(vovworld) - ຄະນະຜູ້ແທນຫວຽດນາມ ໂດຍທ່ານລັດຖະມົນຕີກະຊວງວິທະຍາສາດ ແລະ ເຕັກໂນໂລຢີຫວຽດນາມ Nguyen Quan ນຳໜ້າ ໄດ້ເຂົ້າຮ່ວມກອງປະຊຸມຂອງສະຫະປະຊາຊາດກ່ຽວກັບວິທະຍາສາດ ແລະ ເຕັກໂນໂລຢີ ເພື່ອການພັດທະນາດ້ວຍຫົວຂໍ້ວ່າ: “ການນຳໃຊ້ວິທະຍາສາດ ແລະ ເຕັກໂນໂລຢີ ເພື່ອແກ້ໄຂບັນດາການທ້າທາຍຕໍ່ການພັດທະນາ” ແຕ່ວັນທີ 21 – 25/5 ຢູ່ສຳນັກງານສະຫະປະຊາຊາດ ຢູ່ເຊີແນວ ປະເທດສະວິດ. ກ່າວຄຳເຫັນທີ່ວາລະປຶກສາຫາລືໂຕະມົນຂັ້ນລັດຖະມົນຕີເມື່ອວັນທີ 21/5, ທ່ານລັດຖະມົນຕີ Nguyen Quan ໄດ້ຊີ້ແຈງບາງຜົນງານກ່ຽວກັບວິທະຍາສາດ ແລະ ເຕັກໂນໂລຢີສຳຄັນ ປະກອບສ່ວນຫຼາຍພໍສົມຄວນເຂົ້າໃນວິວັດການພັດທະນາເສດຖະກິດຂອງຫວຽດນາມ ໃນໄລຍະຜ່ານມາ. ວັນທີ 22/5, ຢູ່ນອກກອງປະຊຸມ, ທ່ານລັດຖະມົນຕີ Nguyen Quan ໄດ້ມີການເຮັດວຽກກັບ ທ່ານ Francis Gurry, ຜູ້ອຳນວຍການອົງການຊັບສິນທາງປັນຍາສະຫະປະຊາຊາດ (ຫຼື WIPO). ທ່ານລັດຖະມົນຕີສະເໜີວ່າ: ຜູ້ອຳນວຍການໃຫຍ່ WIPO ຊ່ວຍເຫຼືອ ຫວຽດນາມ 4 ບັນຫາຄື: ກໍສ້າງ ແລະ ຜັນຂະຫຍາຍໂຄງການແຫ່ງຊາດກ່ຽວກັບຊັບສິນທາງປັນຍາ, ເຊິ່ງແມ່ນເນື້ອໃນໜຶ່ງນອນໃນ “ຍຸດທະສາດພັດທະນາວິທະຍາສາດ ແລະ ເຕັກໂນໂລຢີໄລຍະ 2011 - 2020”, ສ້າງ 3 ເຄື່ອງໝາຍການຄ້າໃຫ້ແກ່ກະສິກຳ, ກໍ່ສ້າງສູນພັດທະນາຊັບສິນທາງປັນຍາ ຢູ່ເຂດເຕັກໂນໂລຢີສູງ ຮ່ວາລາກ, ແລະ ບຳລຸງສ້າງແຫຼ່ງຊັບພະຍາກອນມະນຸດ. ຜູ້ອຳນວຍການໃຫຍ່ WIPO ສະໜັບສະໜູນຫວຽດນາມ ກໍ່ສ້າງ ແລະ ພັດທະນາຍຸດທະສາດແຫ່ງຊາດກ່ຽວກັບຊັບສິນທາງປັນຍາ ເພື່ອແນໃສ່ນຳ ຊັບສິນທາງປັນຍາກາຍເປັນເຄື່ອງມືເພື່ອພັດທະນາວິທະຍາສາດ ແລະ ເຕັກໂນໂລຢີ, ເສດຖະກິດ - ສັງຄົມ ແລະ ວັດທະນະທຳຢ່າງແທ້ຈິງ. ທ່ານກໍໃຫ້ຄຳໝັ້ນສັນຍາວ່າ: WIPO ຈະຊ່ວຍເຫຼືອຫວຽດນາມ ຜັນຂະຫຍາຍຍຸດທະສາດພັດທະນາເຄື່ອງໝາຍການຄ້າໃຫ້ແກ່ ວິສາຫະກິດ 3 ແຫ່ງທີ່ດີເດັ່ນ ເພື່ອເປັນແບບຢ່າງ ທະວີຄຸນຢ່າງກ້ວາງແຂວງໃຫ້ວິສາຫະກິດອື່ນໆ, ພ້ອມທັງຢືນຢັນຈະສືບຕໍ່ໜູນຊ່ວຍກໍ່ສ້າງສູນພັດທະນາຊັບສິນທາງປັນຍາ ຢູ່ເຂດເຕັກໂນໂລຢີສູງ ຮ່ວາລາກ.