ທ່ານ Dmitry Peskov, ໂຄສົກວັງ Kremlin

ລັດເຊຍ ກຽມພ້ອມເປັນຄົນກາງໃນການເຈລະຈາລະຫວ່າງ ອາເມລິກາ ແລະ ສປປ ເກົາຫຼີ ເພື່ອແນໃສ່ບັນເທົາຄວາມເຄັ່ງຕຶງ ຖ້າຫາກວ່າ 2 ປະເທດນີ້ຍອມຮັບ ມົດສະກູ ສວມບົດບາດນີ້. ນີ້ແມ່ນເນື້ອໃນການຕອບສຳພາດຕໍ່ນັກຂ່າວຂອງໂຄສົກວັງ Kremlin, ທ່ານ Dmitry Peskov ໃນວັນທີ 26 ທັນວາ. ທ່ານ Dmitry Peskov ເນັ້ນໜັກວ່າ: ລັດເຊຍ ບໍ່ສາມາດຕັດສິນເອງເພື່ອກາຍເປັນຄົນກາງໄກ່ເກ່ຍໃນການເຈລະຈາລະຫວ່າງ ອາເມລິກາ ແລະ ສປປ ເກົາຫຼີ ໄດ້, ສິ່ງດັ່ງກ່າວແມ່ນຂຶ້ນກັບເລື່ອງ 2 ຝ່າຍເຂົ້າຮ່ວມການເຈລະຈາ. ທ່ານ Peskov ຢັ້ງຢືນເຈດຕະນາດີນີ້ຂອງ ລັດເຊຍ ພຽງແຕ່ແນໃສ່ຊ່ວຍໃຫ້ ອາເມລິກາ ແລະ ສປປ ເກົາຫຼີ ເປີດເສັ້ນທາງມຸ່ງໄປເຖິງການຫລຸດຜ່ອນຄວາມເຄັ່ງຕຶງລະຫວ່າງ 2 ຝ່າຍເທົ່ານັ້ນ.

        ກ່ອນໜ້ານັ້ນ, ວັນທີ 22 ທັນວາຜ່ານມາ, ທ່ານ Vladimir Safronkov, ອັກຄະລັດຖະທູດ ລັດເຊຍ ປະຈຳ ສປຊ ກໍ່ໃຫ້ຮູ້ວ່າ ປະເທດນີ້ກະຕຸກຊຸກຍູ້ທຸກໆຝ່າຍເຂົ້າຮ່ວມ, ພ້ອມກັນມານະພະຍາຍາມຫລຸດຜ່ອນຄວາມເຄັ່ງຕຶງໃນແຫຼມ ເກົາຫຼີ ແລະ ຢັ້ງຢືນວ່າ ລັດເຊຍ ພ້ອມແລ້ວທີ່ຈະໜູນຊ່ວຍວິວັດທະນາການນີ້.