ຫວຽດນາມ ປາດຖະໜາວ່າ ອາເມລິກາ ປະກອບສ່ວນເພື່ອຄວາມໝັ້ນຄົງ ແລະ ການພັດທະນາຢູ່ ອາຊີ
ເອກອັກຄະລັດຖະທູດ ຫວຽດນາມ ປະຈຳ ອາເມລິກາ ທ່ານ ຫງວຽນກວກເກື່ອງ ເຂົ້າຮ່ວມດ້ວຍຖານະເປັນນັກປາຖະກະຖາຕົ້ນຕໍ່
(vovworld) – ຄວາມໝັ້ນຄົງ, ເສດຖະກິດ ແລະ ແງ່ຫວັງດຳເນີນທຸລະກິດແມ່ນບັນດາຫົວຂໍ້ຕົ້ນຕໍ່ຂອງກອງປະຊຸມສຳມະນາ “ໂຄງປະກອບພາກພື້ນ ອາຊີ” ທີ່ຫາກໍ່ໄດ້ຮັບການຈັດຕັ້ງຢູ່ນະຄອນຫຼວງ ວໍຊິງຕັນ, ປະເທດ ອາເມລິກາ, ກ່ອນທີ່ດຳເນີນເວທີປາໄສຮ່ວມມື ອາຊີ - ປາຊີຟິກ (APEC) ແລະ ກອງປະຊຸມສຸດຍອດອາຊີຕາເວັນອອກ (EAS) ໃນເດືອນ 10 ຈະມາເຖິງ. ເອກອັກຄະລັດຖະທູດ ຫວຽດນາມ ປະຈຳ ອາເມລິກາ ທ່ານ ຫງວຽນກວກເກື່ອງ ເຂົ້າຮ່ວມດ້ວຍຖານະເປັນນັກປາຖະກະຖາຕົ້ນຕໍ່. ກ່າວຄຳເຫັນທີ່ກອງປະຊຸມສຳມະນາໂດຍສູນຄົ້ນຄ້ວາຍຸດທະສາດ ແລະ ສາກົນ (CSIS) ເປັນເຈົ້າພາບຈັດຕັ້ງ, ທ່ານເອກອັກຄະລັດຖະທູດ ຫງວຽນກວກເກື່ອງ ຢັ້ງຢືນກອງປະຊຸມສຸດຍອດ ອາຊີຕາເວັນອອກ ແມ່ນເວທີປາໄສເຕົ້າໂຮມບັນດາການນຳໂລກ ເພື່ອແລກປ່ຽນກ່ຽວກັບບັນດາບັນຫາຍຸດທະສາດ ແລະ ມີບົດບາດສຳຄັນໃນການພັດທະນາບັນດາຫຼັກການ ແລະ ຂອບເຂດພາກພື້ນ. ກອງປະຊຸມຄວນສືບຕໍ່ປັບປຸງບົບບາດນີ້ໃນການຊຸກຍູ້ການໂອ້ລົມສົນທະນາ, ການຮ່ວມມື, ການສ້າງຄວາມໄວ້ເນື້ອເຊື່ອໃຈເພື່ອຮັບປະກັນສັນຕິພາບ, ສະຖຽນລະພາບ, ການພັດທະນາ, ຄວາມໝັ້ນຄົງ..., ແກ້ໄຂບັນດາການພິດພາດບົນພື້ນຖານກົດໝາຍສາກົນໂດຍສັນຕິ, ສະໜັບສະໜູນຄວາມມານະພະຍາຍາມຂອງ ອາຊຽນ ແລະ ຈີນ ໃນການປະຕິບັດຖະແຫຼງການກ່ຽວກັບການປະພຶດຂອງຝ່າຍຕ່າງໆຢູ່ທະເລຕາເວັນອອກ (DOC) ຢ່າງມີປະສິດທິຜົນ, ມຸ່ງໄປເຖິງປະມວນຫຼັກການກ່ຽວກັບການປະພຶດຢູ່ທະເລຕາເວັນອອກ (COC). ທ່ານເອກອັກຄະລັດຖະທູດ ຫງວຽນກວກເກື່ອງ ໃຫ້ຮູ້ວ່າ: ຫວຽດນາມ ແມ່ນໜຶ່ງໃນບັນດາປະເທດທຳອິດທີ່ສະໜັບສະໜູນ ອາເມລິກາ ເຂົ້າຮ່ວມກອງປະຊຸມສຸດຍອດ ອາຊີຕາເວັນອອກ ແລະ ຫວັງວ່າ ອາເມລິກາ ຈະປະກອບສ່ວນເຂົ້າໃນສັນຕິພາບ, ສະຖຽນລະພາບ ແລະ ຄວາມວັດທະນາຖາວອນໃນພາກພື້ນ.