ເຫດຍິງລູກສອນໄພຂ້າມທະວີບຂອງ ສປປ.ເກົາຫຼີ (ພາບ: KCNA/Reuters)

ວັນທີ 21 ພະຈິກ, ທ່ານລັດຖະມົນຕີກະຊວງການຕ່າງປະເທດ ສປປ.ເກົາຫຼີ Choe Son-hui ໄດ້ສະແດງທ່າທີບໍ່ເພິ່ງພໍໃຈ ຕໍ່ເລື່ອງທ່ານເລຂາທິການໃຫຍ່ ສປຊ Antonio Guterres ກ່າວປະນາມເລື່ອງ ສປປ.ເກົາຫຼີ ຍິງທົດລອງລູກສອນໄພນຳວິຖີຂ້າມທະວີບໃນອາທິດກ່ອນ, ພ້ອມທັງກ່າວຫາທ່ານ Antonio Guterres ໄດ້ຢືນຢູ່ຂ້າງຝ່າຍອາເມລິກາ. ໃນຖະແຫຼງການສະບັບໜຶ່ງ ຢູ່ຂ່າວສານສູນກາງ ສປປ.ເກົາຫຼີ, ທ່ານ ລັດຖະມົນຕີກະຊວງການຕ່າງປະເທດ ສປປ.ເກົາຫຼີ Choe Son-hui ໄດ້ເນັ້ນໜັກເຖິງເລື່ອງ ສປປ.ເກົາຫຼີ ພັດທະນາອາວຸດນິວເຄຼຍເພື່ອປ້ອງກັນຕົນເອງ ແລະ ຖືວ່າ ທ່ານເລຂາທິການໃຫຍ່ ສປຊ ແມ່ນສະມາຊິກຄົນໜຶ່ງຂອງ ທຳນຽບຂາວ ແລະ ລັດຖະບານ ອາເມລິກາ.

ທ່ານລັດຖະມົນຕີການຕ່າງປະເທດ ສປປ.ເກົາຫຼີ ຖືວ່າ ທ່ານ Antonio Guterres ໄດ້ປະລະບັນດາເປົ້າໝາຍ ແລະ ຫຼັກການຂອງ ກົດບັດ ສປຊ ກໍ່ຄືພາລະກິດຮັກສາບັນດາຫຼັກການສະເໝີພາບ, ພາວະວິໄສໃນການແກ້ໄຂວຽກງານສາກົນ.