ຫວຽດນາມ - ອົດສຕາລີ ເພີ່ມທະວີການຮ່ວມມືປ້ອງກັນຄວາມສະຫງົບບົນທະເລ
(ພາບປະກອບ)
(vovworld) – ວັນທີ 18/03, ພົນໂທ ຫງວຽນຈິວິ້ງ, ລັດຖະມົນຕີຊ່ວຍວ່າການກະຊວງປ້ອງກັນປະເທດຫວຽດນາມ ໄດ້ມີການພົບປະເຈລະຈາກັບທ່ານ Kevin Andrews, ລັດຖະມົນຕີວ່າການກະຊວງປ້ອງກັນປະເທດອົດສຕາລີ. ທີ່ການພົບປະ, ພົນໂທ ຫງວຽນຈິວິ້ງ ແລະ ທ່ານລັດຖະມົນຕີ Kevin Andrews ໄດ້ຕີລາຄາສູງໝາກຜົນການຮ່ວມມືລະຫວ່າງກະຊວງປ້ອງກັນປະເທດຂອງ 2 ປະເທດ ໃນບັນດາຂົງເຂດຄື: ແລກປ່ຽນ, ແບ່ງປັນຂໍ້ມູນຕ້ານກໍ່ການຮ້າຍ, ບຳລຸງສ້າງ, ຕ້ານກໍ່ການຮ້າຍ ແລະ ບົດຮຽນໃນການເຂົ້າຮ່ວມການເຄື່ອນໄຫວປົກປັກຮັກສາສັນຕິພາບຂອງສະຫະປະຊາຊາດ. ໃນໄລຍະຈະມາເຖິງ, 2 ຝ່າຍສືບຕໍ່ເຫັນດີເສີມຂະຫຍາຍກ່ຽວກັບບັນດາຂົງເຂດດັ່ງກ່າວໃຫ້ມີປະສິດທິຜົນກວ່າອີກ; ພິເສດແມ່ນເພີ່ມທະວີການຮ່ວມມືໃນຂົງເຂດປ້ອງກັນຄວາມສະຫງົບບົນທະເລ, ປະກອບສ່ວນຮັບປະກັນສັນຕິພາບ, ສະຖຽນລະພາບ ແລະ ຄວາມເສລີໃນການເດີນທະເລຢູ່ທະເລຕາເວັນອອກ ແລະ ພາກພື້ນ, ແທດເໝາະກັບກົດໝາຍສາກົນ. ທ່ານລັດຖະມົນຕີ Kevin Andrews ຢືນຢັນວ່າ, ໃນໄລຍະຈະມາເຖິງ, ອົດສຕາລີ ຈະແມ່ນໜຶ່ງໃນບັນດາຄູ່ຮ່ວມມືອັນດັບໜຶ່ງໃນການຊ່ວຍເຫຼືອ, ໜູນຊ່ວຍຫວຽດນາມ ເຂົ້າຮ່ວມການເຄື່ອນໄຫວປົກປັກຮັກສາສັນຕິພາບຂອງສະຫະປະຊາຊາດ.
ກ່ອນໜ້ານັ້ນ, ພົນໂທ ຫງວຽນຈິວິ້ງ ແລະ ພົນຕີ John Frewen, ຮອງຜູ້ບັນຊາການກະຊວງປ້ອງກັນປະເທດອົດສຕາລີ ໄດ້ລົງນາມໃນຂໍ້ຕົກລົງປະຕິບັດບົດບັນທຶກຊ່ວຍຈຳລະຫວ່າງກະຊວງປ້ອງກັນປະເທດ 2 ປະເທດ ກ່ຽວກັບການຮ່ວມມືໃນຂົງເຂດປົກປັກຮັກສາສັນຕິພາບ ແລະ ເປັນສັກຂີພິຍານພິທີລົງນາມໃນບົດບັນທຶກຊ່ວຍຈຳລະຫວ່າງຄະນະຊີ້ນຳແຫ່ງລັດກ່ຽວກັບການເຄື່ອນໄຫວແຫ່ງຊາດແກ້ໄຂມຜົນຮ້າຍຢ້ອນຫຼັງຈາກລູກລະເບີດບໍ່ທັນແຕກພາຍຫຼັງສົງຄາມຢູ່ຫວຽດນາມ.
ຫວຽດນາມແລະອົດສະຕາລີເປີດກວ້າງການຮ່ວມມືດ້ານການສຶກສາ,ບຳລຸງສ້າງ
(vovworld)-ໃນຂອບເຂດການຢ້ຽມຢາມອົດສະຕາລີຢ່າງເປັນທາງການຂອງທ່ານນາຍົກລັດຖະມົນຕີ ຫງວຽນເຕີນຢູງ, ວັນທີ 17/3, ກະຊວງສຶກສາວົງຄະນາຍາດ ລັດ New South Wales, ພະແນກ ສຶກສາ ແລະ ບຳລຸງສ້າງ ນະຄອນ ໂຮ່ຈິມີນ ແລະ ບໍລິສັດ EMG Education ໄດ້ລົງນາມໃນບົດບັນທຶກຊ່ວຍຈຳ “ເປີດກວ້າງຂໍ້ຕົກລົງການຮ່ວມມືພັດທະນາໃນຂົງເຂດການສຶກສາ ບຳລຸງສ້າງ”. ນີ້ແມ່ນຫນຶ່ງໃນບັນດາຂໍ້ຕົກລົງລະອຽດທີ່ບັນລຸໄດ້ໃນການຢ້ຽມຢາມ, ປະກອບສ່ວນນຳການພົວພັນສອງປະເທດໃນຂົງເຂດການສຶກສາ ບຳລຸງສ້າງສືບຕໍ່ເຂົ້າສູ່ລວງເລິກ, ມີປະສິດທິຜົນ ແລະແທດຈິງ. ຕາມນັ້ນແລ້ວ, ກະຊວງສຶກສາວົງຄະນາຍາດ ລັດ New South Wales ຈະນຳບັນດາຫລັກສູດສອນວິຊາຊີບ ແລະ ວິທະຍາໄລເພື່ອນຳໃຊ້ ຢູ່ໂຮງຮຽນວິທະຍາໄລ, ອາຊີວະຊັ້ນກາງ ຢູ່ ນະຄອນ ໂຮ່ຈິມີນ. ເລື່ອງຜັນຂະຫຍາຍບັນດາເນື້ອໃນຂອງໂຄງການຮ່ວມມືຈະປະກອບສ່ວນນຳມາເຊິ່ງຜົນປະໂຫຍດຢ່າງແທດຈິງໃຫ້ແກ່ການພັດທະນາຂອງຂະແຫນງສຶກສາ ແລະບຳລຸງສ້າງນະຄອນໂຮ່ຈິມິນ.