(vovworld) - ຕອນເຊົ້າວັນທີ 20/03, ທ່ານນາຍົກລັດຖະມົນຕີ ຫງວຽນເຕີນຢຸງ ພ້ອມກັບການນຳບາງກະຊວງ, ຂະແໜງການສູນກາງ ໄດ້ລົງຢ້ຽມຢາມ ແລະ ເຮັດວຽກກັບມະຫາວິທະຍາໄລ ເກີນເທີ. ນີ້ແມ່ນມະຫາວິທະຍາໄລຫຼາຍຂະແໜງ, ຫຼາຍຂົງເຂດ ແລະ ແມ່ນຮາກຖານບຳລຸງສ້າງ, ຄົ້ນຄວ້າວິທະຍາສາດຈຸດສຸມຂອງລັດ ຢູ່ເຂດທົ່ງພຽງແມ່ນ້ຳຂອງ. ກ່າວຄຳເຫັນທີ່ການເຮັດວຽກ, ທ່ານນາຍົກລັດຖະມົນຕີ ຫງວຽນເຕີນຢຸງ ຮຽກຮ້ອງໃຫ້ມະຫາວິທະຍາໄລ ເກີນເທີ ສືບຕໍ່ເສີມຂະຫຍາຍກາຍເປັນມະຫາວິທະຍາໄລທີ່ດີເດັ່ນ, ບຳລຸງສ້າງຫຼາຍຂະແໜງ, ຫຼາຍຂົງເຂດ, ມະຫາວິທະຍາໄລຕາມທິດຄົ້ນຄວ້າ... ທ່ານນາຍົກລັດຖະມົນຕີ ຮຽກຮ້ອງໃຫ້ມະຫາວິທະຍາໄລ ເກີນເທີ ກຳນົດ ແລະ ຊາບຊືມໜ້າທີ່ການເມືອງທີ່ມີຕໍ່ແຕ່ລະເຂດ, ສຸມໃສ່ບຳລຸງສ້າງແຫຼ່ງຊັບພະຍາກອນມະນຸດທີ່ມີຄຸນນະພາບສູງ ແລະ ຍູ້ແຮງການຖ່າຍຖອດວິທະຍາສາດ ເຕັກໂນໂລຊີເຂົ້າໃນການຜະລິດ; ສ້າງຖັນແຖວພະນັກງານ, ຄູອາຈານທີ່ສຸດຈິດສຸດໃຈ, ຮັບຜິດຊອບໜ້າທີ່ຕໍ່ວຽກງານ, ບໍ່ພຽງແຕ່ສອນດີເທົ່ານັ້ນ ຫາກຍັງຄົ້ນຄວ້າວິທະຍາສາດເກັ່ງ; ຍົກສູງຄຸນນະພາບບຳລຸງສ້າງນັບທັງ ລະດັບວິຊາຊີບ ແລະ ຄຸນສົມບັດໃຫ້ແກ່ນັກສຶກສາ ແລະ ນັກຮຽນ. ທ່ານນາຍົກລັດຖະມົນຕີໄດ້ມອບໃຫ້ບັນດາກະຊວງ, ຂະແໜງການທີ່ກ່ຽວຂ້ອງຄິດໄລ, ຈັດແບ່ງແຫຼ່ງເງິນລົງທຶນຢ່າງລະອຽດຕາມແຕ່ລະໄລຍະ ເພື່ອໃຫ້ມະຫາວິທະຍາໄລ ເກີນເທີ ສຸມໃສ່ລົງທຶນພັດທະນາພື້ນຖານດ້ານວັດຖຸໃຫ້ມີຈຸດສຸມ...