ປະກາດດັດຊະນີປະຕິຮູບດ້ານບໍລິຫານປີ2013
ທ່ານຮອງນາຍົກລັດຖະມົນຕີ ຫງວຽນຊວນຟຸກ ເຂົ້າຮ່ວມກອງປະຊຸມ
(ພາບ: bizlive.vn)
(vovworld) – ຕອນເຊົ້າວັນທີ 5/9, ຢູ່ຮ່າໂນ້ຍ, ກະຊວງພາຍໃນໄດ້ຈັດຕັ້ງກອງປະຊຸມທົ່ວປະເທດປະກາດດັດຊະນີປະຕິຮູບດ້ານບໍລິຫານປີ 2013. ຕາມນັ້ນແລ້ວ, ກະຊວງຄົມມະນາຄົມຂົນສົ່ງ ແລະ ນະຄອນ ດ່ານັ້ງ ຖືກຈັດອັນດັບທີ 1 ກ່ຽວກັບປະຕິຮູບດ້ານບໍລິຫານປີ 2013 ໃນຈຳນວນບັນດາກະຊວງ, ຂະແໜງການ ແລະ ທ້ອງຖີ່ນ. ທີ່ພິທີປະກາດ, ທ່ານລັດຖະມົນຕີກະຊວງພາຍໃນ ຫງວຽນທ໋າຍບິ່ງ, ເນັ້ນໜັກວ່າ:
“ແຜນຮ່າງດັດຊະນີປະຕິຮູບດ້ານບໍລິຫານຮັບປະກັນເລື່ອງຕີລາຄາຢ່າງຮອບດ້ານ, ຄົບຊຸດ, ແທດຈິງ, ພາວະວິໄສ ໃນການປະຕິຮູບດ້ານບໍລິຫານຈາກປະຕິຮູບລະບອບຕະຫຼອດຮອດປະຕິຮູບກ່ຽວກັບລະບຽບການບໍລິຫານ, ຈາກປະຕິຮູບດ້ານບໍລິຫານກົງຈັກລັດຕະຫຼອດຮອດການສ້າງຖັນແຖວພະນັກງານ, ລັດຖະກອນ, ຈາກການປະຕິຮູບ ດ້ານ ບໍລິຫານລັດຕະຫຼອດຮອດພື້ນຖານການຫັນການບໍລິຫານແຫ່ງລັດເປັນທັນສະໄໝ.”
ກ່າວຄຳເຫັນທີ່ກອງປະຊຸມ, ທ່ານຮອງນາຍົກລັດຖະມົນຕີ ຫງວຽນຊວນຟຸກ ຮຽກຮ້ອງໃຫ້ບັນດາກະຊວງ, ຂະແໜງການ, ທ້ອງຖີ່ນໂດຍຜ່ານດັດຊະນີປະຕິຮູບດ້ານບໍລິຫານປີ 2013, ເພື່ອມີບັນດາມາດຕະການລະອຽດແນໃສ່ແກ້ໄຂຈຸດອ່ອນ, ຍົກສູງດັດຊະນີໃຫ້ຊຸມປີຕໍ່ໄປ. ທ່ານຮອງນາຍົກລັດຖະມົນຕີ ສະເໜີໃຫ້ບັນດາກະຊວງ, ອົງການທຽບເທົ່າກະຊວງ, ຄະນະກຳມະການປະຊາຊົນບັນດາແຂວງ, ນະຄອນຂຶ້ນກັບສູນກາງກຳນົດເລື່ອງປະຕິຮູບລະບຽບການບໍລິຫານແມ່ນໜ້າທີ່, ວຽກງານປະຈຳໃນຕະຫຼອດວິວັດທະນາການຜັນຂະຫຍາຍໂຄງການສັງລວມປະຕິຮູບດ້ານບໍລິຫານແຫ່ງລັດໄລຍະ 2011 – 2020.