ຜູ້ມີສິດເລືອກຕັ້ງຕີລາຄາ ສູງວາລະປຶກສາຫາລື ຂອງສະພາແຫ່ງຊາດ ກ່ຽວກັບຮ່າງກົດໝາຍວ່າດ້ວຍທີ່ດິນ
ຮ່າງກົດໝາຍວ່າດ້ວຍທີ່ດິນ (ສະບັບປັບປຸງ) ໄດ້ຮັບການຖ່າຍຖອດສົດຜ່ານໂທລະພາບ
(ພາບ: VTV News)
(vovworld) - ຕອນເຊົ້າວັນທີ 06 ພະຈິກ, ວາລະປຶກສາຫາລືຂອງສະພາແຫ່ງຊາດກ່ຽວກັບບາງເນື້ອໃນທີ່ຍັງມີຄວາມເຫັນແຕກຕ່າງກັນຂອງຮ່າງກົດໝາຍວ່າດ້ວຍທີ່ດິນ (ສະບັບປັບປຸງ), ເຊິ່ງໄດ້ຮັບການຖ່າຍຖອດສົດຜ່ານໂທລະພາບ ແລະ ວິທະຍຸກະຈາຍສຽງ, ໄດ້ດຶງດູດຄວາມເອົາໃຈໃສ່ຕິດຕາມຂອງຜູ້ມີສິດເລືອກຕັ້ງພາຍໃນປະເທດເປັນຈຳນວນຫຼວງຫຼາຍ. ບັນດາຜູ້ມີສິດເລືອກຕັ້ງໄດ້ສະແດງຄວາມພາກພູມໃຈ ແລະ ປາດຖະໜາວ່າ ສະພາແຫ່ງຊາດຈະລົງມະຕິຮັບຮອງເອົາໃນກອງປະຊຸມເທື່ອນີ້. ຜູ້ມີສິດເລືອກຕັ້ງ A Byot, ແຂວງກອນຕຸມ ຖືວ່າ, ຮ່າງກົດໝາຍວ່າດ້ວຍທີ່ດິນ (ສະບັບປັບປຸງ) ໄດ້ຮັບການກະກຽມຢ່າງລອບຄອບທີ່ຖ້ວນ, ຖ້າຫາກສະພາແຫ່ງຊາດຮັບຮອງເອົາ ຈະມີການກະທົບຢ່າງຕັ້ງໜ້າເຖິງບັນດາອົງການ, ບຸກຄົນ, ຄອບຄົວນຳໃຊ້ທີ່ດິນ, ຜ່ານນັ້ນກະທົບເຖິງການພັດທະນາເສດຖະກິດສັງຄົມຂອງປະເທດ. ໂດຍເລີ່ມມາຈາກສະພາບຕົວຈິ່ງຂອງທ້ອງຖິ່ນທີ່ຍັງມີ 2.000 ຄອບຄົວບໍ່ທັນມີທີ່ດິນປຸກສ້າງເຮືອນຢູ່ ແລະ ທຳການຜະລິດ, ຜູ້ມີສິດເລືອກຕັ້ງ A Byot ສະເໜີວ່າ.
“ພວກຂ້າພະເຈົ້າສະເໜີຕໍ່ພັກ, ລັດ ແມ່ນກວດກາຄືນບັນດາເນື້ອທີ່ດິນຂອງນິຄົມກະເສດ, ຟາມທີ່ນຳໃຊ້ບໍ່ມີປະສິດທິຜົນ ແລະ ກວດຄືນເລື່ອງຕ້ອງມີແຫຼ່ງທຶນເພື່ອວັດແທກ ແລະ ຖອນຄືນທີ່ດິນຂອງນິຄົມກະເສດ, ຟາມ. ຈາກນັ້ນ ພວກເຮົາຖອນທີ່ດິນຄືນ, ມອບໃຫ້ທ້ອງຖິ່ນເພື່ອໃຫ້ທ້ອງຖິ່ນແກ້ໄຂທີ່ດິນປຸກສ້າງເຮືອນຢູ່ ແລະ ທຳການຜະລິດ ແນໃສ່ຮັບປະກັນຊີວິດສັງຄົມໃຫ້ແກ່ປະຊາຊົນ”.
ຜູ້ມີສິດເລືອກຕັ້ງ ຮ່ວາຍເທືອງ, ຢູ່ໜ່ວຍ 30 ຕາແສງອຽນທິ້ງ, ນະຄອນອຽນບ໋າຍ ຖືວ່າ.
“ຂ້າພະເຈົ້າເຫັນວ່າ ບັນດາສະມາຊິກສະພາແຫ່ງຊາດໄດ້ປຶກສາຫາລື, ປະກອບຄຳເຫັນຢ່າງກົງໄປກົງມາ ແລະ ມີຄວາມຮັບຜິດຊອບ. ຖ້າຫາກຖືກຕາມບັນດາສິ່ງທີ່ໄດ້ຮັບການປຶກສາຫາລືທີ່ສະພາແຫ່ງຊາດຄັ້ງນີ້, ໃນໄລຍະຈະມາເຖິງເລື່ອງຊື້, ຂາຍດິນ, ກຳນົດລາຄາທີ່ດິນ ຈະເຄັ່ງຄັດກວ່າ, ເລື່ອງຖອນທີ່ດິນຄືນກໍ່ຮັບປະກັນສິດຜົນປະໂຫຍດຂອງປະຊາຊົນ. ຂ້າພະເຈົ້າຫວັງວ່າ ຮ່າງກົດໝາຍວ່າດ້ວຍທີ່ດິນ (ສະບັບປັບປຸງ) ຈະໄດ້ຮັບການຮັບຮອງເອົາຜ່ານກອງປະຊຸມຄັ້ງນີ້”.