ປະທານໂຮ່ຈິມິນ ໃນດວງໃຈຄູອາຈານ, ນັກຮຽນ ຢູແກຼນ
(ທ່ານນາງ Ekaterine Nhikolaievna, ຜູ້ຮັບພິດຊອບ
ຫໍພິພິດຕະພັນມິດຕະພາບຢູແກຼນ - ຫວຽດນາມ)
(vovworld) – ວັນທີ 19/05, ຢູ່ໂຮງຮຽນມັດທະຍົມໂຮ່ຈິມິນ ຢູ່ນະຄອນຫຼວງ ກີແອບ, ປະເທດຢູແກຼນ, ໄດ້ຈັດພິທີໂຮມຊຸມນຸມມິດຕິງສະເຫຼີມສະຫຼອງ 124 ປີແຫ່ງວັນຄ້າຍວັນເກີດປະທານໂຮ່ຈິມິນ ແລະ ກອງປະຊຸມສຳມະນາກ່ຽວກັບ ເພີ່ນ ດ້ວຍການເຂົ້າຮ່ວມຂອງບັນດາພະນັກງານ, ພາລະກອນສະຖານທູດຫວຽດນາມ ປະຈຳ ຢູແກຼນ ແລະ ບັນດາເພື່ອນມິດຢູແກຼນ. ທ່ານນາງ Ekaterine Nhikolaievna, ຜູ້ຮັບພິດຊອບຫໍພິພິດຕະພັນມິດຕະພາບຢູແກຼນ - ຫວຽດນາມ ສັງກັດໂຮງຮຽນໂຮ່ຈິມິນ ໃຫ້ຮູ້ວ່າ.
“ບັນດາຄະນະຜູ້ແທນຂອງສະມາຄົມມິດຕະພາບຫວຽດນາມ - ຢູແກຼນ ໄດ້ມາຢ້ຽມຢາມໂຮງຮຽນຂອງພວກຂ້າພະເຈົ້າ. ທ່ານອະດີດປະທານປະເທດຫວຽດນາມ ເຈີນດຶກເລືອງ ກໍ່ເຄີຍມາຢ້ຽມຢາມໂຮງຮຽນ ເມື່ອທ່ານມາຢ້ຽມຢາມ ຢູແກຼນ ແລະ ພວກຂ້າພະເຈົ້າກໍ່ມີຄວາມປິຕິຊົມຊື່ນທີ່ໄດ້ພົບປະກັນທ່ານໃນໂອກາດນັ້ນ. ບັນດານັກສິລະປິນ, ນັກວິທະຍາສາດ ແລະ ນັບທັງນັກເດີນອະວະກາດຜູ້ທຳອິດຂອງຫວຽດນາມ ຟ້າມຕວນ ກໍ່ມາຢ້ຽມຢາມໂຮງຮຽນ. ຫໍພິພິດຕະພັນຂອງພວກຂ້າພະເຈົ້າໄດ້ເກັບຮັກສາວັດຖຸອັນລ້ຳຄ່າຕ່າງໆ, ນັບທັງບັນດາເອກະສານຂອງຜູ້ມີຊື່ສຽງດ້ວຍລາຍເຊັນຂອງປະທານໂຮ່ຈິມິນ, ມີຮູບປະທານໂຮ່ຈິມິນ ເມື່ອເພີ່ນ ມາຢ້ຽມຢາມ ຢູແກຼນ”.