(vovworld) – ວັນທີ 3/4, ສະພາແຫ່ງຊາດ ກຳປູເຈຍ ໄດ້ຮັບຮອງເອົາອະນຸສັນຍາກ່ຽວກັບຂໍ້ຕົກລົງສົ່ງເສີມ ແລະ ອາລັກຂາແກ່ການລົງທຶນລະຫວ່າງ ລັດຖະບານ ກຳປູເຈຍ ແລະ ຫວຽດນາມ. ສະມາຊິກສະພາແຫ່ງຊາດຂອງພັກປະຊາຊົນ ກຳປູເຈຍ (CPP) ກຳອຳນາດທັງໝົດ 64 ທ່ານໄດ້ເຫັນດີເປັນເອກະສັນຮັບຮອງເອົາອະນຸສັນຍາດັ່ງກ່າວ. ທ່ານ Mok Mareth, ປະທານກຳມາທິການລົງທຶນ, ກະສິກຳ, ພັດທະນາຊົນນະບົດ, ສິ່ງແວດລ້ອມ ແລະ ແຫຼ່ງນ້ຳ ຂຶ້ນກັບສະພາແຫ່ງຊາດ ກຳປູເຈຍ ໃຫ້ຮູ້ວ່າ: ບັນດາເອກະສານນີ້ສ່ວນໜຶ່ງສະແດງໃຫ້ເຫັນຄວາມໄວ້ເນື້ອເຊື່ອໃຈຂອງວົງການນັກລົງທຶນ ແລະ ສ້າງເງື່ອນໄຂອຳນວຍຄວາມສະດວກໃຫ້ແກ່ການເຄື່ອນໄຫວລົງທຶນລະຫວ່າງ 2 ປະເທດ. ທ່ານຖືວ່າ ດ້ວຍອະນຸສັນຍາດັ່ງກ່າວ, ກຳປູເຈຍ ໄດ້ມຸ່ງໄປເຖິງການດຶງດູດການລົງທຶນຈາກ ຫວຽດນາມ ແລະ ສ້າງຄວາມໄວ້ເນື້ອເຊື່ອໃຈໃຫ້ວົງການນັກລົງທຶນ ຫວຽດນາມ ຕື່ມອີກ. ໃນຂະນະນັ້ນ, ທ່ານເລຂາທິການໃຫຍ່ສະພາພັດທະນາ ກຳປູເຈຍ Sok Chenda Sophea ໄດ້ເນັ້ນໜັກວ່າຈຸດປະສົງຂອງອະນຸສັນຍານີ້ເພື່ອແນໃສ່ຮັກສາ, ຊຸກຍູ້ ແລະ ສ້າງເງື່ອນໄຂອຳນວຍຄວາມສະດວກໃຫ້ແກ່ບັນດາການເຄື່ອນໄຫວລົງທຶນລະຫວ່າງ 2 ປະເທດບ້ານໃກ້ເຮືອນຄຽງ.
ຕາມສະຫະສະມາຄົມບັນດານັກລົງທຶນ ຫວຽດນາມ ຢູ່ ກຳປູເຈຍ ແລ້ວ, ໄລ່ຮອດປີ 2013, ຫວຽດນາມ ແມ່ນນັກລົງທຶນໃຫຍ່ອັນດັບ 5 ຂອງກຳປູເຈຍ, ດ້ວຍ 128 ໂຄງການທີ່ມີຍອດມຸນຄ່າກ່ວາ 3 ຕື້ USD.