(vovworld) - ໃນຂອບເຂດການຢ້ຽມຢາມມຽນມາ ຢ່າງເປັນທາງການ, ຕອນເຊົ້າວັນທີ 1/12, ທ່ານປະທານປະເທດຫວຽດນາມ ເຈືອງເຕີນຊາງ ໄດ້ໄປຢ້ຽມຢາມ ແລະ ໂອ້ລົມກັບພະນັກງານ, ພາລະກອນສະຖານທູດຫວຽດນາມ ແລະ ປະຊາຄົມຊາວຫວຽດນາມ ທີ່ພວມດຳລົງຊີວິດຢູ່ມຽນມາ. ທ່ານປະທານປະເທດໄດ້ເອົາໃຈໃສ່ວ່າ, ພະນັກງານ, ພາລະກອນສະຖານທູດ ກໍຄືປະຊາຄົມຊາວຫວຽດນາມ ຕ້ອງເອົາໃຈໃສ່ຊຸກຍູ້ການພົວພັນດ້ານເສດຖະກິດ ການຄ້າຫຼາຍກ່ວາອີກ ເພື່ອຜົນປະໂຫຍດຂອງປະຊາຊົນສອງປະເທດ. ທ່ານປະທານປະເທດກໍຕັກເຕືອນໃຫ້ປະຊາຄົມຊາວຫວຽດນາມ ທີ່ພວມຮໍ່າຮຽນ, ເຮັດວຽກ ແລະ ດຳລົງຊີວິດຢູ່ມຽນມາ ຕ້ອງສືບຕໍ່ເພີ່ມທະວີຄວາມສາມັກຄີ, ສູ້ຊົນຈົນສຸດຄວາມສາມາດຂອງຕົນໃນການປະຕິບັດງານ ແລະ ຮໍ່າຮຽນ, ສືບຕໍ່ປະກອບສ່ວນປັບປຸງ ແລະ ຊຸກຍູ້ສາຍພົວພັນມິດຕະພາບ ແລະ ການຮ່ວມມືອັນດີງາມຂອງສອງປະເທດກວ່າອີກ.
ຕໍ່ຈາກນັ້ນ, ທ່ານປະທານປະເທດ ໄດ້ໄປຢ້ຽມຢາມຫ້ອງການບໍ່ລິສັດໃຫຍ່ສຳຫຼວດຂຸດຄົ້ນນ້ຳມັນອາຍແກດຢູ່ມຽນມາ (PVEP). ທ່ານປະທານປະເທດຫວັງວ່າ ໃນໄລຍະຈະມາເຖິງ, ບໍລິສັດ PVEP ຈະເສີມຂະຫຍາຍມູນເຊື້ອແມ່ນຫົວໜ່ວຍນຳໜ້າຂອງກຸ່ມບໍລິສັດນ້ຳມັນອາຍແກດຫວຽດນາມ ນຳການຮ່ວມມືດ້ານນ້ຳມັນອາຍແກດກາຍເປັນແບບຢ່າງໃນການຮ່ວມມືເສດຖະກິດ - ການລົງທຶນ.
ຕອນທ່ຽງວັນດ່ຽວກັນ, ທ່ານປະທານປະເທດ ເຈືອງເຕີນຊາງ ພ້ອມກັບພັນລະຍາ ແລະ ຄະນະຜູ້ແທນຂັ້ນສູງຫວຽດນາມ ໄດ້ເດີນທາງອອກຈາກນະຄອນຫຼວງ Yangon ກັບຄືນເມື່ອປະເທດ, ສິ້ນສຸດການຢ້ຽມຢາມສ.ສະຫະພາບມຽນມາ ຢ່າງຈົບງາມ.