(vovworld) – ວັນທີ 06/11, ທ່ານປະທານາທິບໍດີອີຕາລີ Sergio Mattarella ເລີ່ມຕົ້ນບັນດາການເຄື່ອນໄຫວໃນການຢ້ຽມຢາມທາງລັດຖະກິດເຖິງຫວຽດນາມ, ແຕ່ວັນທີ 06 – 08/11, ຕາມຄຳເຊີນຂອງທ່ານປະທານປະເທດ ຫວຽດນາມ ເຈືອງເຕີນຊາງ. ຕອນບ່າຍວັນດຽວກັນ, ພາຍຫຼັງພິທີຕ້ອນຮັບຢ່າງສົມກຽດຢູ່ສຳນັກງານປະທານປະເທດ, ທ່ານປະທານປະເທດ ເຈືອງເຕີນຊາງ ແລະ ທ່ານປະທານາທິບໍດີ Sergio Mattarella ໄດ້ມີການເຈລະຈາ ເພື່ອແນໃສ່ຊຸກຍູ້ການພົວພັນຄູ່ຮ່ວມມືຍຸດທະສາດລະຫວ່າງ 2 ປະເທດໃຫ້ເຂົ້າສູ່ລວງເລິກ ແລະ ແທດຈິງກວ່າ. ທີ່ການເຈລະຈາ, ທ່ານປະທານປະເທດ ເຈືອງເຕີນຊາງ ໃຫ້ຮູ້ວ່າ, ເລື່ອງອີຕາລີພັດທະນາການພົວພັນກັບຫວຽດນາມ ນັບມື້ນັບເລິກເຊິ່ງ ແມ່ມມີຄວາມໝາຍໃຫຍ່ຫຼວງໃນສະພາບທີ່ຫວຽດນາມ ພວມຍູ້ແຮງການເຊື່ອມໂຍງ ແລະ ເຂົ້າຮ່ວມການເຊື່ອມຕໍ່ເສດຖະກິດສາກົນ, ຊຸກຍູ້ບັນດາສັນຍາການຄ້າເສລີ 2 ຝ່າຍ, ຫຼາຍຝ່າຍທີ່ສຳຄັນ, ໃນນັ້ນໃຫ້ບຸລິມະສິດສູງແກ່ສັນຍາການຄ້າເສລີກັບ EU. ການນຳ 2 ທ່ານໄດ້ເຫັນດີຫຼາຍມາດຕະການເພີ່ມທະວີການພົວພັວຮ່ວມມືໃນໄລຍະຈະມາເຖິງ, ໃນນັ້ນເອົາໃຈໃສ່ເຖິງການແລກປ່ຽນ, ເສີມຂະຫຍາຍທຸກຮູບການຮ່ວມມືຢູ່ຂັ້ນລັດຖະບານ ກໍຄືຢູ່ທ້ອງຖິ່ນຕ່າງໆ, ຜັນຂະຫຍາຍແຜນການເຄື່ອນໄຫວ 2015 – 2016; ເສີມຂະຫຍາຍບົດບາດຂອງບັນດາກົນໄກເຈລະຈາ ແລະ ຄະນະກຳມະການປະສົມ.
ສ່ວນທ່ານປະທານາທິບໍດີ Sergio Mattarella ຢືນຢັນວ່າ, ຈະຊຸກຍູ້ສະພາແຫ່ງຊາດອີຕາລີ ໃຫ້ສັດຕະຍາບັນສັນຍາຄູ່ຮ່ວມມືຮ່ວມມືຮອບດ້ານຫວຽດນາມ - EU ທີ່ລົງນາມເມື່ອປີ 2012 ໂດຍໄວ; ພ້ອມທັງຢືນຢັນວ່າ, ອີຕາລີ ສະໜັບສະໜູນຫວຽດນາມ ລົງນາມໃນສັນຍາການຄ້າເສລີຫວຽດນາມ - EU ແລະ EU ຮັບຮອງຂໍ້ກຳນົດກົດລະບຽບການຕະຫຼາດໃຫ້ຫວຽດນາມ ໂດຍໄວ.
