ກອງປະຊຸມສຸດຍອດ GMS ຄັ້ງທີ 8  (ພາບ: VGP)

ໃນກອງປະຊຸມ, ບັນດາການນຳໄດ້ຕົກລົງເຫັນດີສ້າງລະບົບນະວັດຕະກຳ GMS ດ້ວຍ 3 ເສົາຄ້ຳຕົ້ນຕໍ, ນັ້ນແມ່ນ: ຫັນເປັນດີຈີຕອນ, ຫັນເປັນສີຂຽວ ແລະ ການເຊື່ອມຕໍ່. ບັນດາການນຳກໍສົ່ງເສີມການສົມທົບລະຫວ່າງ GMS ກັບບັນດາກົນໄກ, ຂໍ້ລິເລີ່ມຮ່ວມມືໃນພາກພື້ນ ແລະ ອະນຸພາກພື້ນອື່ນ ເພື່ອແນໃສ່ສ້າງກຳລັງໜູນໃໝ່ແກ່ການພັດທະນາຂອງອະນຸພາກພື້ນ. ກອງປະຊຸມໄດ້ຮັບຮອງເອົາຖະແຫຼງການຮ່ວມ ແລະ ຍຸດທະສາດນະວັດຕະກຳ ເພື່ອພັດທະນາ GMS ຮອດປີ 2030. ກອງປະຊຸມກໍຮັບຮູ້ເອກະສານ 6 ສະບັບກ່ຽວກັບດິນຟ້າອາກາດ ແລະ ສິ່ງແວດລ້ອມ, ການຫັນເປັນດີຈີຕອນ, ການລົງທຶນ, ຄວາມສະເໝີພາບລະຫວ່າງຍິງ - ຊາຍ, ສາທາລະນະສຸກ, ຫັນເອກະສານການຄ້າເປັນດີຈີຕອນ ເພື່ອຜັນຂະຫຍາຍໃນໄລຍະຈະມາເຖິງ.

        ກ່າວຄຳເຫັນໃນກອງປະຊຸມ, ທ່ານນາຍົກລັດຖະມົນຕີ ຟ້າມມິງຈິງ ໄດ້ຢັ້ງຢືນເຖິງບົດບາດຍຸດທະສາດຂອງ GMS ໃນວິວັດການເຊື່ອມໂຍງເຂົ້າກັບສາກົນ ແລະ ການພັດທະນາຂອງອະນຸພາກພື້ນ; ພ້ອມທັງຖືວ່າ ໃນການເຄື່ອນໄຫວ ແລະ ພັດທະນາ, GMS ຕ້ອງສືບຕໍ່ປ່ຽນແປງໃໝ່, ປະດິດຄິດສ້າງ, ທັງກຳໄດ້ທ່າອ່ຽງລວມຂອງໂລກ, ທັງຮັບໃຊ້ຄວາມຕ້ອງການພັດທະນາສະເພາະຂອງອະນຸພາກພື້ນ. ທ່ານນາຍົກລັດຖະມົນຕີ ເນັ້ນໜັກວ່າ:

“ໃນເງື່ອນໄຂ ແລະ ສະພາບການໂລກສັບສົນຄືໃນປັດຈຸບັນ, ພວກເຮົາຕ້ອງສາມັກຄີກັນ, ຮ່ວມມືກັນຢ່າງແໜ້ນແຟ້ນ ແລະ ມີປະສິດທິຜົນກວ່າອີກ ເພື່ອຮັບມື ແລະ ຜ່ານຜ່າບັນດາສິ່ງທ້າທາຍທີ່ມີລັກສະນະຮອບດ້ານ, ຂອງທົ່ວໂລກ, ຂອງພາກພື້ນ ແລະ ຂອງທົ່ວປວງຊົນ. ດ້ວຍທັດສະນະ “ຖືຄຸນຄ່າເວລາ, ພູມປັນຍາ, ຄວາມສາມັກຄີ ແລະ ການຮ່ວມມື ເປັນສຳຄັນ”, ພວກເຮົາຕ້ອງປ່ຽນແປງໃໝ່ເພື່ອມີບາດກ້າວບຸກທະລຸ, ປະດິດຄິດສ້າງເພື່ອບືນຕົວ, ເຊື່ອມໂຍງເພື່ອພັດທະນາ”. ຂ້າພະເຈົ້າມີຄວາມເຊື່ອໝັ້ນ ແລະ ຫວັງວ່າ ໝາກຜົນຂອງກອງປະຊຸມຄັ້ງນີ້ ຈະປະກອບສ່ວນປະຕິບັດບັນດາເປົ້າໝາຍ, ໂຄງການ ແລະ ວິໄສທັດ GMS ເປັນສຳຄັນ. ຂ້າພະເຈົ້າກໍເຫັນດີເປັນເອກະພາບຮັບຮອງເອົາ “ຍຸດທະສາດນະວັດຕະກຳ GMS 2030”. ຫວຽດນາມ ໃຫ້ຄຳໝັ້ນສັນຍາສືບຕໍ່ຮ່ວມມືກັບບັນດາປະເທດສະມາຊິກ ແລະ ບັນດາຄູ່ຮ່ວມມືພັດທະນາຢ່າງແໜ້ນແຟ້ນ ເພື່ອພ້ອມກັນສ້າງອະນຸພາກພື້ນແມ່ນ້ຳຂອງເປີດກວ້າງປ່ຽນແປງໃໝ່, ປະດິດຄິດສ້າງ, ຂະຫຍັນຂັນເຄື່ອນ ແລະ ພັດທະນາແບບຍືນຍົງ, ວັດທະນາຖາວອນໃຫ້ແຕ່ລະປະເທດ ແລະ ປະຊາຊົນທຸກຄົນ”.

ທ່ານນາຍົກລັດຖະມົນຕີ ສະເໜີສາມເນື້ອໃນຫຼັກຂອງແລວເສດຖະກິດລຸ້ນໃໝ່, ລວມມີ: ແລວຂອງເຕັກໂນໂລຢີ ແລະ ນະວັດຕະກຳ; ແລວຂອງການເຕີບໂຕເສດຖະກິດ; ແລວສີຂຽວ, ຍືນຍົງ ແລະ ກວມລວມ.

ຫວູຄວຽນ