພາບ, ທັນສະໄໝມີຄວາມສຳຄັນພິເສດທີ່ມີຕໍ່ຍຸດທະສາດແຫ່ງການລົງທຶນ ແລະ ເປີດກວ້າງການດຳເນີນທຸລະກິດຢູ່ຫວຽດນາມ ເວົ້າລວມ ແລະ ພາກພື້ນອາຊີຕາເວັນອອກສ່ຽງໃຕ້ ເວົ້າສະເພາະ.
ນີ້ແມ່ນການເຄື່ອນໄຫວເປັນຄັ້ງທຳອິດໃນຂອບເຂດຂໍ້ລິເລີ່ມເວທີປາໄສຫວຽດນາມ 2013 ສ້າງຊ່ອງເຈລະຈາປະຈຳເດືອນລະຫວ່າງສະຖານທູດຫວຽດນາມ ປະຈຳອາເມລິກາ ແລະ ບັນດາວິສາຫະກິດ, ນັກຮຽນຮູ້, ຜູ້ຊ່ຽວຊານ ລະຫວ່າງບັນດາກະຊວງ, ຂະແໜງການລັດຖະບານອາເມລິກາ, ປະກອບສ່ວນຊຸກຍູ້ການພົວພັນຮ່ວມມືດ້ານເສດຖະກິດ - ການຄ້າລະຫວ່າງ 2 ປະເທດໃຫ້ນັບມື້ນັບມີປະສິດທິຜົນ ແລະ ກ້າວເຂົ້າສູ່ລວງເລິກ.