ກອງປະຊຸມ EAS ຄັ້ງທີ 10 ຢູ່ ມາເລເຊຍ
|
(vovworld) –ກອງປະຊຸມ ຄັ້ງທີ 1 ລະຫວ່າງເອກອັກຄະລັດຖະທູດ ປະຈຳ ອາຊຽນ ຂອງ 18 ປະເທດເຂົ້າຮ່ວມກອງປະຊຸມຂັ້ນສູງ ອາຊີຕາເວັນອອກ (EAS) ຖືກຈັດຂຶ້ນຢູ່ ຈາກາກຕາ, ປະເທດ ອີນໂດເນເຊຍ ໃນວັນທີ 8/4, ດ້ວຍການເຂົ້າຮ່ວມຂອງກຳມາທິການບັນດາຜູ້ຕາງໜ້າປະຈຳ ອາຊຽນ (CPR) ແລະ ເອກອັກຄະລັດຖະທູດ ປະຈຳ ອາຊຽນ ຂອງ 8 ປະເທດຄູ່ຮ່ວມມືເຂົ້າຮ່ວມ EAS (ອົດສະຕາລີ, ຈີນ, ອິນເດຍ, ຍີ່ປຸ່ນ, ນິວຢີແລນ, ສ. ເກົາຫຼີ, ລັດເຊຍ ແລະ ອາເມລິກາ). ທ່ານເອກອັກຄະລັດຖະທູດ ຫວຽດນາມ ຫງວຽນແຮ່ວງນຳ, ຫົວໜ້າຄະນະຜູ້ຕາງໜ້າ ຫວຽດນາມ ປະຈຳ ອາຊຽນ ໄດ້ເຂົ້າຮ່ວມກອງປະຊຸມ. ທີ່ກອງປະຊຸມ, ບັນດາປະເທດເຫັນດີເປັນເອກະສັນຄວນມານະພະຍາຍາມຮັບປະກັນກົນໄກແລກປ່ຽນຂັ້ນເອກອັກຄະລັດຖະທູດ ປະຈຳ ອາຊຽນ ເປັນປະຈຳເພື່ອເຄື່ອນໄຫວຢ່າງມີປະສິດທິຜົນ ແລະ ແທດຈິງ. ໄປຄຽງຄູ່ກັບວຽກງານຜັນຂະຫຍາຍບັນດາຂໍ້ລິເລີ່ມ, ຂໍ້ຕົກລົງຂອງການນຳຂັ້ນສູງ, ກົນໄກນີ້ຍັງສາມາດເຂົ້າຮ່ວມການຮຽບຮຽງບັນດາເອກະສານ, ຖະແຫຼງການຮ່ວມເພື່ອຍື່ນສະເໜີຕໍ່ການນຳຮັບຮອງເອົາ, ກໍ່ຄືຜັນຂະຫຍາຍບົດບາດແມ່ນຊ່ອງແລກປ່ຽນ ແລະ ທາບທາມຄວາມເຫັນ ແລະ ໃຫ້ຄຳປຶກສາໂດຍກົງກ່ຽວກັບບັນດາບັນຫາທີ່ຕ່າງຝ່າຍຕ່າງມີຄວາມສົນໃຈ. ກົນໄກນີ້ຈະເຄື່ອນໄຫວບົນພື້ນຖານບັນດາຫຼັກການຂອງ EAS ກັບ ອາຊຽນ ສວມບົດບາດນຳພາ.