ທ່ານປະທານປະເທດ ເຈືອງເຕີ໋ນຊາງ ແລະ ທ່ານປະທານາທິບໍດີ Sergio Mattarella ກໍແລກປ່ຽນກ່ຽວກັບສະພາບການເພີ່ມຂຶ້ນບັນດາການເຄື່ອນໄຫວກໍ່ຄວາມ ຂາດສະຖຽນລະພາບໃຫ້ສັນຕິພາບ, ສະຖຽນລະພາບ, ປ້ອງກັນຄວາມສະຫງົບ ແລະ ປອດໄພການເດີນທະເລ, ທາງອາກາດ ຢູ່ທະເລຕາເວັນອອກ. ທ່ານປະທານາທິບໍດີ ອີຕາລີ ຢືນຢັນວ່າ: ສະໜັບສະໜູນຫຼັກໝັ້ນຂອງ ຫວຽດນາມ ແກ້ໄຂບັນດາຄວາມບໍ່ລົງລອຍໂດຍສັນຕິວິທີ, ເຄົາລົບກົດໝາຍສາກົນ, ຮັກສາເສລີການເດີນທະເລ, ທາງອາກາດ ແລະ ຮັບປະກັນຄວາມສະຫງົບ ຄວາມປອດໄພໃນພາກພື້ນ. ທ່ານປະທານາທິບໍດີ Sergio Mattarella ໃຫ້ຮູ້ວ່າ: ອີຕາລີ ໄດ້ນຳ ຫວຽດນາມ ເຂົ້າໃນບັນຊີລາຍຊື່ 10 ຕະຫລາດຫາກໍ່ພົ້ນເດັ່ນບຸລິມະສິດພັດທະນາການຄ້າ, ການລົງທຶນ; ວິສາຫະກິດ ອີຕາລີ ຫລາຍແຫ່ງ ມີແຜນການດຳເນີນທຸລະກິດຍາວນາມ ແລະ ພວມຜັນຂະຫຍາຍບັນດາໂຄງການມີປະສິດທິຜົນຢູ່ ຫວຽດນາມ. ການນຳ 2 ທ່ານກໍແລກປ່ຽນກ່ຽວກັບທິດທາງຮ່ວມມືວັດທະນະທຳ - ການທ່ອງທ່ຽວ - ການສຶກສາບຳລຸງສ້າງ ແລະ ວິທະຍາສາດເຕັກໂນໂລຢີ
ພາຍຫລັງການເຈລະຈາ, ທ່ານປະທານປະເທດ ເຈືອງເຕີ໋ນຊາງ ແລະ ທ່ານປະທານາທິບໍດີ ອີຕາລີ Sergio Mattarella ມີການພົບປະກັບນັກຂ່າວພາຍໃນປະເທດ ແລະ ສາກົນ. ທ່ານປະທານປະເທດ ເຈືອງເຕີ໋ນຊາງ ຢືນຢັນຄືນອີກຄັ້ງໜຶ່ງວ່າ: ຫວຽດນາມ ຖືເປັນສຳຄັນບົດບາດ ແລະ ທີ່ຕັ້ງຂອງ ອີຕາລີ ໃນພາກພື້ນ ເອີຣົບ ແລະ ໂລກ. ສະແດງປາດຖະໜາຢາກນຳການພົວພັນຄູ່ຮ່ວມມືຍຸດທະສາດ ຫວຽດນາມ - ອີຕາລີ ເຂົ້າສູ່ລວງເລິກ ແລະ ມີປະສິດທິຜົນ. ທ່ານ ປະທານປະເທດ ເຈືອງເຕີ໋ນຊາງ ໃຫ້ຮູ້ວ່າ:
