(vovworld) -ໂດຍປະຕິບັດໂຄງການດຳເນີນງານ, ຄະນະສະມາຊິກສະພາແຫ່ງຊາດຢູ່ທ້ອງຖິ່ນຕ່າງໆໄດ້ດຳເນີນການພົບປະກັບຜູ້ມີສິດເລືອກຕັ້ງ, ແຈ້ງໃຫ້ຊາບໝາກຜົນກອງປະຊຸມສະໄໝສາມັນເທື່ອທີ 10, ສະພາແຫ່ງຊາດຫວຽດນາມ ຊຸດທີ 13.
ວັນທີ 03/12, ທ່ານນາງເລຂາສູນການພັກ, ຫົວໜ້າຄະນະຂົນຂວາຍປະຊາຊົນສູນກາງ ຮ່າທິຄຽດ ແລະ ຄະນະສະມາຊິກສະພາແຫ່ງຊາດຊຸດທີ 13 ແຂວງ ຮ່າຢາງ ໄດ້ມີການພົບປະກັບຜູ້ມີສິດເລືອກຕັ້ງຢູ່ບາງທ້ອງຖິ່ນ. ທີ່ການພົບປະ, ຜູ້ມີສິດເລືອກຕັ້ງປາດຖະໜາວ່າ ບັນດາອົງການທີ່ມີໜ້າທີ່ສືບຕໍ່ເອົາໃຈໃສ່ເຖິງການລົງທຶນກໍ່ສ້າງພື້ນຖານໂຄງລ່າງໃຫ້ບັນດາຕາແສງເຂດຊາຍແດນ; ໜູນຊ່ວຍກໍ່ສ້າງຫໍພັກໃຫ້ຄູອາຈານ, ນັກຮຽນ ຮຽນຕາມຮູບແບບເຄິ່ງກິນນອນຢູ່ບັນດາໂຮງຮຽນເຂດຫ່າງໄກສອກຫຼີິກ, ເຂດຊາຍແດນ.
ຄະນະສະມາຊິກສະພາແຫ່ງຊາດແຂວງ ດັກນົງ ໄດ້ມີການພົບປະກັບຜູ້ມີສິດເລືອກຕັ້ງ ຢູ່ເທດສະບານ ຢາເຫງ້ຍ, ບັນດາເມືອງ ຕຸຍດຶກ, ດັກຣເລີບ, ດັກຊອງ, ດັກມີ. ຜູ້ມີສິດເລື່ອງຕັ້ງບັນດາທ້ອງຖິ່ນແຂວງ ດັກນົງ ໃຫ້ຂໍ້ສັງເກດວ່າ, ທີ່ກອງປະຊຸມຄັ້ງນີ້, ໄດ້ຕີລາຄາສະພາບການເສດຖະກິດ - ສັງຄົມຂອງປະເທດຊາດຢ່າງໃກ້ຊິດ. ຜູ້ມີສິດເລືອກຕັ້ງແຂວງດັກນົງ ກໍຍົກຄຳເຫັນກ່ຽວກັບບັນດາຄວາມຫຍຸ້ງຍາກ, ສິ່ງທີ່ຍັງຄົງຄ້າງໃນການຜະລິດກະສິກຳ ແລະ ຂໍ້ສະເໜີແນະບາງບັນຫາກ່ຽວຂ້ອງເຖິງການຄົມມະນາຄົມຊົນນະບົດ.
ຢູ່ແຂວງໄຕນິງ, ຄະນະສະມາຊິກສະພາແຫ່ງຊາດ ໄດ້ຮັບຟັງບັນດາຄຳເຫັນລະອຽດ ຜ່ານການພົບປະກັບຜູ້ມີສິດເລືອກຕັ້ງຄັ້ງຕ່າງໆ. ຜູ້ມີສິດເລືອກຕັ້ງໄດ້ຍົກອອກຫຼາຍບັນຫາກ່ຽວຂ້ອງເຖິງຊີວິດສັງຄົມຄື: ບັນດານະໂຍບາຍ, ລະບອບບຸລິມະສິດກ່ຽວກັບການດຶງດູດຜູ້ທີ່ມີຄວາມເກັ່ງກ້າສາມາດຂອງຂະແໜງສາທາລະນະສຸກ; ບັນຫາເງິນໃຊ້ຈ່າຍຮັບໃຊ້ນະໂຍບາຍສົ່ງເສີມການຮ່ຳຮຽນ…
ທີ່ບັນດາການພົບປະກັບຄະນະສະມາຊິກສະພາແຫ່ງຊາດແຂວງ ຈ່າວິງ ພາຍຫຼັງກອງປະຊຸມ, ຜູ້ມີສິດເລືອກຕັ້ງແຂວງ ຈ່າວິງ ສະແດງຄວາມສົນໃຈເຖິງບັນຫາປ້ອງກັນ, ຕ້ານໄພສັງຄົມ.