( vovworld ) - ວັນທີ 28/5, ກອງປະຊຸມສະໄໝສາມັນເທື່ອທີ 3 ສະພາແຫ່ງຊາດຫວຽດນາມ ຊຸດທີ 13 ໄດ້ກ້າວເຂົ້າສູ່ອາທິດເຮັດວຽກທີ 2. ເນື້ອໃນເຊິ່ງບັນດາ ສສຊ ໄດ້ປຶກສາຫາລືໃນວັນທີ 28/5 ແມ່ນຮ່າງກົດໝາຍວ່າດ້ວຍລາຄາ. ຮ່າງກົດໝາຍວ່າດ້ວຍລາຄາໄດ້ກຳນົດກ່ຽວກັບກົນໄກຄຸ້ມຄອງລາຄາສິນຄ້າ, ການບໍລິການ; ການປະເມີນລາຄາ, ສິດ ແລະ ພາລະຂອງບັນດາອົງການ, ສ່ວນບຸກຄົນໃນຂົງເຂດລາຄາ ແລະ ການປະເມີນລາຄາ, ການເຄື່ອນໄຫວດັດປັບລາຄາຂອງລັດ. ບັນດາຄຳເຫັນລ້ວນແຕ່ຢືນຢັນວ່າ ຕ້ອງອະນຸຍາດໃຫ້ລັດຖະບານປັບປຸງລາຄາຕາມກົນໄກການຕະຫຼາດ, ເປີດເຜີຍ, ກະຈ່າງແຈ້ງ. ບັນດາຄຳຄິດຄຳເຫັນໄດ້ຖືວ່າ ເລື່ອງສ້າງກອງທຶນຮັກສາລາຄາເປັນປົກກະຕິແມ່ນຈຳເປັນ, ແຕ່ຕ້ອງກຳນົດຢ່າງຈະແຈ້ງໃນກົດໝາຍກ່ຽວກັບລັກສະນະ, ການສ້າງຕັ້ງ, ແຫຼ່ງທຶນ ແລະ ກົນໄກຄຸ້ມຄອງກອງທຶນ. ທ່ານ Nguyen Nam Thanh, ສສຊ ແຂວງລ້າງເຊີນ, ມີຄຳເຫັນວ່າ.
“ ກ່ຽວກັບບັນຊີລາຍຊື່ສິນຄ້າ, ການບໍລິການທີ່ໄດ້ຮັບການຮັກສາລາຄາເປັນປົກກະຕິນັ້ນ ຕາມຂ້າພະເຈົ້າແລ້ວ ຄວນສຸມໃສ່ບັນດາຜະລິດຕະພັນທີ່ຈຳເປັນ ແລະ ນຳໃຊ້ໂດຍກົງຄື ນ້ຳມັນອາຍເກັດ, ໄຟຟ້າ, ຝຸ່ນ, ຢາວັກຊິນປ້ອງກັນພະຍາດທີ່ຈຳເປັນ… ກ່ຽວກັບຫຼັກການຄຸ້ມຄອງລາຄາ ຂ້າພະເຈົ້າຂໍສະເໜີໃຫ້ເພີ່ມຫຼັກການກ່ຽວກັບຄວາມກະຈາງແຈ້ງ ເພາະວ່າ ນີ້ແມ່ນຫຼັກການທີ່ສຳຄັນ. ຂ້າພະເຈົ້າສະເໜີວ່າ ຕ້ອງເພີ່ມເຕີມຢ່າງຄົບຖ້ວນກວ່າ ເພື່ອໃຫ້ລັດມີນະໂຍບາຍຄຸ້ມຄອງລາຄາ, ເພື່ອແນໃສ່ໜູນຊ່ວຍບັນດາເຂດທີ່ມີເງື່ອນໄຂເສດຖະກິດສັງຄົມປະສົບຄວາມຫຍຸ້ງຍາກ, ບັນດາຂົງເຂດຜະລິດໄດ້ຮັບບຸລິມະສິດ, ຜະລິດຕະພັນໃໝ່, ຜະລິດຕະພັນສະເພາະ ເພື່ອປະກອບສ່ວນຊຸກຍູ້ການພັດທະນາເສດຖະກິດ ແລະ ຮັບປະກັນຊີວິດສັງຄົມ. ”
ໃນຕອນບ່າຍຂອງວັນທີ 28/5, ບັນດາສະມາຊິກສະພາແຫ່ງຊາດໄດ້ປຶກສາຢູ່ໃນໜ່ວຍກ່ຽວກັບ: ແຜນຮ່າງສືບຕໍ່ປ່ຽນໃໝ່, ຍົກສູງຄຸນນະພາບ, ປະສິດທິຜົນການເຄືອ່ນໄຫວຂອງສະພາແຫ່ງຊາດ. ຄາດຄະເນການສ້າງກົດໝາຍ, ລັດຖະບັນຍັດຂອງສະພາແຫ່ງຊາດປີ 2013. ແຜນຮ່າງສືບຕໍ່ປ່ຽນໃໝ່, ຍົກສູງຄຸນນະພາບ, ປະສິດທິຜົນການເຄືອ່ນໄຫວຂອງສະພາແຫ່ງຊາດສຸມໃສ່ສອງບັນຫາ: ເພີ່ມທະວີຄວາມຮັບຜິດຊອບຂອງບັນດາອົງການເປັນເຈົ້າການ ແລະ ອົງການກວດສອບໃນການສະເໜີບັນດາກົດໝາຍ ແລະ ຮ່າງກົດໝາຍ, ກວດສອບຮ່າງງົບປະມານແຫ່ງລັດປະຈຳປີ; ປ່ຽນໃໝ່ການເຄືອ່ນໄຫວພົບປະກັບຜູ້ມິສິດເລືອກຕັ້ງຂອງ ສສຊ. ທ່ານນາງ Nguyen Thi Nguyet Huong ສສຊ ນະຄອນຮ່າໂນ້ຍ ສະເໜີຄຳເຫັນ:
“ຂ້າພະເຈົ້າເຫັນດີເປັນເອກະພາບຕໍ່ກັບການປ່ອນບັດໄວ້ວາງໃຈ ສຳລັບບາງຕຳແໜ່ງໂດຍສະພາແຫ່ງຊາດແຕ່ງຕັ້ງ ຫລືໃຫ້ສັດຕະຍາບັນ. ເລື່ອງປ່ອນບັດໄວ້ວາງໃຈເຮັດໃຫ້ການເຄື່ອນໄຫວຂອງສະພາແຫ່ງຊາດມີສິດຫຼາຍກ່ວາ ແລະ ລັດຖະບານກໍຍົກສູງຄວາມຮັບຜິດຊອບຕໍ່ພັກ, ປະຊາຊົນ. ຂ້າພະເຈົ້າສະເໜີວ່າ: ການພົບປະກັບຜູ້ມີສິດເລືອກຕັ້ງຕ້ອງມີຫຼາຍຮູບຫຼາຍແບບ, ອາດຈະພົບປະຕາມຫົວເລື່ອງສະເພາະ, ລົງພົບປະຢູ່ທ້ອງຖິ່ນ, ຢູ່ບ່ອນເຮັດວຽກ….“