(vovworld) – ເມື່ອຕອບສຳພາດຕໍ່ນັກຂ່າວ ວິທະຍຸກະຈາຍສຽງ ຫວຽດນາມ ປະຈຳສະຫະພັນ ລັດເຊຍ, ຕໍ່ໜ້າເລື່ອງ ຈີນ ຕັ້ງຮ້ານເຈາະນ້ຳມັນ ໄຮຢາງ - 981 ໃນເຂດທະເລຂຶ້ນກັບເຂດໄຫຼ່ທະວີບ ແລະ ເຂດເສດຖະກິດຈຳເພາະຂອງ ຫວຽດນາມ, ນຳໃຊ້ກຳປັ່ນຫຼາຍລຳ, ທັງກຳປັ່ນການທະຫານເກາະຜິດກັບກຳລັງຕຳຫຼວດທະເລ ຫວຽດນາມ, ບຸກໂຈມຕີຊາວປະມົງ ຫວຽດນາມ ນັ້ນ... ສາດສະດາຈານ Vladimir Kolotov, ນັກຄົ້ນຄ້ວາ ຫວຽດນາມ, ຫົວໜ້າວິຊາປະຫວັດສາດບັນດາປະເທດຕາເວັນອອກໄກ, ຫົວໜ້າສະຖາບັນ ໂຮ່ຈີມິນ ຂຶ້ນກັບພະແນກຝ່າຍຕາເວັນອອກ - ມະຫາວິທະຍາໄລສັງລວມແຫ່ງຊາດ ແຊງ ເບແຕກບົວ, ຖືວ່າສິ່ງດັ່ງກ່າວໄດ້ລະເມີດກົດໝາຍສາກົນ ແລະ ຊີ້ແຈ້ງວ່າ ນັ້ນແມ່ນຍຸດທະສາດຍາວນານຂອງ ຈີນ ເພື່ອແນໃສ່ຄວບຄຸມໝູ່ເກາະຮ່ວາງຊາ ແລະ ເຈື່ອງຊາ ຂອງ ຫວຽດນາມ ນັບທັງທະເລຕາເວັນອອກ. ສາດສະດາຈານ Vladimir Kolotov, ຖືວ່າ:
“ຂ້າພະເຈົ້າຄິດວ່າ, 2 ປະເທດ ຈີນ ແລະ ຫວຽດນາມ ຄວນອີງໃສ່ບັນດາບົດຮຽນທີ່ດີໃນປະຫວັດສາດເພື່ອຜ່ານຜ່າການທ້າທາຍຄືປະຈຸບັນ. ບັນດານັກຍຸດທະສາດຜູ້ມີຜົນສະທ້ອນຈະຕົກລົງວ່າ ປະຈຸບັນຕ້ອງເຮັດຫຍັງ ແລະ ດຳເນີນຄືແນວໃດເພື່ອຮັບປະກັນຄວາມສະຫງົບປອດໄພໃນພາກພື້ນ ແລະ ຄວາມສະຫງົບປອດໄພຂອງແຕ່ລະປະເທດ.”
ເມື່ອຕອບຄຳຖາມຕໍ່ນັກຂ່າວສຳນັກຂ່າວສານ AP ແລະ Reuters ທ່ານນາຍົກລັດຖະມົນຕີ ຫງວຽນເຕີນຢູ້ງ ໄດ້ເວົ້າວ່າ: “ຫວຽດນາມ ຈະບໍ່ແລກເອົາສັນຕິພາບ, ມິດຕະພາບແບບລະເມີເຟີຝັນ ດ້ວຍເອກະລາດ, ອະທິປະໄຕຂອງຕົນ”, ສາດສະດາຈານ Vladimir Kolotov ເນັ້ນໜັກວ່າ: ສິ່ງດັ່ງກ່າວແມ່ນມູນເຊື້ອຂອງຊາດ ຫວຽດນາມ ແລະ ບໍ່ມີການນຳຜູ້ໃດຂອງ ຫວຽດນາມ ອາດຈະຕົກລົງຕໍ່ການກະທຳຂອງ ຈີນຢູ່ທະເລຕາເວັນອອກ:
“ປະທານ ໂຮ່ຈີມິນໄດ້ ເວົ້າວ່າ “ບໍ່ມີຫຍັງລ້ຳຄ່າກ່ວາເອກະລາດ, ເສລີພາບ”, ພາຍຫຼັງໄຊຊະນະ ດ້ຽນບຽນຝູ ພົນເອກ ຫວໍງວຽນຢາບກໍ່ເວົ້າວ່າ “ພວກເພີ່ນປະລາໄຊຍ້ອນບໍ່ເຂົ້າໃຈປະຫວັດສາດຫວຽດນາມ”. ເພື່ອຍາດເອົາເອກະລາດ, ອະທິປະໄຕ, ເສລີພາບໃຫ້ແກ່ປະເທດ ຫວຽດນາມ ຕ້ອງເສຍສະຫຼະເລືອດເນື້ອ ບໍ່ຈັກວ່າເທົາໃດ, ດັ່ງນັ້ນຕ້ອງຮັກສາໄວ້, ນັ້ນແມ່ນອິດທິພົນຊື່ສຽງເຊິ່ງ ຫວຽດນາມ ຍາດມາໄດ້ໃນປະຫວັດສາດນັບພັນປີຂອງຕົນ. ແລະ ສະຕະວັດທີ 20 ໄດ້ພິສູດໃຫ້ເຫັນສິ່ງດັ່ງກ່າວຢ່າງຈະແຈ້ງ.”
ກ່ຽວກັບບົດຂຽນຂອງນັກຂ່າວ ລັດເຊຍ ໃນແວບໄຊຂອງສຳນັກຂ່າວສານລັດເຊຍ Ria Novosti, ສາດສະດາຈານ Vladimir Kolotov ໃຫ້ຮູ້ວ່າ: Ria Novosti ແມ່ນສຳນັກຂ່າວສານໂດ່ງດັງ ແລະ ມີອິດທິພົນຊື່ສຽງຂອງ ລັດເຊຍ, ດັ່ງນັ້ນທ່ານຮູ້ສຶກເສຍດາຍເມື່ອມີບົດຂຽນດ້ວຍເນື້ອໃນທີ່ຜິດພາດຄືແນວນັ້ນ. ທ່ານຖືວ່າ, ນີ້ແມ່ນຄຳເຫັນສ່ວນຕົວຂອງຜູ້ຂຽນ Kosyrev, ຫາກບໍ່ແມ່ນທັດສະນະທາງການຂອງປະເທດ ລັດເຊຍ.