(vovworld) – ກອງປະຊຸມລັດຖະມົນຕີ ອາຊຽນ ຄັ້ງທີ 46 (AMM 46) ແລະ ບັນດາກອງປະຊຸມທີ່ກ່ຽວຂ້ອງໄດ້ສິ້ນສຸດລົງຢ່າງດີງາມຢູ່ Brunei, ດ້ວຍເລື່ອງ AMM 46 ອອກຖະແຫຼງການຮ່ວມຢືນຢັນຄວາມຕັດສິນໃຈຂອງ ອາຊຽນ ສ້າງປະຊາຄົມລວມ ໃນປີ 2015, ເນັ້ນໜັກເຖິງຄວາມສຳຄັນຂອງສັນຕິພາບ, ສະຖຽນລະພາບ, ຄວາມໝັ້ນຄົງ, ຄວາມປອດໄພໃນການເດີນທະເລຢູ່ພາກພື້ນ. ເມື່ອຕອບສຳພາດສື່ມວນຊົນພາຍຫຼັງສິ້ນສຸດກອງປະຊຸມ, ທ່ານເລຂາທິການໃຫຍ່ ອາຊຽນ ເລເລືອງມິນ ຮັບຮູ້ວ່າ: ກອງປະຊຸມລັດຖະມົນຕີ AMM 46 ແມ່ນຜົນສຳເລັດ, ສະແດງນ້ຳໃຈສາມັກຄີ, ເປັນເອກະພາບກັນຂອງ ອາຊຽນ. ກອງປະຊຸມໄດ້ຢືນຢັນຄວາມຕັດສິນໃຈຂອງ ອາຊຽນ ເພີ່ມທະວີຄວາມມານະພະຍາຍາມ ແລະ ພະຍາຍາມເພື່ອສ້າງປະຊາຄົມ ອາຊຽນ ໃຫ້ສຳເລັດໃນປີ 2015 ໃນ 3 ເສົາຄ້ຳ, ນັ້ນແມ່ນ ເສົາຄ້ຳຄວາມໝັ້ນຄົງ - ການເມືອງ, ເສົາຄ້ຳເສດຖະກິດ ແລະ ເສົາຄ້ຳວັດທະນະທຳ - ສັງຄົມ. ກ່ຽວກັບບັນຫາທະເລຕາເວັນອອກ, ທ່ານເລຂາທິການໃຫຍ່ ເລເລືອງມິນ ໃຫ້ຮູ້ວ່າ: ຄັ້ງນີ້ ອາຊຽນ ໄດ້ສະແດງນ້ຳໃຈສາມັກຄີບົນພື້ນຖານຫຼັກໝັ້ນຫຼັກການ 6 ຂໍ້ຂອງ ອາຊຽນ, ນັ້ນແມ່ນ: ໃນບັນຫາທະເລຕາເວັນອອກ, ບັນດາປະເທດ ອາຊຽນ ຕ້ອງອີງຕາມບັນດາຫຼັກການເຄົາລົບນັບຖືກົດໝາຍສາກົນ, ນັບຖືບັນດາມາດຕາຂອງສົນທິສັນຍາກົດໝາຍວ່າດ້ວຍທະເລປີ 1982 ຂອງ ສະຫະປະຊາຊາດ (UNCLOS), ແກ້ໄຂບັນດາການພິພາດກັນໂດຍສັນຕິວິທີ, ແລະ ລະງັບໃຈບໍ່ນຳໃຊ້ກຳລັງອາວຸດໃນການພົວພັນສາກົນ.
ຈີນ ແລະ ອາຊຽນ ຕົກລົງນຳກັນວ່າ: ບັນດາເຈົ້າໜ້າທີ່ຂັ້ນສູງ ອາຊຽນ ແລະ ຈີນ ຈະຈັດກອງປະຊຸມໃນເດືອນ 9/2013 ແລະ ນອກຈາກເລື່ອງປຶກສາຫາລື ບັນດາມາດຕະການເພື່ອຮັບປະກັນສືບຕໍ່ປະຕິບັດ DOC ຢ່າງຄົບຖ້ວນ ແລະ ມີປະສິດທິຜົນ, ບັນດາເຈົ້າໜ້າທີ່ຂັ້ນສູງ ອາຊຽນ ແລະ ຈີນ ກໍ່ຈະປຶກສາຫາລືກ່ຽວກັບບັນຫາມຸ້ງໄປເຖິງການສ້າງສຳເລັດ COC ຢ່າງເປັນທາງການ.