(vovworld) - ຄະນະກຳມະການປະສົມຈັດຕັ້ງກອງປະຊຸມຮ່ວມມືບໍ່ລວມສູນ ຫວຽດນາມ - ຝລັ່ງ ຄັ້ງທີ 9 ໄດ້ຈັດກອງປະຊຸມໃນວັນທີ 21/05, ຢູ່ນະຄອນຫຼວງປາຣີ, ປະເທດຝລັ່ງ, ເພື່ອປຶກສາຫາລືບັນດາບັນຫາສຸດທ້າຍຂອງວຽກງານຈັດຕັ້ງເຫດການສຳຄັນເພື່ອເປີດສາກໃຫ້ແກ່ ປີພົວພັນລະຫວ່າງຫວຽດນາມ - ຝລັ່ງ. ກອງປະຊຸມຄັ້ງນີ້ໄດ້ດຳເນີນໄປແຕ່ວັນທີ 09 – 12/06, ຢູ່ນະຄອນ Brest, ມຸ້ງໄປເຖິງຈຸດໝາຍໃຫຍ່ແມ່ນເພີ່ມທະວີການພົວພັນລະຫວ່າງຫວຽດນາມ - ຝລັ່ງ, ຕາມຈິດໃຈຄູ່ຮ່ວມມື ແລະ ອີງໃສ່ພື້ນຖານໝາກຜົນຂອງກອງປະຊຸມຄັ້ງກ່ອນ ເຊິ່ງຖືກດຳເນີນໄປຢູ່ນະຄອນຫາຍຟ່ອງ. ດ້ວຍຫົວຂໍ້ທິ່ວ່າ “ມຸ້ງໄປເຖິງຮູບແບບພັດທະນາໃໝ່: ຫນ້າທີ່ຮັບຜິດຊອບ ແລະ ໂອກາດໃດໃຫ້ແກ່ບັນດາທ້ອງຖິ່ນຂອງຝລັ່ງ, ຫວຽດນາມ ແລະ ຜູ້ຮ່ວມມືຂອງທັງ 2 ຝ່າຍ?”, ກອງປະຊຸມໄດ້ວາງຈຸດສຸມໄຈ້ແຍກບັນດາສິ່ງທ້າທາຍ ແລະ ແງ່ຫວັງ, ການພົວພັນລະຫວ່າງທ້ອງຖິ່ນຂອງ 2 ປະເທດ. ທ່ານ Michel Morvan, ຮອງຜູ້ອຳນວຍການຍຸດທະສາດເຂດຕົວເມືອງ Brest ໃຫ້ຮູ້ວ່າ.
“ກອງປະຊຸມຄັ້ງນີ້ຈະພິຈາລະນາເລື່ອງຮ່ວມມືບໍ່ລວມສູນລະຫວ່າງບັນດາທ້ອງຖິ່ນຂອງຝລັ່ງ ແລະ ຫວຽດນາມ ໃນຫຼາຍຂົງເຂດຄື: ການສຶກສາ, ວັດທະນະທຳ, ເສດຖະກິດ, ພັດທະນາເຂດຕົວເມືອງ... ກອງປະຊຸມຈະເປີດໂອກາດເພື່ອໃຫ້ບັນດາການນຳຫວຽດນາມ ແລະ ຝລັ່ງ, ລະຫວ່າງທ້ອງຖິ່ນຂອງ 2 ຝ່າຍ ພ້ອມກັນຄົ້ນຄວ້າ ເພື່ອຊອກຫາຮູບແບບພັດທະນາການຮ່ວມມືໃໝ່. ເຮັດແນວໃດເພື່ອໃຫ້ໃນໄລຍະ 30 ປີຈະມາເຖິງ, ພວກເຮົາຈະພ້ອມກັນເຮັດ ແລະ ຜັນຂະຫຍາຍພື້ນຖານໃໝ່, ຮູບແບບພັດທະນາໃໝ່”.