“ ຂ້າພະເຈົ້າຕີລາຄາສູງການມາຢ້ຽມຢາມຂອງທ່ານປະທານາທິບໍດີ, ເປັນການມາຢ້ຽມຢາມຄັ້ງທຳອິດຂອງປະທານາທິບໍດີ ອີຕາລີເຖິງຫວຽດນາມ ນັບແຕ່ເມື່ອ ຫວຽດນາມ-ອີຕາລີ ໄດ້ສ້າງຕັ້ງການພົວພັນທາງການທູດ ປີ 1973, ເປັນຂີດໝາຍບາດກ້າວພັດທະນາໃໝ່ສຳຄັນໃນການພົວພັນຫວຽດນາມ-ອີຕາລີ. ຂ້າພະເຈົ້າສະແດງຄວາມຂອບອົກຂອບໃຈຢ່າງຈິງໃຈຕໍ່ທ່ານປະທານາທິບໍດີ ທີ່ຢັ້ງຢືນການສະໜັບສະໜູນຫວຽດນາມ ເພີ່ມທະວີການພົວພັນກັບ EU ແລະ ຊຸກຍູ້ສະພາແຫ່ງຊາດອີຕາລີໃຫ້ສັດຕະຍາບັນສັນຍາຄູ່ຮ່ວມມື ແລະ ຮ່ວມມືຮອບດ້ານ PCA ແລະ ສະໜັບສະໜູນລົງນາມໃນສັນຍາການຄ້າເສລີ ລະຫວ່າງຫວຽດນາມ ແລະ EU ໂດຍໄວ, ພ້ອມທັງໃຫ້ EU ຮັບຮູ້ຂໍ້່ກຳນົດກົດລະບຽບການຕະຫຼາດຂອງຫວຽດນາມຢ່າງຄົບຖ້ວນໂດຍໄວ “.
ທ່ານປະທານາທິບໍດີ Sergio Mattarella ຢືນຢັນວ່າ: ນີ້ແມ່ນການຢ້ຽມຢາມສຳຄັນທີ່ສຸດ ເພື່ອຊຸກຍູ້ການພົວພັນຄູ່ຮ່ວມມືຍຸດທະສາດຫວຽດນາມ-ອີຕາລີ; ເຊື່ອໝັ້ນວ່າການພົວພັນຮ່ວມມືລະຫວ່າງສອງປະເທດ ຈະພັດທະນາໃນຫຼາຍຂົງເຂດຢ່າງເລິກເຊິ່ງກວ້າງຂວາງກວ່າອີກ.
ເນື່ອງໃນໂອກາດນີ້, ປະທານປະເທດຫວຽດນາມ ເຈືອງເຕິ້ນຊາງ ແລະ ປະທານາທິບໍດີ ອີຕາລີ Sergio Mattarella ເປັນສັກຂີພິຍານພິທີລົງນາມແຜນການເຄື່ອນໄຫວຜັນຂະຫຍາຍການພົວພັນຄູ່ຮ່ວມມືຍຸດທະສາດ ລະຫວ່າງ ຫວຽດນາມ-ອີຕາລີ ໄລຍະປີ 2015-2016 ແລະ ສັນຍາຮ່ວມມື ແລະ ໜູນຊ່ວຍການບໍລິຫານໃນຂົງເຂດພາສີ ລະຫວ່າງຫວຽດນາມ-ອີຕາລີ.
ແລະກໍ່ໃນຕອນບ່າຍຂອງວັນດຽວກັນ, ທ່ານປະທານສະພາແຫ່ງຊາດຫວຽດນາມ ຫງວຽນຊິງຮຸ່ງ ກໍ່ມີການຕ້ອນຮັບທ່ານປະທານາທິບໍດີ ອີຕາລີ Sergio Mattarella ທີ່ພວມຢ້ຽມຢາມຫວຽດນາມ.