ທ່ານປະທານປະເທດ ເຈີ່ນດ້າຍກວາງ ເຂົ້າຮ່ວມການມອບລາງວັນສື່ມວນຊົນ
(ພາບ: ສື່ເອເລັກໂຕນິກຕຳຫຼວດປະຊາຊົນ)
(vovworld) – ຕອນຄຳ່ວັນທີ 21/6, ທີ່ຫໍວັດທະນະທຳມິດຕະພາບ ຮ່າໂນ້ຍ, ໄດ້ດຳເນີນພິທີສະເຫຼີມສະຫຼອງ 91 ປີແຫ່ງວັນສື່ມວນຊົນປະຕິວັດ ຫວຽດນາມ (21/6/1925 – 21/6/2016) ແລະ ພິທີມອບລາງວັນສື່ມວນຊົນແຫ່ງຊາດຄັ້ງທີ 10 ປີ 2015. ກ່າວຄຳເຫັນທີ່ພິທີ, ທ່ານປະທານປະເທດ ເຈີ່ນດ້າຍກວາງ ໄດ້ຢັ້ງຢືນວ່າ: ດ້ວຍ 91 ປີທີ່ຮ່ວມເດີນທາງພ້ອມກັບຊາດ, ສື່ມວນຊົນ ຫວຽດນາມ ໄດ້ເຕີບໃຫຍ່, ເຂັ້ມແຂງຢ່າງບໍ່ຢຸດຢັ້ງ, ປະກອບສ່ວນຢ່າງເໝາະສົມເຂົ້າໃນພາລະກິດການຕໍ່ສູ້, ປົດປ່ອຍຊາດ, ສ້າງສາ ແລະ ປົກປັກຮັກສາປະເທດຊາດ. ສື່ມວນຊົນ ຫວຽດນາມ ໄດ້ມີບາດກ້າວພັດທະນາຢ່າງເຂັ້ມແຂງ, ນັບມື້ນັບສະແດງບົດບາດ ແລະ ທັດສະນະຂອງພັກ, ລັດ, ຂອງອົງການຈັດຕັ້ງການເມືອງ, ສັງຄົມເປັນຢ່າງດີ ແລະ ແມ່ນເວທີປາໄສຂອງປະຊາຊົນ. ທ່ານປະທານປະເທດ ເຈີ່ນດ້າຍກວາງ, ເນັ້ນໜັກວ່າ:
“ໃນຊຸມປີຈະມາເຖິງ, ສັນຕິພາບ, ການຮ່ວມມື, ການພັດທະນາຍັງແມ່ນທ່າອ່ຽງໃຫຍ່ ແຕ່ສົງຄາມ, ການປະທະກັນດ້ານເຊື້ອຊາດຜິວພັນ ແລະ ສາສະໜາ, ການຂັດແຍ່ງກ່ຽວກັບຊາຍແດນຜືນແຜ່ນດິນ, ການເຄື່ອນໄຫວກໍ່ການຮ້າຍສືບຕໍ່ໄດ້ດຳເນີນໄປຢູ່ຫຼາຍບ່ອນດ້ວຍລັກສະນະ, ລະດັບນັບມື້ນັບອັນຕະລາຍ. ໃນສະພາບການນັ້ນ, ໜ້າທີ່ໄດ້ວາງອອກໃຫ້ສື່ມວນຊົນ ຫວຽດນາມ ແມ່ນໜັກໜ່ວງ ແຕ່ສະຫງ່າລາສີທີ່ສຸດ. ສິ່ງດັ່ງກ່າວຮຽກຮ້ອງໃຫ້ຜູ້ເຮັດວຽກງານສື່ມວນຊົນຕ້ອງສືບຕໍ່ປ່ຽນໃໝ່ຢ່າງແຮງກ່ຽວກັບເນື້ອໃນ, ບືນຕົວຂຶ້ນ, ທັນສະໄໝກ່ຽວກັບຮູບແບບຈັດຕັ້ງການເຄື່ອນໄຫວ, ກ່ຽວກັບພື້ນຖານວັດຖຸດ້ານເຕັກນິກ ແລະ ເຕັກໂນໂລຢີຮັບປະກັນຄວາມປອດໄພລະບົບ ແລະ ຄວາມປອດໄພໃນດ້ານຂໍ້ມູນຂ່າວສານ. ຍົກສູງຄຸນນະພາບ, ປະສິດທິຜົນການເຄື່ອນໄຫວ, ກຳລັງດຶງດູດມະຫາຊົນ, ຕອບສະໜອງຄວາມຮຽກຮ້ອງຕ້ອງການ ແລະ ທ່າອ່ຽງເຊື່ອມໂຍງເຂົ້າກັບສາກົນຢ່າງບໍ່ຢຸດຢັ້ງ.”