(vovworld) ​​- ​ໂດຍ​ສືບ​ຕໍ່​ກອງ​ປະຊຸມ​ສະ​ໄໝ​ສາມັນ​ເທື່ອ​ທີ 8, ສະພາ​ແຫ່ງ​ຊາດ​ຊຸດ​ທີ 13, ວັນ​ທີ 12/11, ສະພາ​ແຫ່ງ​ຊາດ​ໄດ້​ປຶກສາ​ຫາລື​ກ່ຽວ​ກັບ​ຮ່າງ​ກົດໝາຍ 3 ສະບັບ. ຕອນ​ເຊົ້າ​, ສະພາ​ແຫ່ງ​ຊາດ​ໄດ້​ຈັດ​ຕັ້ງ​ກອງ​ປະຊຸມ​ຄົບ​ຄະນະ​ຢູ່​ຫໍ​ປະຊຸມ, ​ຮັບ​ຟັງ​ບົດ​ສະ​ເໜີ ​ແລະ ບົດ​ລາຍ​ງານ​ກວດກາ​ ກ່ຽວ​ກັບຮ່າງ​ກົດໝາຍ​ວ່າ​ດ້ວຍ​ຄວາມ​ປອດ​ໄພສຸຂະ​ອະນາ​ໄມ​​ໃນການ​ອອກ​ແຮງ​ງານ; ພ້ອມ​ທັງ​ປຶກສາ​ຫາລື ກ່ຽວ​ກັບ​ຮ່າງ​ກົດໝາຍ​ວ່າ​ດ້ວຍ​ແນວ​ໂຮມ​ປະ​ເທດ​ຊາດ​ຫວຽດນາມ (ສະບັບ​ປັບປຸງ). ຕອນ​ບ່າຍ, ບັນດາ​ສະມາຊິກ​ສະພາ​ແຫ່ງ​ຊາດ ​ໄດ້​ປຶກສາ​ຫາລື​ຢູ່​ໜ່ວຍ ກ່ຽວ​ກັບ​ຮ່າງ​ກົດໝາຍ​ວ່າ​ດ້ວຍ​ພັນທະ​ການທະຫານ (ສະບັບ​ປັບປຸງ) ​ແລະ ຮ່າງ​ກົດໝາຍ​ວ່າ​ດ້ວຍ​ຄວາມ​ປອດ​ໄພ ​ແລະ ສຸຂະ​ອະນາ​ໄມ​​ໃນການ​ອອກ​ແຮງ​ງານ. ກ່ອນ​ໜ້າ​ນັ້ນ, ວັນ​ທີ 11/11, ​ແຜນ​ຮ່າງ​ປ່ຽນ​ໃໝ່​ຫຼັກ​ສຸດ, ປຶ້ມ​ຕຳລາ​ຮຽນ​ສາມັນ​ສຶກສາ ​ແມ່ນ​ໜຶ່ງ​ໃນ​ບັນດາ​ເນື້ອ​ໃນ​ທີ່​ມີ​ສະມາ​ຊິກ​ສະພາ​ແຫ່ງ​ຊາດ​ຫຼາຍ​ທ່ານ​ປະກອບ​ຄຳ​ເຫັນ. ຕາມ​ສະມາຊິກ​ສະພາ​ແຫ່ງ​ຊາດ​ຫຼາຍ​ທ່ານ​ແລ້ວ, ຄຽງ​ຂ້າງ​ການ​ປ່ຽນ​ໃໝ່​ປຶ້ມ​ຕຳລາ​ຮຽນ, ຄວນ​ປ່ຽນ​ໃໝ່​ວິທີ​ການສິດ​ສອນ ​ແລະ ​ເພີ່ມ​ເງິນ​ເດືອນ​ໃຫ້​ຄູ​ອາຈານ​ຕື່ມ​ອີກ, ປະກອບສ່ວນ​ແກ້​ໄຂ​ບັນດາສິ່ງ​ທີ່​ຍັງ​ຄົງ​ຄ້າງ, ​ໃນ​ນັ້ນ​ມີ​ສະ​ພາບ​ສອນ​​ ​ເພີ່ມ ​ແລະ ຮຽນ​​​ເພີ່ມ​​ໃນ​ປະຈຸ​ບັນ.